Referens Bilong Laip na Wok Autim Tok Miting Wok Buk
Disemba 7-13
GUTPELA SAVE I KAM LONG BAIBEL | WOK PRIS 10-11
“Yumi Mas Laikim Jehova Moa Winim Ol Wanblut Bilong Yumi”
it-1 1174
Samting i No Stret Wantaim Lo
Paia i No Stret Long Mekim na Paura Bilong Kamapim Smok i Gat Gutpela Smel We i No Stret Long Mekim. Long Wok Pris 10:1, tok Hibru zar i makim olsem “paia i no stret long mekim, na [God] yet i no bin tokim tupela long mekim,” tasol Nadap na Abihu, em tupela pikinini man bilong Aron, i mekim ofa long dispela paia long ai bilong Jehova na em i kilim tupela i dai long paia. (Wk 10:2; Nam 3:4; 26:61) Jehova i tokim Aron olsem: “Yu na ol pikinini man bilong yu i no ken dring wain o alkohol taim yupela i kam insait long haus sel bilong bung. Sapos yupela i mekim olsem bai yupela i dai. Yupela na ol lain tumbuna pikinini bilong yupela i kamap bihain i mas bihainim dispela lo inap oltaim oltaim. Na bai yupela i ken save long samting i holi na samting i no holi, na long ol samting i no klin na ol samting i klin, na bai yupela i ken skulim ol Israel long olgeta lo em Jehova i bin tokim yupela long rot bilong Moses.” (Wk 10:8-11) I luk olsem Nadap na Abihu i spak taim tupela i kukim paura bilong kamapim smok i gat gutpela smel bilong mekim ofa, olsem na dispela paia tupela i mekim i no stret long mekim. Dispela kain paia i no stret long mekim bikos long rong taim, ples, na pasin ol i bihainim long mekim dispela ofa, o ol i no bihainim stret ol samting em Kisim Bek 30:34, 35 i kolim bilong wokim paura bilong smok i gat gutpela smel. Tupela i spak, tasol dispela i no mekim na tupela i no gat asua long samting tupela i mekim.
Malolo Bilong God—Yu Insait Pinis Long En?
16 Aron, brata bilong Moses, i kisim bikpela hevi long samting tupela pikinini man bilong em i mekim. Tupela pikinini bilong em, Nadap na Abihu i mekim ofa long pasin we Jehova i no orait long en. Jehova i salim paia i kam long heven na kilim ol. Tingim bikpela pen na hevi Aron i karim. Em i no inap toktok moa wantaim ol pikinini. Ol i dai pinis. Tasol i gat narapela samting i givim bikpela hevi moa long Aron na famili bilong en. Moses i tokim Aron na ol arapela pikinini man bilong en long ol i no ken krai sori. Moses i tok: “Yupela i mas komim gras long olgeta de. . . . Na yupela i no ken brukim klos bilong makim sori bilong yupela. Sapos yupela i bihainim pasin bilong sori, orait bai Bikpela i kilim yupela i dai, na bai Bikpela i kros nogut long olgeta manmeri bilong yumi Israel.” (Wkp. 10:1-6) Skul yumi kisim i klia tru. Yumi mas laikim Jehova moa yet, winim ol wanblut husat i no stap gut long Jehova.
Mekim Wok Painimaut
Yumi Mas i Stap Holi Long Olgeta Wokabaut Bilong Yumi
18 Sapos yumi laik i stap holi, orait yumi mas skelim gut ol tok bilong Baibel na mekim samting God i laik yumi mas mekim. Tingim ol pikinini man bilong Aron, em Nadap na Abihu. God i bin kilim ol i dai, bikos, ‘tupela i bringim paia long Bikpela olsem ofa, tasol Bikpela i no bin tokim tupela long bringim kain paia olsem,’ na ating ol i bin spak long dispela taim. (Wkp. 10:1, 2) Tingim tok God i givim long Aron. (Ritim Wok Pris 10:8-11.) Yu ting dispela tok i makim olsem yumi no ken dring alkohol paslain long yumi go long ol miting Kristen? Tingim: Yumi no stap aninit long Lo Bilong Moses. (Rom 10:4) Long sampela kantri, sampela wanbilip bilong yumi i save kisim liklik alkohol long taim bilong kaikai paslain long ol i go long miting. Long taim bilong Pasova, ol i bin yusim 4-pela kap wain. Taim Jisas i kamapim bung bilong Memorial, em i tokim ol aposel bilong em long dring wain na dispela i makim blut bilong em. (Mat. 26:27) Baibel i tambuim pasin bilong dring planti na spak. (1 Kor. 6:10; 1 Tim. 3:8) Long planti Kristen, ating maus bilong bel bai kirapim ol long sakim pasin bilong dring alkohol paslain long ol i mekim wok bilong God. Tasol long olgeta kantri, ol man i bihainim narapela narapela pasin, olsem na em i bikpela samting long ol Kristen i mas “skelim wanem samting i klin long ai bilong [God] na wanem samting i no klin,” na long dispela rot ol inap bihainim pasin holi na dispela bai amamasim God.
it-1 111 par. 5
Ol Animal
Ol lain i stap aninit long Lo Bilong Moses, ol tasol i tambu long kaikai sampela animal, long wanem, Wok Pris 11:8 i tok: “Yupela i mas tingim olsem ol i samting doti,” dispela tok i go long ol Israel. Taim Krais Jisas i givim bodi bilong em olsem ofa, dispela i pinisim Lo, na olgeta dispela tambu i pinis. Nau olgeta manmeri i bihainim tok God i givim long Noa bihain long Bikpela Tait.—Kl 2:13-17; St 9:3, 4.
Baibel Ritim
Disemba 14-20
GUTPELA SAVE I KAM LONG BAIBEL | WOK PRIS 12-13
“Kisim Skul Long Ol Lo Bilong Sik Lepra”
Olpela o Tokaut Paslain?
• Putim ol sikman i stap ol yet.
Lo Bilong Moses i tok ol manmeri i mas putim ol lepraman i stap ol yet longwe long ol narapela. Namel long yia 500 na 1500 C.E., ol bikpela sik i stat long painim ol manmeri, na dispela i kirapim ol dokta long bihainim stiatok bilong Baibel, na dispela i bin helpim olgeta manmeri.—Wok Pris, sapta 13 na 14.
Yu Save Long Dispela?
Long taim bilong ol man i raitim Baibel, ol Juda i save pret tru long sik lepra. Dispela sik inap bagarapim ol rop wailis long bodi bilong man, kamapim ol sua long skin, na han na lek inap krungut. I no gat marasin bilong oraitim sik lepra. Olsem na ol lepraman i mas lusim ol narapela na i go stap ol yet, na ol i mas karamapim maus long han bilong ol na tokaut olsem ol i no klin.—Wok Pris 13:45, 46.
it-2 238 par. 3
Sik Lepra
Long ol klos na ol haus. Sik lepra inap kamap long laplap ol i wokim long gras bilong sipsip o laplap linen, o ol arapela samting ol i wokim long skin bilong animal. Ol i ken wasim dispela samting bilong rausim sik, na tu, ol i save stretim rot long putim dispela samting em sik i kamap long en long narapela hap. Tasol sapos hap bilong klos o laplap i gat dispela yelo wantaim grin mak o retpela mak i stap, dispela em mak bilong sik lepra na ol i mas kukim dispela samting. (Wk 13:47-59) Sapos yelopela wantaim grinpela mak o retpela mak i kamap long wol bilong haus, orait pris bai putim tambu long dispela haus. Ating ol i mas rausim ol ston i stap long wol i gat dispela mak, na bihain ol i mas sikirapim na rausim simen i karamapim ston long wol bilong haus na ol i mas kisim ol dispela simen i go ausait long taun na tromoi long ples we ol i save tromoi ol samting i no klin. Sapos dispela samting nogut i kamap gen long haus, pris bai tokaut olsem dispela haus i no klin na ol i mas brukim haus na rausim olgeta samting bilong en na karim i go ausait long taun na tromoi long dispela ples ol i save tromoi ol samting i no klin. Tasol haus em pris i tokaut olsem i no gat sik moa, ol i mas mekim ol samting bilong mekim dispela haus i kamap klin. (Wk 14:33-57) Sampela i tok olsem dispela sik lepra i kamap long ol klos o ol haus i makim wanpela kain mosong; tasol ol man i no save sapos dispela em tru o nogat.
Mekim Wok Painimaut
Sampela Bikpela Tok Bilong Buk Wok Pris
12:2, 5—Taim meri i karim pikinini, bilong wanem em i “no klin”? God i wokim hap bilong bodi bilong meri long kamapim ol pikinini i gutpela olgeta, i no gat sin. Tasol sin bilong Adam i mekim na sin i save kalap long ol pikinini. Dispela ol haptaim we meri i “no klin,” em long taim meri i karim pikinini, na long taim em i kisim sik mun na taim meri i slip wantaim man, dispela i kirapim ol Israel long tingim sin ol i bin kisim long Adam. (Wok Pris 15:16-24; Song 51:5; Rom 5:12) Ol samting meri i mekim bilong kamap klin bai helpim ol Israel long pilim tru olsem i mas i gat wanpela man i dai bilong baim bek ol man na bai ol inap kamap gutpela olgeta gen. Olsem na Lo i stap olsem ‘waspapa bilong ol, bilong bringim ol i go long Krais.’—Galesia 3:24.
Olpela o Tokaut Paslain?
• Taim bilong katim skin.
Lo Bilong God i tok long namba 8 de bihain long mama i karim bebi boi, ol i mas katim skin long sem bilong bebi. (Wok Pris 12:3) Taim bebi i winim pinis wanpela wik, bodi bilong em inap stopim blut long ron sapos ol i katim skin bilong em. Long taim bilong ol man i raitim Baibel, i no gat kain kain marasin, olsem na em savetingting long wet inap bebi i winim wanpela wik paslain long ol i katim skin long sem bilong em.
Baibel Ritim
DIsemba 21-27
GUTPELA SAVE I KAM LONG BAIBEL | WOK PRIS 14-15
“Lotuim Jehova Long Pasin i Klin”
it-1 263
Pasin Bilong Waswas
I gat planti as na ol Israel i save bihainim pasin bilong waswas na bai ol i kamap klin long ai bilong God. Taim sik lepra bilong wanpela man i pinis, o wanpela i tatsim man em “susu i kamap long sem bilong” em, o man em wara i kamap long sem bilong em, o meri i gat sik mun, o sapos man o meri i mekim maritpasin, ol i “stap doti” na ol i mas waswas bilong kamap klin long ai bilong God. (Wk 14:8, 9; 15:4-27) Wanpela i stap insait long haus sel we i gat bodi bilong man i dai pinis o wanpela i tatsim bodi bilong man i dai pinis, em i “stap doti” na ol i mas kisim wara na tromoi long em bilong mekim em i kamap klin. Sapos wanpela i no bihainim dispela lo, ol “i mas kilim dispela man i dai, long wanem, em i mekim ples holi bilong Jehova i kamap doti.” (Nam 19:20) Olsem na i stret Baibel i tok piksa long pasin bilong waswas bilong makim pasin bilong i stap klin long ai bilong Jehova. (Sg 26:6; 73:13; Ai 1:16; Ese 16:9) Tok bilong Jehova i olsem wara inap mekim man i kamap klin long ai bilong em.—Ef 5:26.
it-2 372 par. 2
Sik Mun
Sapos wanpela meri i lusim blut inap planti de o “sapos sik mun bilong em i go yet na em i lusim blut inap sampela de moa,” em i doti. Na bet em i slip long en bai kamap doti na wanem samting em i sindaun long en bai kamap doti, na tu, sapos wanpela man o meri i tatsim ol dispela samting, em tu bai kamap doti. Taim blut bilong dispela meri i drai, orait em i mas wet inap 7-pela de na bihain em bai kamap klin. Long de namba 8, em i mas kisim 2-pela wel pisin balus o 2-pela yangpela pisin balus na bringim i go long pris. Na pris bai ofaim dispela 2-pela pisin long Jehova. Em bai ofaim wanpela pisin olsem ofa bilong tekewe sin na narapela pisin olsem ofa bilong paia i kukim olgeta, na pris bai mekim em i kamap klin long ai bilong Jehova long dispela sik bilong em.—Wk 15:19-30.
it-1 1133
Ples Holi
2. Haus sel bilong bung, na tempel. Olgeta samting bilong haus lotu sel na tempel, na tu, ples bung bilong haus lotu sel na bilong tempel, i ples holi. (Ki 38:24; 2St 29:5; Ap 21:28) Ol samting i stap long ples bung em, alta bilong mekim sakrifais na kopa dis. Dispela tupela samting i holi. Ol manmeri i mekim ol yet i kamap klin long ai bilong God, ol tasol inap go insait long ples bung bilong haus lotu sel; na i wankain tu long tempel, ol manmeri i stap klin long ai bilong God, ol tasol inap go insait long ples bung bilong tempel. Olsem, meri i stap doti i no ken tatsim wanpela samting i holi o go insait long ples holi. (Wk 12:2-4) Dispela i soim olsem taim lain Israel i stap doti long ai bilong God, dispela i mekim haus lotu sel i kamap doti. (Wk 15:31) Man em sik lepra bilong em i pinis na em laik kamap klin, em i mas bringim ofa bilong em i go inap long dua bilong ples bung. (Wk 14:11) Man i stap doti, em i no inap kaikai mit bilong sakrifais bilong kamap wanbel wantaim God long haus lotu sel o long tempel, sapos em i kaikai, ol i mas kilim em i dai.—Wk 7:20, 21.
Mekim Wok Painimaut
it-1 665 par. 5
Yau
Taim ol i makim Aron na ol pikinini man bilong em long mekim wok pris, God i tokim Moses long kisim liklik blut bilong sipsip na putim long yau long rait sait bilong Aron na bilong ol pikinini man bilong em, na tu, long rait han bilong ol na long rait lek bilong ol. Dispela i makim olsem tok ol i harim, wok ol i mekim, na pasin ol i bihainim i mas stret long ol samting i kamap long hap ol i wok long en. (Wk 8:22-24) Man i gat sik lepra na i laik kamap klin long ai bilong God, lo i tok, pris i mas mekim wankain pasin, em i mas kisim liklik hap blut bilong sipsip em ol i mekim ofa bilong mekim i dai asua, na em i mas kisim tu liklik oil, na putim long rait sait yau bilong dispela man. (Wk 14:14, 17, 25, 28) Ol i save bihainim dispela wankain pasin taim wanpela man i stap wokboi nating bilong narapela man na em i no laik lusim dispela bosman bilong em na em i laik stap oltaim wantaim em. Bosman bilong em bai kisim em i go sanap long pos bilong dua na bosman bai kisim wanpela nil na wokim hul long yau bilong wokboi. Dispela mak long yau bilong wokboi i makim olsem dispela wokboi i laik stap aninit yet long bosman bilong em na bihainim tok bilong em.—Ki 21:5, 6.
g 1/06 14, blok
Mosong—Gutpela Sait Bilong En na Sait Nogut Bilong En!
OLSEM WANEM? I GAT MOSONG LONG TAIM BILONG OL MAN I RAITIM BAIBEL?
Baibel i tok “wanpela samting nogut olsem lepra i kamap long wanpela haus,” dispela i makim olsem em i kamap insait long haus. (Wok Pris 14:34-48) Baibel i kolim dispela sik tu olsem “lepra nogut.” Ol man i ting dispela samting em wanpela kain mosong, tasol ol i no save sapos dispela i tru o nogat. Lo bilong God i tok ol man em haus bilong ol i gat dispela sik lepra, ol i mas rausim ol ston i gat dispela sik, sikirapim olgeta hap insait long haus, na kisim ol dispela samting i go ausait long taun na tromoi “long dispela ples we ol i save tromoi ol samting i no klin.” Sapos dispela sik i kamap gen long haus, ol bai tokaut olsem dispela haus i no klin na ol i mas brukim haus na rausim olgeta hap bilong en. Jehova i givim tok long olgeta liklik samting ol i mas bihainim, na dispela i soim pasin laikim bilong em long lain bilong em na em i tingim helt bilong ol.
Baibel Ritim
Disemba 28-Janueri 3
GUTPELA SAVE I KAM LONG BAIBEL | WOK PRIS 16–17
“De Bilong Karamapim Sin i Givim Wanem Skul Long Yumi”?
Skul Yumi Inap Kisim Long Buk Wok Pris
4 Ritim Wok Pris 16:12, 13. Piksaim long tingting samting i save kamap long De Bilong Karamapim Sin: Hetpris i go insait long haus lotu sel. Long dispela de, 3-pela taim em i save go insait long Rum Holi Tru. Long namba 1 taim, long wanpela han em i holim wanpela kontena i pulap long paura i gat gutpela smel, na long narapela han em i holim plet gol i pulap long sit bilong paia i lait yet. Em i stop liklik long keten i banisim Rum Holi Tru. Wantaim bikpela pasin rispek, em i save go insait long Rum Holi Tru na sanap long ai bilong Bokis Kontrak. I olsem em i sanap long ai bilong God Jehova! Orait nau, pris i save kapsaitim gut dispela paura holi long paia na rum i save pulap long switpela smel. Bihain em i save kisim blut bilong animal ol i ofaim na go insait gen long Rum Holi Tru. Em i kukim paura i gat gutpela smel paslain long em i ofaim blut bilong ofa bilong tekewe sin.
Skul Yumi Inap Kisim Long Buk Wok Pris
5 Yumi inap kisim wanem skul long pasin bilong yusim paura i gat gutpela smel long De Bilong Karamapim Sin? Baibel i tok ol beten bilong ol man i stap gut long lotuim Jehova i olsem smok i gat gutpela smel. (Sng. 141:2; Rev. 5:8) Tingim, hetpris i soim bikpela pasin rispek taim em i bringim paura i gat gutpela smel i go long ai bilong Jehova. Olsem tasol, taim yumi beten long Jehova, yumi mas soim bikpela pasin rispek. Yumi tenkyu tru olsem Krieta bilong yunives i larim yumi i go klostu long em, olsem pikinini i save go klostu long papa. (Jems 4:8) Em i amamas long yumi kamap pren bilong em! (Sng. 25:14) Dispela em gutpela blesing tru na yumi no ken mekim ol samting em i no orait long en.
Skul Yumi Inap Kisim Long Buk Wok Pris
6 Tingim, hetpris i kukim paura bilong kamapim smok i gat gutpela smel paslain long em i ofaim ol sakrifais. Em i mekim samting em God bai amamas long en, olsem na God bai orait long ol ofa em i givim. Dispela i givim wanem skul long yumi? Taim Jisas i stap long graun, paslain long em i givim laip bilong em olsem ofa, em i mekim wanpela bikpela samting—dispela samting i winim tru pasin bilong kisim bek ol man. Em i mekim wanem? Em i stap gut long Jehova na mekim stretpela pasin na bai God i orait long ofa bilong em. Long dispela rot, Jisas i soim klia olsem yumi bihainim stretpela pasin taim yumi mekim ol samting olsem Jehova i makim. Jisas i kamapim klia olsem i stret Papa bilong em i stap nambawan bos.
Mekim Wok Painimaut
it-1 226 par. 3
Asasel
Olsem aposel Pol i stori, Jisas i givim laip bilong em i gutpela olgeta olsem ofa long sin bilong ol manmeri, samting em i mekim i bikpela moa winim “blut bilong ol bulmakau man na meme.” (Hi 10:4, 11, 12) Em i stap olsem “wanpela meme i go lus nating,” long wanem, em i “karim ol sik bilong yumi,” na ‘long ol sin bilong yumi, ol i bin sutim em.’ (Ai 53:4, 5; Mt 8:17; 1Pi 2:24) Em i ‘karim i go’ ol sin bilong olgeta man i bilip long ofa bilong em. God i stretim dispela rot bilong rausim olgeta sin bilong ol man na em i no tingim moa. Olsem na meme bilong “Asasel” i stap olsem piksa na i makim sakrifais em Jisas Krais i givim.
Yumi Mas i Stap Holi
10 Ritim Wok Pris 17:10. Jehova i tokim lain Israel long ol i no ken “kaikai mit i gat blut i stap yet long en.” Ol Kristen tu i no ken kaikai mit i gat blut i stap long en o kisim blut bilong narapela man. (Apo. 15:28, 29) Yumi no laik tru bai God i ‘birua long yumi’ na rausim yumi long lain bilong em. Yumi laikim em na yumi laik bihainim tok bilong em. Maski bikpela hevi tru i laik painim yumi, yumi tingting strong olsem yumi no inap bihainim tok bilong ol man husat i no save long Jehova na ol i no laik bihainim tok bilong em. Yumi abrusim blut, olsem na ol man bai tok bilas long yumi, tasol yumi yet i laik bihainim tok bilong God. (Jut 17, 18) Yumi mas holim wanem kain tingting na dispela bai strongim yumi long “no ken kaikai abus wantaim blut bilong en” o kisim blut?—Lo 12:23.
Baibel Ritim