Skul Yumi Inap Kisim Long Ol Kristen i Bin Stap Gut Long Jehova Inap Planti Yia

Insait long ol kongrigesen bilong yumi i gat ol bratasista i bin i stap gut long Jehova inap planti yia. Yumi inap kisim skul long pasin bilong ol long bilip strong long Jehova. Yumi ken askim ol long ol samting i kamap insait long oganaisesen bilong Jehova long bipo na olsem wanem Jehova i helpim ol long karim ol hevi i bin painim ol. Yumi ken singautim wanpela bilong ol i kam bung wantaim yumi long famili lotu na askim em long stori long ekspiriens bilong em.

Sapos yu stap longpela taim long tok i tru, redi long kamapim bilip bilong yu long ol yangpela Kristen. Jekop na Josep i stori long ol famili bilong ol long ol samting Jehova i bin mekim bilong helpim ol. (St 48:21, 22; 50:24, 25) Bihain, Jehova i laik bai ol het bilong famili i mas skulim ol pikinini bilong ol long ol bikpela wok em i bin mekim. (Lo 4:9, 10; Sg 78:4-7) Long nau, ol papamama na ol arapela insait long kongrigesen i ken stori long ol yangpela long ol gutpela samting ol i lukim Jehova i mekim insait long oganaisesen bilong em.

LUKIM VIDIO STRONGIM PASIN WANBEL TAIM GAVMAN I TAMBUIM WOK, NA BIHAIN BEKIM OL DISPELA ASKIM:

• Olsem wanem brens long Ostria i helpim ol brata long sampela kantri we i gat tambu long wok bilong yumi?

• Olsem wanem ol brata long ol dispela kantri i holimpas bilip bilong ol?

• Bilong wanem planti bratasista long Romenia i lusim oganaisesen bilong Jehova? Olsem wanem ol i kam bek long oganaisesen?

• Olsem wanem ol dispela ekspiriens i strongim bilip bilong yu?