Watchtower Bilong Simpol Inglis Inap Helpim Yu

Nau i gat Watchtower bilong stadi i stap long simpol Inglis. Dispela Watchtower i bilong helpim (1) ol pablisa i save tok Inglis, tasol ating ol i no kisim bikpela skul; (2) ol pablisa em tok Inglis i no namba 1 tokples bilong ol; (3) ol yangpela, na ol pikinini i stap long komiuniti skul; na (4) ol Baibel sumatin em ol i mas kisim save long tok bilong God long rot bilong simpol Inglis na bai ol i ken kliagut long en.

Ol namba bilong ol paragraf, ol askim, na ol liklik het tok i wankain long Watchtower bilong stadi. Olgeta stori bilong en i wankain long Watchtower bilong stadi, tasol ol i yusim ol tok we em i isi long kliagut long en. Brata bilong lukautim Stadi Watchtower na brata bilong ritim, tupela bai yusim Watchtower bilong stadi. Tasol sapos planti long odiens i holim Watchtower bilong simpol Inglis, orait tupela tu i ken mekim wok long en. Ol tok piksa na ol skripsa i stap long tupela Watchtower wantaim i wankain, olsem na lain i holim Watchtower bilong simpol Inglis ol i ken bihainim na bekim long taim bilong stadi.

Sapos yu ting Watchtower bilong simpol Inglis bai helpim yu, yu ken tokim magasin sevan long putim oda long en.