Bai Yu Mekim Taim Rot i Op?
Soim Tenkyu Bilong Yumi Long Dispela Memorial
1. Memorial i op rot long yumi ken mekim wanem?
1 Memorial long Epril 14 bai opim rot long yumi ken kisim pasin bilong pilim tru long bel na soim tenkyu bilong yumi long ol gutpela pasin bilong Jehova. Stori i stap long Luk 17:11-18 i kamapim tingting bilong Jehova na Jisas long pasin bilong tok tenkyu. Wanpela bilong tenpela lepraman em Jisas i bin oraitim, em i pilim gutpela pasin bilong Jisas na em i go na tok tenkyu long Jisas. Long bihain, dispela presen bilong baim bek man bai mekim wok bilong en long pinisim olgeta hevi, na ol manmeri bai kisim laip oltaim. Olsem na long olgeta de, bai yumi tenkyu long Jehova long ol dispela blesing. Tasol hau bai yumi kamapim tenkyu bilong yumi long ol wik bihain?
2. Hau bai yumi kisim pasin bilong pilim tru long bel pe bilong baim bek man?
2 Kisim Pasin Bilong Pilim Tru Long Bel: Ol samting yumi tingting long en i save kirapim yumi long tok tenkyu. Bilong helpim yumi long pilim tru pe bilong baim bek man, yumi ken lukim sediul bilong Baibel ritim bilong Memorial long nupela Baibel New World Translation, apendiks B12, kalenda, na buklet Skelim Sampela Tok Bilong Baibel Long Olgeta De. I gutpela long famili olgeta i skelim wantaim. Taim yumi mekim olsem, dispela bai mekim na yumi pilim moa yet ol samting pe bilong baim bek man i mekim long yumi. Na dispela bai mekim gutpela samting long pasin bilong yumi.—2 Kor. 5:14, 15; 1 Jon 4:11.
3. Long wanem ol rot yumi ken kamapim tenkyu bilong yumi long taim bilong Memorial?
3 Soim Tenkyu Bilong Yumi: Ol samting yumi mekim i kamapim klia tenkyu bilong yumi. (Kol. 3:15) Lepraman em Jisas i bin oraitim, em i go painim Jisas na tok tenkyu long em. Yumi save, em i bin amamas long tokim ol narapela tu long Jisas i bin oraitim em. (Luk 6:45) Olsem wanem? Amamas bilong yumi long pe bilong baim bek man bai kirapim yumi long wok strong long singautim ol man i kam long Memorial? Narapela rot bilong soim tenkyu bilong yumi em yumi ken insait long wok painia haptaim o mekim bikpela wok moa bilong autim tok long taim bilong Memorial. Long apinun, long taim bilong mekim Memorial, dispela amamas bai kirapim yumi long welkamim ol lain i kam long Memorial na redi long bekim ol askim bilong ol.
4. Yumi ken mekim wanem long dispela Memorial na yumi no bel hevi?
4 Olsem wanem? Dispela em i laspela Memorial bai yumi mekim? (1 Kor. 11:26) Yumi no save. Tasol sapos dispela em i laspela Memorial bai yumi mekim, orait dispela sans bilong soim tenkyu bilong yumi long samting Jehova na Jisas i bin mekim em bai lus nating. Olsem wanem? Bai yu mekim taim rot i op? Yumi laik bai toktok bilong yumi na ol samting yumi tingim tingim long bel i amamasim Jehova, em Man Bilong Givim pe bilong baim bek man.—Sng. 19:14.