BEKIM OL ASKIM BILONG BAIBEL

Olsem wanem marit i ken stap gut?

Tok bilong Baibel bilong helpim ol marit long stap amamas i save wok gut, bikos ol dispela tok i kam long Man i kamapim marit, em God Jehova. Baibel i skulim yumi long kisim ol pasin we inap mekim marit i stap gut, na givim tok lukaut long ol pasin we inap bagarapim marit. Na tu, Baibel i skulim yumi long pasin bilong toktok gut wantaim we inap strongim pasin bilong amamas insait long marit.—Ritim Kolosi 3:8-10, 12-14.

Ol man marit na meri marit i mas givim ona na rispek long narapela narapela. Sapos tupela i mekim gut wok God i givim ol insait long marit, ol inap stap amamas.—Ritim Kolosi 3:18, 19.

Wanem samting i save helpim marit i stap longpela taim?

Ol marit inap stap gut wantaim sapos ol i laikim narapela narapela. God i skulim yumi long mekim pasin laikim. Em na Pikinini bilong em, Jisas, i stap gutpela piksa long pasin bilong daunim laik bilong ol yet na laikim ol narapela.—Ritim 1 Jon 4:7, 8, 19.

Taim man na meri i rispektim marit olsem samting God i kamapim, ol bai stap gut wantaim. God i wokim marit bilong i stap oltaim we man na meri i ken pas gut wantaim na bai famili i stap gut. Marit inap stap oltaim, long wanem, God i wokim man na meri bilong stap gutpela poroman tru long sait bilong bodi, na long bel na tingting. God i wokim ol man i kamap olsem em yet, na em i inapim ol long kamapim pasin laikim bilong em.—Ritim Stat 1:27; 2:18, 24.