ROT BILONG LUSIM PASIN BILONG HEITIM NARAPELA

3 | Rausim Pasin Bilong Heitim Narapela Long Tingting

Tok Bilong Baibel:

“Yupela i mas kisim nupela tingting na bai pasin bilong yupela i senis. Olsem bai yupela i ken save tru long laik bilong God, em dispela laik em i gutpela, na em i orait, na i gutpela olgeta.”—ROM 12:2.

Mining Bilong En:

Ol samting yumi tingting long en i bikpela samting long God. (Jeremaia 17:10) Yumi no ken mekim tok o mekim samting we i soim olsem yumi heitim narapela, na i no dispela tasol, yumi mas mekim sampela samting moa. Pasin bilong heitim narapela i save kirap long tingting na bel bilong man. Olsem na yumi mas rausim pasin bilong heitim narapela i stap long tingting na bel bilong yumi. Long dispela rot, ‘pasin bilong yumi bai senis’ na yumi bai lusim pasin bilong heitim ol narapela.

Samting Yu Ken Mekim:

Skelim gut tingting na filings yu gat long ol narapela—moa yet ol man bilong narapela skin kala o lain. Askim yu yet: ‘Mi gat wanem tingting long ol? Mi save long ol olsem na mi gat kain tingting long ol? O mi bel nogut long ol bikos ol i bilong narapela lain?’ No ken lukim o ritim ol samting long Intenet, lukim ol muvi, o ol amamas we i stori long pasin bilong heitim narapela na pasin bilong pait na bagarapim man.

Tok Bilong God inap helpim yumi long daunim pasin bilong heitim narapela we i stap long tingting na bel bilong yumi

Em i no isi long skelim tingting na filings bilong yumi yet. Tasol Tok Bilong God inap helpim yumi long “kamapim klia tingting na laik i stap long bel” bilong yumi. (Hibru 4:12) So yumi mas wok yet long skelim tok bilong Baibel. Skelim tok bilong Baibel wantaim tingting bilong yu, na wok strong long kisim kain tingting we i stret wantaim tok bilong Baibel. Tok Bilong God inap helpim yumi long lusim pasin bilong heitim narapela we i stap “strong” long tingting na bel bilong yumi.—2 Korin 10:4, 5.

Ekspiriens—STEPHEN

Em i Senisim Tingting Bilong Em

Stephen na famili bilong em i kisim hevi long ol waitman i heitim ol. Bikos long dispela em i bihainim tingting bilong wanpela lain politik i strong long gavman i kamapim sampela senis. Bihain em na sampela pren bilong em i kirap birua long ol man bilong narapela lain. Stephen i tok: “Sampela taim mipela i save lukim ol piksa bilong lain Afrika long bipo, em lain Amerika i bringim ol i kam olsem sleiv. Ol i bin mekim nogut tru long dispela lain. Mipela i bel hevi tru long pasin ol i bin mekim long ol Afrika, olsem na mipela i paitim ol yangpela waitskin long haus piksa. Bihain, mipela i go long ol ples we i gat ol waitskin, na mipela i painim sampela man moa bilong paitim.”

Tingting bilong Stephen i senis taim Ol Witnes Bilong Jehova i kirap stadi wantaim em long Baibel. Em i tok: “Mi lukim olsem planti man i save bel nogut long ol man bilong narapela ples, tasol mi kirap nogut long pasin bilong ol Witnes. Olsem, wanpela taim wanpela waitskin Witnes i go long narapela kantri, na em i lusim ol pikinini bilong em wantaim wanpela blakskin famili. Na tu, wanpela famili waitskin i kisim wanpela yangpela blakskin i kam long haus bilong ol, long wanem, em i no gat ples slip.” Stephen i lukim olsem ol Witnes Bilong Jehova ol i olsem wanpela famili i gat pasin laikim, na dispela i helpim em long luksave olsem ol i inapim tok promis bilong Jisas olsem ol disaipel bilong em bai soim pasin laikim long narapela narapela.—Jon 13:35.

Wanem samting i helpim Stephen long lusim pasin bilong pait na heitim ol narapela? Tok bilong Rom 12:2 i helpim em. Em i tok: “Mi kisim save olsem mi mas senisim tingting kranki bilong mi. Mi mas kisim nupela tingting na bai mi ken stap bel isi, na mi luksave olsem dispela em gutpela rot bilong bihainim long i stap bilong mi.” Winim 40 yia nau Stephen i lusim pasin bilong heitim ol narapela na em i stap amamas.