Nupela Program Bilong Kibung Sekit
Long dispela “taim bilong las de,” yumi mas kisim savetingting i kam long God bambai em i ken orait long yumi. (2 Ti. 3:1) Kibung sekit bilong 2005 bai kamapim ol gutpela tok na helpim yumi taim em i strongim dispela tim bilong kibung, “Larim Savetingting i Kam Long God i Stiaim Yu.”—Jem. 3:17.
Long namba wan de bilong kibung, namba wan tok i gat fopela hap, nem bilong en “Kamapim ‘Savetingting i Kam Long God’ Long i Stap Bilong Yumi,” bai helpim yumi long kliagut long wanem samting yumi mas mekim bilong bihainim klinpela tingting, i stap wanbel wantaim ol narapela, bihainim pasin isi na redi long harim tok. Wasman sekit bai stori long tripela samting bilong savetingting bilong God. Wasman distrik bai mekim laspela tok long namba wan de bilong kibung na em bai soim olsem wanem ol wokman Kristen, maski ol man i lukim ol olsem ol “i no bin skul” na ol i “man nating tasol,” ol inap long tokaut long savetingting bilong God.—Ap. 4:13.
Long namba tu de bilong kibung, wanpela tok i gat fopela hap, nem bilong en “Mekim Ol Samting i Save Strongim Yu,” bai helpim yumi long luksave na abrusim ol samting em ol inap mekim yumi i go slek long ol samting bilong spirit. Em bai helpim yumi tu long strongim ol narapela long taim bilong ol miting long kongrigesen, long taim bilong autim tok, na insait long famili. Pablik tok, nem bilong en, “Olsem Wanem Savetingting i Kam Long God Inap Helpim Yumi,” bai helpim yumi long pilim tru ol gutpela samting yumi kisim taim yumi bihainim ol stiatok bilong God long i stap bilong yumi. Laspela tok, nem bilong en, “Pasin Bilong Bihainim Savetingting i Kam Long God i Lukautim Yumi,” bai strongim yumi long askim Jehova long givim yumi savetingting long dispela taim bilong las de.
Wanpela bikpela samting long olgeta kibung sekit em taim bilong ol nupela man i kisim baptais. Skul Tiokratik Bilong Autim Tok na Stadi Wastaua bilong wik tu bai kamap long kibung. Jehova i laik bai yumi olgeta i kisim helpim long savetingting em i givim. Bai yumi kisim planti gutpela kaikai bilong spirit long rot bilong ol gutpela tok bilong helpim na strongim yumi, em ol bai kamap long kibung sekit bilong yumi.—Snd. 3:13-18.