No Ken Pret Long Autim Tok Long Ol Bisnis Teritori
1. Bilong wanem yumi no ken bel hevi sapos yumi pret long autim tok long ol bisnis teritori?
1 Olsem wanem? Yu save pret long autim tok long ol bisnis teritori? Sapos olsem, no ken bel hevi, long wanem, Pol, em man i gat strongpela bel na i no save pret, em tu i bin “strongim bel” bambai em i no ken surik long autim tok. (1 Tes. 2:2) Daunbilo i gat sampela samting we i save mekim yumi tingting planti na i gat sampela tok bilong helpim yumi long daunim ol dispela tingting.
2. Bilong wanem yumi no ken tingting planti long distebim ol wokman?
2 Bai Ol Wokman i Kros Taim Mi Distebim Wok Bilong Ol? Long planti wok bisnis ol wokman i save olsem ol man bai distebim wok bilong ol. Tasol ol bai toktok gut long yu, long wanem, ol i tingim yu olsem gutpela kastama bilong ol. Taim yu bilas gut na toktok gut long ol, yu kirapim ol long rispek long yu.
3. Yumi ken mekim wanem na bai yumi no sikirapim bel bilong ol kastama?
3 Bai Mi Autim Tok Taim Planti Kastama i Stap? I gutpela sapos yu go long taim we i no gat planti kastama tumas, olsem long taim ol stua i op long moning. Wet inap maneja o kuskus i stap em yet, orait yu ken go lukim em. Mekim sotpela tok tasol.
4. Yumi ken tok wanem taim yumi autim tok long ol bisnis teritori?
4 Bai Mi Tok Wanem? Sapos i gat man i lukautim ol wokman, orait go toktok wantaim em. Yu ken tok: “I hatwok long painim ol wokman na wokmeri long haus, olsem na mipela i kam painim yupela long wok ples. Mi save olsem em taim bilong wok olsem na mi bai stori liklik tasol.” Sampela taim i no gutpela long yumi stori long sait bilong kontribiusen, nogut ol i ting yumi ol man bilong salim ol samting. Tasol sapos ol i askim yumi long yumi save kisim mani olsem wanem bilong sapotim wok bilong yumi, orait yumi ken stori liklik long kontribiusen. Sapos yu save pinis em wanem kain bisnis, orait yu ken kisim tok orait long maneja na stori liklik wantaim ol wokman. Mekim tok olsem i stap antap. Sapos wanpela wokman i bisi, sotim tok na givim em liklik nius. Sapos yu no inap toktok wantaim ol wokman, ating maneja bai tokim yu long putim ol magasin samting long rum bilong ol long malolo.
5. Wanem as na yumi wok strong long autim tok long ol bisnis teritori?
5 Jisas na Pol i no pret long autim tok long ol man long ples wok, olsem na yu tu inap mekim. (Mat. 4:18-21; 9:9; Apo. 17:17) Beten askim Jehova long givim bel isi long yu na strongim bel bilong yu. (Apo. 4:29) Ol manmeri em ol i no stap long haus, ol i save stap long ples wok, olsem na yumi mas autim tok long ol bisnis teritori.