Pe Bilong Baim Bek Man i Opim Rot Bilong Kirap Bek

Memorial i opim rot long yumi inap piksaim ol gutpela blesing yumi bai kisim long rot bilong pe bilong baim bek man. Wanpela bilong ol dispela blesing em kirap bek. Jehova i wokim ol man bilong i stap laip oltaim. Olsem na taim wanpela pren o wanblut bilong yumi i dai, yumi save bel hevi tru na krai sori long em. (1Ko 15:26) Jisas i bel sori tru long lukim ol disaipel i krai sori taim Lasarus i dai. (Jon 11:33-35) Jisas i bihainim olgeta pasin bilong Papa, olsem na yumi save olsem Jehova tu i save bel sori taim yumi krai sori long wanpela wanblut o pren i dai. (Jon 14:7) Jehova i laik tru na em i wetim taim bai kamap na em inap kirapim bek ol wokman bilong em, na yumi tu i mas bilip na wet.—Jop 14:13-15.

Jehova i no save paulim nabaut ol wok, olsem na yumi ken bilip olsem em bai oganaisim gut wok bilong kirapim bek ol man. (1Ko 14:33, 40) Yumi no inap mekim fiuneral, nogat, yumi bai mekim ol bung bilong welkamim ol manmeri i kirap bek long matmat. Taim yu bel sori long wanpela i dai, yu save mekim wanem? Yu save tingim tingim taim bilong kirap bek? (2Ko 4:17, 18) Yu save tenkyu long Jehova long em i redim pe bilong baim bek yumi na tokaut long Baibel olsem ol daiman bai kisim laip gen?—Kl 3:15.

• Long taim bilong kirap bek, yu laik tru long lukim husat ol pren na ol wanblut?

• Yu laik tru long bungim husat bilipman o bilipmeri em Baibel i stori long en?