Tok Welkam Long Ol!
1. Wanem bung i opim rot long yumi mekim gutpela pasin na dispela i autim tok long ol man? Na bilong wanem i olsem?
1 Long olgeta yia yumi mekim Memorial bilong tingim indai bilong Jisas, em i gutpela taim bilong tokaut long ol samting indai bilong Jisas i mekim long yumi. Tingim: Long dispela yia, ating winim 10 milion manmeri bai kam long Memorial na harim tok i stori long tupela bikpela pasin laikim em God na Jisas i kamapim long rot bilong pe bilong baim bek man. (Jon 3:16; 15:13) Ol man i kam long Memorial bai kisim save long ol blesing ol inap kisim long rot bilong dispela presen bilong Jehova. (Ais. 65:21-23) Tru, brata i mekim tok em bai autim tok long ol, tasol rot i op long yumi olgeta wan wan tu i ken mekim gutpela pasin long tok welkam long ol manmeri i kam long dispela bung, na gutpela pasin bilong yumi tu i autim tok long ol.—Rom 15:7.
2. Yumi ken mekim wanem bilong tok welkam long ol man i kam?
2 Yumi mas kisim ples sindaun na wet long program i kirap, tasol i gutpela long yumi mas go pas long toktok wantaim ol nupela man i sindaun klostu long yumi. Ating ol i tingting planti na ol i no kliagut long dispela miting. Olsem na taim yumi smail na tok halo long ol, bel bilong ol bai stap isi. Sapos yu laik save man i kam long wanem em i bin kisim invatesen, i gutpela long askim em olsem em nambawan taim bilong em long kam long wanpela miting bilong yumi o sapos em i save long wanpela long kongrigesen. Ating yu ken tokim em long sindaun wantaim yu na lukluk long Baibel na singsing buk bilong yu. Sapos bung i kamap long Haus Kingdom, i gutpela long soim em liklik long ol samting long Haus Kingdom. Bihain long tok, tokim em olsem sapos em i gat sampela askim yu bai amamas long bekim. Na sapos yupela i mas lusim hariap Haus Kingdom long wanem narapela kongrigesen bai kam insait, yu ken tok: “Mi laik save long tingting bilong yu long dispela miting. I gat rot long mi inap toktok gen wantaim yu?” Na stretim rot long go lukim em. Na moa yet, ol elda i mas strongim ol pablisa husat i bin lusim wok autim tok em ol i kam long Memorial.
3. Bilong wanem em i bikpela samting long yumi mekim gutpela pasin long ol man i kam long Memorial?
3 Planti man i kam long Memorial, em bai nambawan taim bilong ol long lukim lain bilong Jehova long i stap amamas, bel isi, na stap wanbel long paradais bilong spirit. (Sng. 29:11; Ais. 11:6-9; 65:13, 14) Taim ol i lusim dispela miting ol bai tingim yet wanem samting? Sapos yumi mekim gutpela pasin long ol, ol bai tingim yet dispela pasin.