Wok Bilong Mekim Baibel Stadi—Maski Yumi Bisi
1. Bilong wanem sampela i no save tokim man long Baibel stadi kos em yumi save mekim wantaim man?
1 Sampela i no save tokim man long Baibel stadi kos em yumi save mekim, long wanem, ol i save bisi. Bilong lukautim wanpela Baibel stadi, yumi mas i gat taim. Yumi mas i gat taim bilong redim stadi, mekim Baibel stadi, na helpim sumatin long winim ol hevi bilong em. Aposel Pol i tok em i bin givim laip bilong em long helpim ol manmeri long Tesalonaika long kisim save long Jehova. (1 Tes. 2:7, 8) Olsem wanem yumi inap mekim Baibel stadi maski yumi no gat taim?
2. Pasin bilong laikim tru Jehova i mekim wanem long pasin bilong yumi long yusim gut taim bilong yumi?
2 Yumi Mas i Gat Taim Bilong Mekim Lotu: Tru tumas, yumi mas i gat taim bilong mekim ol wok lotu. Olsem, long olgeta de yumi mas i gat taim bilong i go long ol miting, mekim wok autim tok, ritim Baibel, na beten. Man marit o meri marit husat i save bisi long wok em bai amamas long yusim sampela hap taim long stap wantaim poroman marit bilong em. Olsem na em i bikpela samting moa long yumi mas amamas long “yusim gut taim” bilong mekim ol wok bilong lotuim Jehova, long wanem, yumi laikim tru em. (Efe. 5:15-17; 1 Jon 5:3) Jisas i tok, wanpela bikpela hap wok lotu bilong yumi em wok bilong kamapim disaipel. (Mat. 28:19, 20) Sapos yumi tingim dispela, em bai helpim yumi na yumi no surik long wok bilong mekim Baibel stadi.
3. Olsem wanem yumi inap lukautim yet Baibel stadi maski sampela hevi i kamap na i bagarapim sediul bilong yumi long autim tok?
3 Tasol olsem wanem sapos wok mani, wanpela sik i no inap pinis, o wanpela wok tiokratik, i mekim na yumi no bihainim sediul bilong yumi? Ol pablisa em sampela taim ol i mas go long narapela hap, ol i save mekim Baibel stadi bilong ol long rot bilong telefon o kompiuta. Na sampela husat i gat wanpela sik i no inap pinis ol i save stretim rot long Baibel sumatin i ken kam long haus bilong ol long mekim stadi. Sampela i stretim rot wantaim pablisa husat i save lukautim gut ol stadi na bai em i ken mekim Baibel stadi bilong ol taim ol i no stap.
4. Bai yumi kisim wanem ol blesing long wok bilong mekim Baibel stadi?
4 Pol i amamas tru long givim taim na strong bilong em long helpim ol narapela long kisim save long tok i tru. (Apo. 20:35) Taim em i tingim ol manmeri em i bin helpim ol long Tesalonaika, dispela i kirapim em long tenkyu long Jehova. (1 Tes. 1:2) Sapos yumi no larim pasin bilong bisi tumas i pasim yumi long insait long wok bilong mekim Baibel stadi, amamas bilong yumi long autim tok bai go bikpela moa.