Baibel i Tok Wanem?

I Gat Rong Long Bel Hevi na Krai?

“MI BILIP STRONG LONG OL MAN I DAI PINIS BAI KIRAP BEK, NA MI TING, SAPOS MI KAMAPIM BEL HEVI BILONG MI LONG AI BILONG OL NARAPELA, EM BAI I NO STRET NA BAI OL I GAT AS BILONG TING OLSEM MI NO BILIP TRU LONG KIRAP BEK. MI BIN TING SAPOS MI BILIP TRU LONG KIRAP BEK, BAI MI NO INAP PILIM BIKPELA BEL HEVI OLSEM.”​—CHARLENE, EM WANPELA KRISTEN I BAPTAIS INAP 21 YIA.

TAIM wanpela long famili i dai, kain kain tingting inap kamap long bel ating pastaim yu no ting bai kamap, olsem: pret, belhat, bel i kotim yu, bel hevi. Tasol gutpela tok promis bilong Baibel long ol daiman bai kirap bek na i stap laip long Paradais aninit long Kingdom bilong God, em inap strongim Kristen na dispela hevi i no daunim em olgeta. (Jon 5:​28, 29; Aposel 24:15; KTH 21:​1-4) Tasol olsem tok bilong Charlene i makim, taim wanpela long famili i dai sampela Kristen i karim narapela hevi tu wantaim​—ol i ting i gat rong long krai na bel hevi, long wanem, dispela pasin i soim olsem bilip bilong ol long kirap bek i sot.

Orait, Baibel i tok wanem long pasin bilong bel hevi na krai? I gat rong long krai taim wanpela long famili i dai?

Ol i Bin Krai

Yumi olgeta i save long strongpela bilip bilong Abraham. Taim God i traim em, Abraham “i givim Aisak long God” olsem ofa. (Hibru 11:17; Stat 22:​9-13) I no gat man i bin kirap bek paslain long taim bilong Abraham, tasol em i bilip olsem, “Sapos Aisak i dai, maski, God em inap long kirapim em bek.” (Hibru 11:19) Inap 12-pela yia bihain, meri bilong Abraham, em Sara, em i dai. Abraham i mekim wanem? Baibel i tok, em “i sori tru na i krai long em.”a (Stat 23:2) Em nau, maski em i bilip olsem God inap kirapim bek ol daiman, Abraham i krai. Tasol nem bilong Abraham i stap long Baibel olsem wanpela man i gat bikpela bilip.​—Hibru 11:​8-10.

Wanpela stori yumi pilim tru, em stori bilong Krais Jisas i krai taim gutpela pren bilong em Lasarus i dai. Baibel i stori long dispela olsem: “Maria i go kamap long dispela hap Jisas i stap long en, na em i lukim Jisas. Na em i brukim skru klostu long lek bilong em, na i tokim em olsem, ‘Bikpela, sapos yu bin i stap hia, bai brata bilong mi i no inap i dai.’ Jisas i lukim Maria i krai, na em i lukim ol Juda i kam wantaim Maria, ol tu i krai. Na bel bilong en i sori tru na em tu i laik krai. Na em i tok, ‘Yupela i bin putim em we?’ Na ol i tokim em, ‘Bikpela, yu kam lukim.’ Na Jisas i krai.”​—Jon 11:​32-35.

Yumi save, Pikinini bilong God i gutpela olgeta, tasol em i no sem long kamapim bel hevi bilong em. Insait bilong tok Grik (da·kryʹo) ol i tanim olsem “krai,” em “aiwara i pundaun tasol i no gat nois.” Yumi kirap nogut long dispela samting, long wanem, Jisas i bin kirapim bek pikinini man bilong meri wanpis bilong Nain na pikinini meri bilong Jairus​—na em i tingting pinis long kirapim bek Lasarus. (Luk 7:​11-15; 8:​41, 42, 49-55; skelim wantaim Jon 11:11.) Na inap sampela minit bipo em i tokim Marta: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip.” (Jon 11:25) Tasol bikpela sori tru i kamap long bel bilong Jisas, olsem na aiwara i pulap na kapsait.

I gat wanpela samting i bikpela samting moa yet. Jisas em i “wankain tru olsem God yet.” (Hibru 1:3) Olsem na bikpela bel sori bilong Jisas taim pren bilong em i dai i makim stret pasin bilong Papa bilong yumi Jehova, em tu i Man bilong bel sori na em i save pilim tru bel hevi bilong ol wokboi bilong em.​—Skelim wantaim Song 56:8.

Em nau, yumi save i no gat rong long bel hevi na krai taim wanpela long famili i dai. Abraham i krai taim Sara i dai. Jisas tu i krai taim Lasarus i dai. God Jehova i pilim tru bel hevi bilong yumi, long wanem, “em i save wari long [yumi].”​—1 Pita 5:7.

Tasol olsem wanem long dispela gutpela samting ol Kristen i wetim? Em i strongim ol long karim hevi o nogat?

‘No Ken Sori Tumas’

Taim sampela long kongrigesen Kristen bilong pastaim i bel hevi long ol wanlotu i dai, aposel Pol i laik mekim gut bel bilong ol na em i tok: “Ol brata, mipela i laik bai yupela i ken save gut long wanem ol samting bai i kamap long ol manmeri i dai pinis. Nogut yupela i sori tumas, olsem ol arapela manmeri i no . . . wetim taim bilong kirap bek long matmat.” (1 Tesalonaika 4:13) Tru tumas, ol man i bilip long promis bilong God long kirapim bek ol man i dai pinis i winim ol man i no bilip.b Olsem wanem yumi ken tok olsem?

Ol man i no bilip long kirap bek, bel bilong ol i bagarap stret taim wanpela bilong ol i dai. Na maski ol i tok ol i bilip long tewel i stap laip yet, ating dispela i no mekim gut bel bilong ol. As bilong bel hevi bilong planti man, em ol i ting ol i no inap bung gen wantaim wanblut bilong ol i dai pinis inap oltaim oltaim. Ol i no klia gut long tok bilong kirap bek, na taim ol i planim wanpela wanblut i olsem olgeta gutpela samting ol i bin wetim i kamap bihain i pinis tu long dispela taim; long tingting bilong ol, ol i no inap tru lukim wanblut gen.​—Skelim wantaim 1 Korin 15:​12-19, 32.

Tasol long ol Kristen tru, i no olsem. Pol i tok, indai i kain olsem slip, long wanem, daiman i no save long wanpela samting, wankain olsem man i slip i dai, na tu em inap kirap gen long rot bilong kirap bek. (Jon 11:​11, 13; Saveman 9:​5, 10) Dispela tok promis bilong Baibel i strongim bel bilong ol Kristen.

Taim wanpela long famili bilong Kristen i dai, em i bel hevi na sori tru long em i no lukim pes bilong em moa o harim nek bilong em moa​—wankain olsem ol man i no bilip. Tru, Kristen i bilip long kirap bek, tasol i no olsem dispela i pasim em olgeta long pilim bel hevi. Tasol dispela bilip i helpim em na em i no sori sori na krai krai planti tumas. Bilip long kirap bek i no makim olsem Kristen i no ken bel hevi na krai, nogat; tasol dispela bilip inap strongim em na bai i no hatwok tumas long karim bel hevi bilong indai.

[Ol Futnot]

[Piksa Kredit Lain long pes 26]

Jean-Baptiste Greuze, detail from Le fils puni, Louvre; © Photo R.M.N.