Yumi Krai Sori, Tasol Yumi Gat Gutpela Samting Bilong Wetim
“Mipela i laik bai yupela i ken save gut long wanem ol samting bai i kamap long ol manmeri i dai pinis. Nogut yupela i sori tumas, olsem ol arapela manmeri i no bilip long God na i no wetim taim bilong kirap bek long matmat.”—1 TESALONAIKA 4:13.
OLSEM wanem? Wanpela long famili bilong yu i bin i dai? Maski yumi gat hamas krismas, sampela bilong yumi i bin krai sori long wanpela bilong famili o wanpela pren i bin i dai. Ating em i wanpela lapun bubu, o papa, o mama, o poroman marit, o pikinini. Lapun, sik, bagarap i painim ol man, dispela i mekim na planti ol i save dai long olgeta yia. Na pasin raskol, bagarapim man, ol bikpela pait, ol dispela samting tu i mekim na planti manmeri i bel hevi tru na i krai sori. Long olgeta yia, winim 50 milion manmeri ol i save dai long olgeta hap. Long olgeta de long 1993, inap olsem 140,250 ol i dai. Ol pren na famili bilong ol i pilim nogut tru long dispela samting.
2 Yumi pilim tru bel hevi bilong papamama bilong wanpela meri i gat bel, em i bin kisim bagarap long ka na em i dai. Ol i no gat narapela pikinini meri—em wanpela tasol. Em nau, wantu tasol pikinini meri na dispela pikinini em bai kamap namba wan bubu bilong tupela, ol i lus. Na man bilong dispela meri em i no gat meri moa, na namba wan pikinini bilong em—em bai man o meri—em tu i lus. Taim wanpela pikinini i dai, maski em i liklik yet o em i no liklik tumas, dispela i narapela kain na i nogut tru. I no stret long pikinini i dai paslain long papamama. Yumi olgeta i laik tumas long i stap laip. Olsem na dai em i wanpela birua tru.—1 Korin 15:26.
Dai i Kamap Long Ol Man
3 Sin na dai i bin bosim strong ol man inap 6 tausen yia samting, kirap long taim tupela tumbuna bilong pastaim, em Adam na Iv, i bin bikhet long God. (Rom 5:14; 6:12, 23) Baibel i no stori long tingting bilong tupela taim pikinini bilong ol, em Abel, i kisim birua long han bilong brata bilong em, Kein. Tasol i gat planti as na yumi ken ting, tupela i bel hevi nogut tru long dispela. Em namba wan taim ol i bin lukim wanpela man i dai, em pikinini bilong ol yet. Ol i lukim samting nogut i kamap long pasin bikhet bilong ol na long rot nogut ol i laik bihainim. Long laik bilong em yet Kein i kilim i dai Abel, maski God i bin givim toksave long em—em namba wan taim pasin bilong bagarapim man i bin kamap long graun. Taim Abel i dai, ating Iv i bel hevi nogut tru long dispela. Yumi inap save olsem, long wanem, taim Iv i karim Set em i tok: “God i givim narapela pikinini long mi bilong kisim ples bilong Abel, long wanem, Kein i bin kilim em i dai.”—Stat 4:3-8, 25.
4 Adam na Iv i pilim tru dispela strafe God i bin givim long tupela—em i bin tok, sapos ol i bikhet na sakim tok bilong em, bai ol i dai. Satan i bin givim tok giaman long tupela, tasol ating dispela bilip giaman olsem yumi man i gat wanpela tewel i no save dai, em i no bin kamap yet, olsem na dispela bilip giaman i no inap mekim gut bel bilong ol. God i bin tokim Adam: “Bai . . . yu dai na yu go bek long graun. Long wanem, mi bin wokim yu long graun, na bai yu go bek gen long graun.” God i no tok, bihain tewel bilong ol bai stap oltaim long heven o klinpaia o long narapela hap, nogat. (Stat 2:17; 3:4, 5, 19) Adam na Iv i stap laip na ol i mekim sin, olsem na bihain tupela bai i dai na i no stap moa. King Solomon i tok: “Ol [man] i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol. Taim ol manmeri i dai, laik na kros na mangal bilong ol i pinis olgeta, na ol dispela manmeri i no inap mekim wanpela samting moa long graun.”—Saveman 9:5, 6.
5 Dispela tok i stret tru! Husat inap tingim ol tumbuna i bin i dai inap 2 handet o 3 handet yia samting bipo? Nogat, a? Na ating ol i no save long matmat bilong ol dispela tumbuna, o ating bus i kamap pinis long en. Tasol olsem wanem? Dispela i makim olsem ol famili na pren bilong yumi i dai pinis ol i no inap i stap laip moa? Nogat. Marta i bin tokim Jisas long brata bilong em, Lasarus: “Mi save, em bai i kirap bek long las de, long dispela taim olgeta manmeri bai i kirap bek.” (Jon 11:24) Ol Hibru i bin bilip olsem bihain God bai kirapim bek ol man i dai pinis. Tasol maski ol i bilip long dispela, ol i save krai sori taim wanpela long famili i dai pinis.—Jop 14:13.
Ol Bilipman i Bin Krai Sori
6 Klostu 4 tausen yia bipo, taim meri bilong Abraham, em Sara, i dai pinis, “Abraham i sori tru na i krai long em.” Dispela gutpela wokman bilong Jehova i kamapim bel bilong em, em i bel hevi tru long gutpela meri bilong em i dai pinis. Abraham em i wanpela man i gat strongpela bel, tasol em i no sem long kamapim bel hevi bilong em na krai, nogat.—Stat 14:11-16; 23:1, 2.
7 Na Jekop tu i mekim olsem. Ol i bin giamanim em na em i ting wanpela animal bilong bus i bin bagarapim pikinini bilong em, Josep. Orait, Jekop i mekim wanem? Stat 37:34, 35 i tok: “Jekop . . . i brukim klos bilong en, na i pasim klos bilong sori. Na long planti de tru em i krai i stap long pikinini bilong en. Olgeta pikinini man na pikinini meri bilong en, ol i kam na mekim ol toktok bilong mekim bel bilong en i kamap gutpela gen. Tasol em i no laik tru na i tok olsem, ‘Mi mas krai long em inap mi go i stap wantaim em long ples bilong ol man i dai pinis.’ Olsem na Jekop i krai tasol i stap.” Tru tumas, em pasin bilong yumi ol man long krai sori taim wanpela long famili i dai.
8 Ating sampela bai tingim pasin bilong ol man bilong nau o pasin bilong ples na ol i ting, Jekop i laik mekim olsem hevi bilong em i bikpela moa yet. Tasol em i bin kamap long narapela kain taim, na dispela em i pasin bilong ples. Pasin bilong em long kamapim bel hevi bilong em—olsem pasim pipia klos bilong sori—em namba wan taim Baibel i stori long dispela pasin. Tasol olsem ol stori bilong Olpela Testamen i makim, taim wanpela man i dai ol i save krai na mekim ol singsing sori, na ol i save sindaun long sit bilong paia. I olsem ol Hibru i no save pasim bel hevi bilong ol taim wanpela i dai—ol i save kamapim tru.a—Esekiel 27:30-32; Amos 8:10.
Long Taim Bilong Jisas
9 Orait, olsem wanem long ol disaipel bilong Jisas bilong pastaim? Taim Lasarus i dai, tupela susa bilong em, em Marta na Maria, ol i krai sori long em. Na Jisas, em dispela man i nambawan olgeta, em i bin mekim wanem long taim em i kamap long matmat? Jon i stori olsem: “Maria i . . . lukim Jisas. Na em i brukim skru klostu long lek bilong em, na i tokim em olsem, ‘Bikpela, sapos yu bin i stap hia, bai brata bilong mi i no inap i dai.’ Jisas i lukim Maria i krai, na em i lukim ol Juda i kam wantaim Maria, ol tu i krai. Na bel bilong en i sori tru na em tu i laik krai. Na em i tok, ‘Yupela i bin putim em we?’ Na ol i tokim em, ‘Bikpela, yu kam lukim.’ Na Jisas i krai.”—Jon 11:32-35.
10 “Jisas i krai.” Dispela liklik hap tok i kamapim tru pasin bilong Jisas, em i man bilong sori na i pilim tru hevi bilong ol man. Em i save pinis, ol man i dai pinis bai kirap bek, tasol em “i krai.” (Jon 11:35) Ol man i lukluk i stap na ol i tok: “Lukim. Em i bin laikim tru dispela man.” Sapos Jisas i krai taim wanpela pren bilong em i dai, orait em i no samting bilong sem long en sapos wanpela man o meri long nau i krai sori long wanpela i dai pinis.—Jon 11:36.
I Gat Gutpela Samting i Wetim Ol Man i Dai Pinis?
11 Yumi inap kisim wanem save long ol dispela stori bilong Baibel? Yumi inap save, em i pasin bilong yumi man long krai sori long wanpela i dai pinis, na yumi no ken sem long kamapim bel hevi bilong yumi. Tru, yumi bilip olsem ol man i dai pinis bai kirap bek, tasol taim wanpela i dai na yumi bin laikim em tumas, dispela em i wanpela bikpela hevi tru, na bel bilong yumi i bagarap stret. Ating inap planti yia yumi bin poroman wantaim em na mekim ol samting wantaim em, na wantu dispela samting i pinis. Tru, bel bilong yumi i no bagarap olgeta olsem ol man i no bilip na i no wetim taim bilong kirapim bek ol man i dai pinis o ol man i gat tingting kranki long indai bilong man. (1 Tesalonaika 4:13) Na ol stori nating olsem ol man i gat wanpela tewel i no save dai, o ol i stap laip yet long narapela skin, yumi no larim ol dispela tok i giamanim yumi. Yumi save, Jehova i promis pinis long “nupela skai na nupela graun, na stretpela pasin tasol bai i stap long en.” (2 Pita 3:13) God “bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:4.
12 Wanem gutpela samting i wetim ol man i dai pinis?b Spirit bilong God i bin kirapim Pol, em wanpela Kristen, long raitim tok olsem: “Em i pinisim pinis olgeta arapela birua, orait em bai i pinisim dai tu.” (1 Korin 15:26) Olsem wanem Pol inap bilip tru long dispela? Long wanem, wanpela man i bin kirap bek long matmat, em Krais Jisas, em i bin kirapim Pol long tanim bel na em i skulim Pol. (Aposel 9:3-19) Olsem na Pol inap tok: “Wanpela man [Adam] i bin kamapim pasin bilong i dai, na olsem tasol wanpela man [Jisas] i bin kamapim pasin bilong kirap bek. I olsem. Olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip.”—1 Korin 15:21, 22.
13 Ol tok Jisas i lainim ol man long en i save strongim tru bel bilong yumi na yumi wetim gutpela samting bai kamap bihain. Olsem: Em i bin mekim wanem long Lasarus? Em i go long matmat em skin bilong Lasarus i bin stap long en inap 4-pela de. Em i beten, “na em i singaut strong, ‘Lasarus, yu kam ausait.’ Orait Lasarus i kirap bek na i kam ausait. Lek na han na pes bilong en ol i bin karamapim long laplap. Na nau Jisas i tokim ol olsem, ‘Lusim laplap na larim em i wokabaut.’ ” Ating Marta na Maria i kirap nogut na pes bilong ol i amamas nogut tru! Ol man i save sindaun klostu long ol, ating ol i kirap nogut tru taim ol i lukim dispela mirakel! Olsem na planti manmeri i lukim dispela samting ol i bilip long Jisas. Tasol ol birua bilong em, em ol bikman bilong lotu, ol i “wokim toktok bilong painim rot bilong kilim Jisas i dai.”—Jon 11:41-53.
14 Jisas i kirapim bek Lasarus long ai bilong planti man. Dispela i makim samting em bai mekim bihain—em bai kirapim bek ol man i dai pinis, olsem em i bin tok long mekim paslain long dispela taim, em i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot na kot bai i tok olsem, ol i mas bagarap.”—Jon 5:28, 29.
15 Olsem pastaim yumi bin tok, Pol i bilip long ol man i dai pinis bai kirap bek. I gat wanem as na em i bilip olsem? Pastaim em i dispela man nogut, Sol, em i bin mekim nogut long ol Kristen. Taim ol bilipman i harim nem bilong em, ol i save pret, long wanem, em dispela man yet i bin orait long ol man i tromoi ston long Stiven, em wanpela Kristen, na kilim em i dai. (Aposel 8:1; 9:1, 2, 26) Tasol taim em i wokabaut long rot i go long Damaskus, Krais i stretim tingting bilong em—em i mekim na wanpela strongpela lait i sutim ai bilong Sol na em i stap aipas inap sampela de. Sol i harim wanpela nek i tokim em: “ ‘Sol, Sol, bilong wanem yu wok long bagarapim mi?’ Na Sol i tok, ‘Bikpela, yu husat?’ Na em i tok, ‘Mi Jisas, yu wok long bagarapim mi.’ ” Orait dispela Krais yet, em i bin kirap bek long matmat, em i tokim Ananaias, em i stap long Damaskus, long i go long wanpela haus em Sol i stap long en na i mekim beten, na em i mas stretim ai bilong Sol na bai em inap lukluk gen. Olsem na i gat as tru na Pol wantaim Ananaias i bilip olsem ol man i dai pinis bai kirap bek.—Aposel 9:4, 5, 10-12.
16 Tingim wanpela tok em Sol, olsem aposel Pol, i bin mekim na ol man i mekim nogut long em na putim em long kot. Em i sanap long ai bilong namba wan gavman Feliks na em i tok: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Em nau, yumi save Pol i no bilip long wanpela tok haiden bilong ol Grik, ol i bilip olsem ol man i gat wanpela tewel, na taim ol i dai tewel bilong ol i save go long narapela ples na i stap oltaim na i no inap i dai. Tasol Pol i bilip olsem ol man i dai pinis bai ol i kirap bek, na em i skulim ol man long bilip long dispela samting. Sampela bai kirap bek na kamap spirit long heven na stap wantaim Krais, na ol i no inap i dai moa, na planti planti manmeri ol bai kirap bek na i stap long graun, taim graun i kamap gutpela olgeta.—Luk 23:43, Nupela Testamen bilong 1978; 1 Korin 15:20-22, 53, 54; KTH 7:4, 9, 17; 14:1, 3.
17 Olsem na Baibel i givim gutpela tok promis long yumi na yumi inap bilip tru olsem long rot bilong kirap bek long matmat planti manmeri bai lukim gen famili bilong ol hia long graun—tasol bai i no gat krai na hevi moa.—2 Pita 3:13; KTH 21:1-4.
Bilong Helpim Ol Man i Krai Sori
18 Tasol nau yumi tingim yet sampela long famili ol i dai na yumi krai sori i stap. Orait, yumi ken mekim wanem bilong karim dispela hevi? Ol narapela i ken mekim wanem bilong helpim ol man i krai sori? Na yumi ken mekim wanem bilong helpim ol manmeri yumi bungim ol taim yumi autim tok, em wanpela bilong ol i dai na ol i no save long wanpela gutpela samting ol inap wet long en na ol tu i krai sori? Na Baibel i gat wanem gutpela tok moa long ol famili o pren bilong yumi ol i dai pinis na dispela tok inap strongim bel bilong yumi? Stori i kamap bihain long dispela bai toktok long dispela samting.
[Ol Futnot]
a Bilong kisim sampela save moa long pasin ol i bin mekim long krai sori long taim bilong Baibel, lukim buk Insight on the Scriptures, Volyum 2, pes 446-447, em Sosaiti Wastaua bilong Nu Yok i wokim.
b Bilong kisim sampela save moa long tok bilong Baibel long ol man i dai pinis bai kirap bek, lukim buk Insight on the Scriptures, Volyum 2, pes 783-793.
Yu Inap Bekim?
◻ Olsem wanem yumi ken tok, dai em i wanpela birua?
◻ Ol wokman bilong God long taim bilong Baibel ol i bin mekim wanem bilong kamapim bel hevi bilong ol?
◻ Yumi inap wetim wanem samting bai painim ol famili o pren bilong yumi i dai pinis?
◻ I gat wanem as na Pol inap bilip tru long ol man i dai pinis bai kirap bek?
[Askim Bilong Stadi]
1. Wanem samting i save painim ol man long olgeta taim?
2. Taim wanpela pikinini i dai, wanem samting bilong dispela i no stret long yumi?
3. Taim Abel i dai, ating dispela i mekim wanem long Adam na Iv?
4. Dispela stori nating olsem ol man i gat wanpela tewel i no save dai, olsem wanem na dispela i no inap mekim gut bel bilong tupela taim Abel i dai?
5. Wanem gutpela samting bai painim ol man i dai pinis na yumi inap bilip tru long en?
6, 7. Abraham na Jekop i mekim wanem taim wanpela bilong ol i dai?
8. Ol Hibru i bin mekim wanem bilong kamapim bel hevi bilong ol taim wanpela bilong ol i dai?
9, 10. (a) Taim Lasarus i dai, Jisas i mekim wanem? (b) Samting Jisas i mekim i kamapim klia wanem pasin bilong em?
11. (a) Yumi inap kisim wanem save long ol stori bilong Baibel long ol man i krai sori long wanpela i dai? (b) Bilong wanem bel bilong yumi i no bagarap olgeta olsem ol man i no bilip na wetim taim bilong kirap bek long matmat?
12. Pol i tok wanem na em i kamapim bilip bilong em long kirap bek?
13. Taim Lasarus i kirap bek long matmat, ol man i lukim dispela samting ol i mekim wanem?
14. Taim Jisas i kirapim bek Lasarus, dispela i makim wanem samting bai kamap bihain?
15. Wanem samting i kamap na Pol wantaim Ananaias inap bilip tru olsem Jisas i kirap bek pinis?
16, 17. (a) Olsem wanem yumi save, Pol i no bilip long tok bilong ol Grik olsem man i gat wanpela tewel i no save dai? (b) Baibel i givim wanem tok long yumi na yumi inap bilip tru na wetim gutpela samting bai kamap bihain? (Hibru 6:17-20)
18. (a) Long ol “Pret Long God” Kibung, yumi bin kisim wanem gutpela samting bilong helpim yumi taim yumi autim tok? (Lukim blok.) (b) Wanem sampela askim yumi mas save long bekim bilong en?
[Blok long pes 8, 9]
Bilong Helpim Ol Man i Krai Sori
Long ol “Pret Long God” Kibung i bin kamap long 1994-1995, Sosaiti Was Taua i tokaut long wanpela nupela buklet, nem bilong en Taim Wanpela Long Famili i Dai. Ol i wokim dispela buklet bilong mekim gut bel bilong ol manmeri bilong olgeta lain na tok ples. Ating yu lukim pinis olsem dispela buklet i kamapim ol tok bilong Baibel long indai na ol man i dai pinis ol i stap olsem wanem. Na bikpela samting moa, em i kamapim ol promis bilong God, olsem long rot bilong Krais Jisas ol man i dai pinis bai kirap bek na i stap long Paradais long graun. Dispela tok i strongim tru bel bilong ol manmeri i krai sori long wanpela bilong ol i dai. Olsem na dispela buklet inap helpim gut yumi taim yumi mekim wok Kristen bilong autim tok, na ating em bai kirapim ol man na ol bai laik long harim, na bai yumi kisim planti Baibel-stadi moa. Ol askim bilong stadi i stap insait long ol blok klostu long pinis bilong ol wan wan stori. Olsem bai i no hatwok long kamapim gen sampela tok yumi mekim pinis wantaim ol man i gat gutpela bel na ol i krai sori i stap.
[Piksa long pes 8]
Taim Lasarus i dai, Jisas i krai
[Piksa long pes 9]
Jisas i kirapim bek Lasarus long matmat
[Piksa Kredit Lain long pes 7]
First Mourning, by W. Bouguereau, from original glass plate in Photo-Drama of Creation, 1914