Rot Bilong Yusim Buklet Husat i Mekim Laik Bilong Jehova Long Nau?
Em Bilong Stiaim Ol Baibel Sumatin i Kam Long Oganaisesen
1. Wanem 3-pela samting em nupela buklet inap helpim ol Baibel sumatin long en?
1 Olsem wanem? Yu kirap pinis long yusim nupela buklet Husat i Mekim Laik Bilong Jehova Long Nau? Wok bilong dispela buklet em long (1) helpim ol Baibel sumatin long save gut long lain bilong yumi, (2) ol wok bilong yumi, na (3) lukim olsem wanem oganaisesen bilong yumi i mekim wok. Long buklet Laik Bilong Jehova, wan wan lesen i stap long wan wan pes na yu inap mekim insait long 5 minit o 10 minit samting.
2. Stori long wan wan hap na ol samting bilong dispela buklet.
2 Ol Wan Wan Hap: Ol i brukim buklet long 3-pela hap, wan wan hap i stori long narapela narapela wok samting bilong oganaisesen bilong Jehova, olsem paragraf 1 i kolim. Ol i raitim het tok bilong ol 28 lesen olsem ol askim, na ol liklik het tok i stap long strongpela rait aninit long en i bekim dispela askim. Ol piksa long en em ol i kisim long 50 samting kantri, na i kamapim klia olsem wok bilong yumi i stap long olgeta hap bilong graun. Sampela lesen i gat blok “Kisim Sampela Save Moa,” we i gat sampela tok bilong helpim yu long strongim sumatin long bihainim dispela tok.
3. Olsem wanem bai yumi yusim buklet Laik Bilong Jehova?
3 Rot Bilong Yusim: Bilong kirapim tok, yu ken soim sumatin long askim, em i olsem het tok bilong lesen. Taim yu ritim dispela lesen wantaim em, stori long ol liklik het tok i stap long strongpela rait. Nau, skelim ol askim bilong riviu i stap daunbilo long pes. Yu ken ritim lesen olgeta pastaim o yu ken ritim ol tok aninit long wan wan het tok na stori long en. Skelim gut na makim wanem ol skripsa yu laik ritim. Stori tu long ol piksa na blok “Kisim Sampela Save Moa.” Planti taim, yumi save stat long lesen 1 na i go. Tasol sapos i gat wanpela samting em yu laik bai sumatin i save kwik long en, orait yu ken kalap i go stret long lesen i stori long dispela. Olsem, sapos wanpela kibung bai kamap, yu ken go stret long lesen 11.
4. Bilong wanem yu amamas long dispela nupela tul?
4 Taim yumi mekim Baibel stadi wantaim man, yumi helpim em long kisim save long Papa bilong yumi long heven. Tasol yumi mas skulim em tu long save long oganaisesen bilong Jehova. (Snd. 6:20) Olsem na yumi amamas long kisim dispela nupela tul em bai helpim yumi long stori gut long dispela!