Samting i Stret na i No Stret: Baibel Inap Helpim Yumi
Skelim 4-pela samting long laip we Baibel i helpim planti milion manmeri na yumi ken trastim tok bilong en.
1. Marit
Ol manmeri i gat narapela narapela tingting long marit na wanem samting i mekim na ol marit i ken i stap amamas.
BAIBEL I TOK: “Yupela olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong em.”—Efesus 5:33.
WANEM MINING BILONG SKRIPSA?: God em i as bilong marit, olsem na em i save long wanem samting inap mekim ol marit i stap amamas. (Mak 10:6-9) Ol marit inap i stap amamas sapos ol i no tingim laik bilong ol yet, tasol ol i tingim laik bilong poroman marit bilong ol. Maritman husat i laikim meri bilong em bai soim dispela long rot bilong lukautim na mekim gut long em. Na maritmeri i rispektim man bilong em bai soim dispela long rot bilong toktok na pasin bilong em.
TOK BILONG BAIBEL I HELPIM OL MAN: Quang na Thi bilong Vietnam, i pilim olsem ol i no stap amamas insait long marit bilong ol. Quang i no save mekim gutpela pasin long Thi. Em i tok: “Mi no save tingim filings bilong Thi na planti taim mi save semim em.” Thi i laik divos. Em i tok: “Mi pilim olsem mi no inap trastim o rispektim moa man bilong mi.”
Bihain, Quang na Thi i kisim save long tok bilong Baibel na ol i kisim save long hau ol i ken bihainim tok bilong Efesus 5:33 insait long marit bilong ol. Quang i tok: “Dispela ves i helpim mi long lukim olsem mi mas mekim gutpela pasin na mekim ol samting bilong soim Thi olsem mi laikim em na lukautim em long ol samting bilong skin, bel na tingting. Taim mi mekim olsem, em i laikim mi na rispektim mi moa.” Na Thi i tok, “Taim mi bihainim tok bilong Efesus 5:33 na soim rispek long man bilong mi, em i mekim ol samting bilong soim olsem em i laikim mi, na em i lukautim mi, na bel bilong mi i stap isi.”
Bilong kisim sampela tok moa bilong helpim ol marit, ritim Kirap! No. 2 bilong 2018, het tok “12-pela Rot Bilong Famili i Stap Amamas” long jw.org/tpi.
2. Pasin Yumi Mas Mekim Long Ol Narapela
Ol manmeri i save mekim nogut long ol narapela bikos long skin kala bilong ol, kantri, lukluk bilong ol, na lotu bilong ol.
BAIBEL I TOK: “Givim ona long olgeta kain man.”—1 Pita 2:17.
WANEM MINING BILONG SKRIPSA?: Baibel i no skulim yumi long heitim ol man bilong narapela skin kala, kantri, o ol gei, nogat. Baibel i kirapim yumi long soim rispek long olgeta manmeri, maski ol i gat wanem kain skin kala, kantri, ol i maniman, o ol i stap rabis. (Aposel 10:34) Maski yumi no wanbel long bilip bilong ol narapela o pasin ol i bihainim, yumi ken soim yet gutpela pasin na pasin rispek long ol.—Matyu 7:12.
TOK BILONG BAIBEL I HELPIM OL MAN: Daniel i kisim tingting olsem ol manmeri bilong Esia i laik bagarapim kantri bilong em. Em i heitim tru ol manmeri bilong Esia na planti taim em i mekim nogut long ol long ai bilong man. Daniel i tok: “Mi ting mi sapotim kantri bilong mi. Mi no tingim olsem tingting mi gat o pasin mi mekim i no stret.”
Bihain Daniel i kisim save long tok bilong Baibel. Daniel i tok: “Mi mas senisim tru tingting mi gat. Mi mas holim wankain tingting olsem God long ol man—olsem yumi olgeta i wankain maski yumi bilong wanem kantri.” Daniel i stori long tingting em i gat long nau taim em i bungim ol narapela manmeri. Em i tok: “Mi no save tingim tumas ol i bilong wanem hap. Nau mi laikim kain kain manmeri na mi gat ol gutpela pren long olgeta hap bilong graun.”
Bilong kisim sampela save moa, ritim Kirap! No. 3 bilong 2020, het tok “Pinisim Pasin Bilong Bel Nogut Long Narapela Lain” long jw.org/tpi.
3. Mani
Planti manmeri i traim long kamap maniman na bai ol i ken stap amamas na i gat gutpela sindaun long bihain.
BAIBEL I TOK: “Savetingting i save lukautim man, wankain olsem mani i save lukautim man, tasol gutpela samting long pasin bilong kisim save long samting i stret i olsem: Man i gat savetingting, dispela bai seivim laip bilong em.”—Eklisiastis 7:12.
WANEM MINING BILONG SKRIPSA?: Yumi nidim mani, tasol em i no inap mekim yumi stap amamas o yumi no inap i gat gutpela sindaun long bihain. (Provep 18:11; 23:4, 5) Bilong i stap amamas tru na i gat gutpela sindaun long bihain, yumi mas bihainim savetingting bilong God i stap long Baibel.—1 Timoti 6:17-19.
TOK BILONG BAIBEL I HELPIM OL MAN: Cardo wanpela man long Indonesia i wok strong long bungim planti mani kago. Em i tok: “Mi gat olgeta samting em ol manmeri i gat laik long kisim. Mi save raun long ol narapela hap na baim ol samting i gat bikpela pe, ol kar, na ol haus.” Tasol mani bilong em i no stap longpela taim. Cardo i tok: “Wanpela man i giamanim mi na kisim olgeta mani mi wok hat tru long bungim. Mi wok hat tru insait long planti yia bilong kamap maniman, tasol mi bel hevi bikos mi no gat mani na mi pilim olsem mi samting nating.”
Cardo i kirap bihainim ol tok i stap long Baibel long sait bilong mani. Em i no moa wok strong long bungim mani kago, em i wokim disisen long holim liklik samting tasol bilong skin. Em i tok: “Mi pilim olsem nau mi gat planti samting bikos mi pas gut wantaim God. Mi inap slip gut long olgeta nait, na mi amamas tru.”
Bilong kisim sampela save moa long Baibel i tok wanem long mani, ritim atikol “Yu Ting Skul na Mani i Makim Yu Bai Kisim Gutpela Sindaun Long Bihain?” long Wastaua No. 3 bilong 2021, long jw.org/tpi.
4. Maritpasin
Ol man i gat kain kain tingting long maritpasin.
BAIBEL I TOK: “Yupela i mas sakim pasin pamuk. Na yupela olgeta wan wan i mas save long rot bilong bosim bodi bilong yupela yet long pasin i holi na long pasin God i orait long en. Na i no long pasin bilong bel i kirap tru long slip wantaim narapela, olsem ol lain i no save long God i save mekim.”—1 Tesalonaika 4:3-5.
WANEM MINING BILONG SKRIPSA?: Baibel i stori long husat tasol inap mekim maritpasin. Dispela tok “pasin pamuk” i makim pasin adaltri, wok pamuk, wanpela i slip wantaim narapela i no poroman marit bilong em, man i slip wantaim man, o meri i slip wantaim meri, na man o meri i slip wantaim animal. (1 Korin 6:9, 10) Maritpasin em presen i kam long God na em i bilong man na meri marit tasol long mekim.—Provep 5:18, 19.
TOK BILONG BAIBEL I HELPIM OL MAN: Kylie wanpela meri long Australia i tok: “Taim mi singel, mi ting olsem sapos mi slip wantaim man, man bai laikim mi na em bai stap wantaim mi. Tasol dispela samting i no kamap. Mi pilim olsem man i no laikim mi na bel bilong mi i no stap isi.”
Bihain Kylie i kisim save long ol tok Baibel i mekim long maritpasin na em i bihainim dispela tok. Em i tok: “Mi luksave olsem ol lo bilong God i stap bilong pasim yumi long kisim pen na bel hevi. Mi mekim ol samting long pasin we Jehova i laik yumi mas mekim. Nau mi gat man bilong mi na em i laikim mi na mi save em i no inap lusim mi. Taim mi bihainim ol tok bilong Baibel, dispela i lukautim mi na mi no kisim bikpela bel hevi!”
Bilong kisim sampela save moa, ritim atikol “Baibel i Tok Wanem Long Man na Meri i Sindaun Nating Wantaim na i No Marit?” long jw.org/tpi.
Krieta bilong yumi i helpim yumi long save wanem samting i stret na i no stret. Em i no isi long bihainim tok bilong em long stretpela pasin, tasol dispela bai helpim yumi. Yumi ken bilip tru olsem tok bilong em bai helpim yumi inap longpela taim.