God Inap Bel Hevi​—Olsem Wanem Yumi Inap Amamasim Em?

I gat wanpela taim yu bin bel hevi na yu krai?—a Dispela samting i save painim yumi olgeta. Tasol sampela taim yumi save bel hevi na krai. Ating sampela i mekim tok i nogutim yumi, na em ol tok i no tru. Dispela inap mekim yumi bel hevi, a?— God tu inap bel hevi taim ol man i mekim sampela tok long em we i no tru. Yumi ken stori long dispela, na olsem wanem yumi ken mekim God i amamas, na yumi no mekim em i bel hevi.

Baibel i tok sampela manmeri husat i tok ol i laikim God, ol i “mekim em i bel hevi.” Yes, God i pilim bel hevi! Yumi laik stori nau long as na Jehova i bel hevi taim yumi no bihainim tok bilong em.

Namba 1 man na meri Jehova i bin wokim i mekim em i bel hevi tru. God i putim tupela long Paradais long graun, em “gaden Iden.” Yu save long nem bilong tupela?— Yes. God i wokim Adam pastaim, na bihain em i wokim Iv. Yumi laik save hau ol i mekim Jehova i bel hevi.

Jehova i putim tupela long dispela gaden na tokim ol long lukautim. Em i tokim tupela long karim pikinini, na olgeta i ken stap wantaim long dispela gaden, na ol bai i no inap dai. Tasol paslain long tupela i gat pikinini, wanpela samting nogut i kamap. Yu save long dispela samting?— Wanpela ensel i bin kirapim Iv, na Adam tu, long bikhet long Jehova. Yumi ken stori long dispela samting.

Dispela ensel i mekim na i luk olsem wanpela snek i toktok. Iv i laikim tok em i harim—snek i tokim Iv olsem em inap kamap “wankain olsem God.” Iv i harim tok bilong snek. Yu save long samting Iv i mekim?—

Iv i kaikai prut bilong dispela diwai em Jehova i tokim Adam long ol i no ken kaikai. Paslain long God i wokim Iv, em i bin tokim Adam: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.”

Iv i save long dispela lo. Tasol em i wok long lukluk long dispela diwai, na em i lukim olsem “dispela diwai i naispela tru na i gat ol gutpela pikinini tru bilong kaikai i stap long en . . . Olsem na [em] i kisim pikinini bilong dispela diwai na i kaikai.” Bihain, em i givim dispela prut long Adam, na “[Adam] tu i kaikai.” Yu save long wai na Adam i mekim olsem?— Bikos Adam i laikim tru Iv, winim pasin bilong em long laikim Jehova. Em i laik amamasim Iv, na em i no tingting long amamasim Jehova. Em i bikpela samting moa long bihainim tok bilong Jehova, tok bilong ol narapela man, nogat!

Yu tingim dispela snek i toktok long Iv? Wanpela man inap makim maus bilong doli na i luk olsem doli i toktok, na long wankain pasin wanpela man i mekim na i luk olsem snek i toktok. Nek bilong husat i kamap long maus bilong snek?— Em nek bilong “dispela snek bilong bipo yet, ol i kolim em Devil na Satan.”

Yu save long hau yu ken mekim Jehova amamas?— Yu inap mekim olsem taim yu wok oltaim long traim long amamasim em. Satan i tok em i ken pulim olgeta manmeri long bihainim laik bilong em. Olsem na Jehova i tokim yumi: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Satan i save sutim tok na mekim tok bilas long Jehova. Em i tok em inap pulim olgeta manmeri long lusim Jehova. Olsem na mekim Jehova i amamas long rot bilong bihainim tok bilong em na lotu long em! Bai yu wok strong long mekim olsem?—