Wok Strong Long Kamap Man Bilong Autim Gut Tok
1. Wanem ol eksampel bilong bipo i soim olsem yumi mas wok strong long kamap man bilong autim gut tok?
1 Ol Kristen i mas wok strong long kamap ol man bilong autim tok. Olsem na Jisas i wok strong long skulim ol disaipel long kamap ol man bilong autim tok. (Luk 9:1-5; 10:1-11) Na Akwila na Prisila tu i kisim Apolos na “kliaim gut tingting bilong en long ol tok i stori long rot bilong God.” (Apo. 18:24-26) Long wankain as, Pol i strongim Timoti, em man i save gut long autim tok long wok yet long kisim skul na skulim gut ol man na bai “olgeta manmeri i ken lukim klia” olsem em i wok long kamap strong moa. (1 Tim. 4:13-15) Maski hamas yia yumi mekim wok bilong Bikpela olsem ol pablisa bilong gutnius, yumi mas wok yet long kisim ol gutpela pasin bilong autim gut tok.
2. Hau bai yumi kisim skul long ol narapela?
2 Kisim Skul Long Ol Narapela: Wanpela rot bilong kisim pasin bilong autim gut tok em yumi mas kisim skul long ol narapela. (Snd. 27:17) Olsem na putim gut yau taim narapela pablisa i autim tok. Askim ol pablisa i save gut long autim tok long wanem samting bilong autim tok em yu laik save long en, na putim yau taim ol i tokim yu. (Snd. 1:5) Olsem wanem? Yu no save gut long mekim gobek, kirapim Baibel stadi, o mekim ol narapela hap wok bilong wok autim tok? I gutpela long yu askim wasman i lukautim grup o wanpela pablisa i save gut long autim tok long helpim yu. Tingim, holi spirit bilong Jehova inap helpim yumi long kisim pasin bilong autim gut tok, olsem na oltaim beten askim em long helpim yu.—Luk 11:13.
3. Bai yumi mekim wanem sapos yumi kisim wanpela tok, ating yumi no amamas long en?
3 No ken bel hevi kwik sapos wanpela i tokim yu long wanpela pasin bilong yu long autim tok, maski yu no amamas. (Sav. 7:9) Olsem Apolos, mekim pasin daun na amamas long bihainim. Taim yu mekim olsem, yu kamapim savetingting.—Snd. 12:15.
4. Jisas i kamapim wanem as na yumi mas wok strong long kamap man bilong autim gut tok?
4 Wok Bilong Kamap Strong i Givim Glori Long God: Jisas i mekim wok long tok piksa bilong kirapim ol disaipel long wok strong long kamap ol man bilong mekim wok bilong God. Em i tok piksa olsem em yet i rop wain na ol wanwok bilong em, em ol Kristen God i bin makim, ol i olsem ol han bilong rop wain. Em i tok Papa i save klinim olgeta han i save karim kaikai na “bai em i ken karim planti kaikai moa.” (Jon 15:2) Olsem papa bilong gaden wain i laik bai ol han bilong rop wain i karim planti kaikai moa, Jehova i laik bai yumi mekim gutpela wok moa long rot bilong “yusim maus bilong yumi long tokaut long nem bilong en.” (Hib. 13:15) Wanem gutpela samting i kamap taim yumi wok strong long kamap man bilong autim gut tok? Jisas i bekim olsem: “Yupela i mas wok yet long karim planti kaikai . . . , na long dispela rot Papa bilong mi i kisim glori.”—Jon 15:8.