Kamap Strong Moa Long Wok Autim Tok
1 Papa bilong yumi long heven i amamas taim ol wokman bilong em i kamap strong moa insait long tok i tru. Na tu, ol i mas kamap strongpela man bilong autim gutnius na mekim gut dispela wok. Pol i strongim wasman Timoti long wok yet long mekim gut wok na bai olgeta manmeri i lukim pasin bilong em i kamap gutpela tru. (1 Ti. 4:13-15) Yumi olgeta i mas wok strong long mekim gut moa wok autim tok, maski yumi save gut pinis long mekim dispela wok.
2 Putim Ol Mak Bilong Yu Yet: Bilong kamap strong moa long wok autim tok, yumi mas putim sampela mak bilong yumi yet. Yumi inap putim wanem ol mak bilong winim? Yumi ken traim long mekim gutpela wok moa long bainat spirit bilong yumi, em Baibel. (Ef. 6:17) Ating i gat wanpela hap bilong wok autim tok yumi mas lain long mekim gut moa, olsem autim tok long rot, autim tok long telefon, o autim tok long bisnis teritori. Ating yumi ken wok strong long mekim gut ol gobek. Narapela gutpela mak yumi ken putim, em pasin bilong mekim gut wok bilong kirapim na mekim ol Baibel stadi.
3 Ol Helpim: Ol miting bilong kongrigesen, na moa yet Skul Tiokratik Bilong Autim Tok na Miting Bilong Wok, ol i bilong helpim yumi long kamap strong moa long wok autim tok. Taim yumi wok strong long redim ol dispela miting, go long ol, na bihainim ol tok i kamap, bai yumi kisim bikpela helpim moa.—2 Ko. 9:6.
4 Narapela i mas helpim narapela long kamap strong moa long wok autim tok. (Snd. 27:17) Taim yumi autim tok wantaim ol narapela na putim yau long tok ol narapela i mekim, dispela bai helpim yumi long mekim gut moa wok autim tok. Na tu, wasman bilong Buk Stadi inap stretim rot long wanpela i ken helpim yumi. Em i gutpela samting tru taim wanpela painia o narapela pablisa i helpim yumi long mekim gut wok, na nau yumi ken kisim bikpela amamas moa long wok autim tok! Olsem wanem? I gat wanpela nupela pablisa long buk stadi bilong yumi? Ating yumi ken go na askim em long autim tok wantaim yumi.
5 Nambawan bikpela wok i kamap long nau, em wok autim tok. Taim yumi “givim biknem” long Jehova, yumi laik givim bel olgeta long mekim dispela wok. (Hi. 13:15) Sapos yumi wok strong long kamap strong moa long wok autim tok, bai yumi stap olsem ol wokman i ‘autim stret tok tru bilong God, na i no gat sem long ai bilong en.’—2 Ti. 2:15.