Strongim Pasin Bilong Yu Long Trastim Oganaisesen Bilong Jehova

1. Olsem wanem lain bilong Jehova i oganaisim ol wok bilong ol long taim bilong ol aposel?

TAIM Jehova i givim ol asainmen long lain bilong em, em i laik bai ol i mas oganaisim na mekim gut ol dispela asainmen. (1 Kor. 14:33) Olsem, em laik bilong God long yumi mas autim gutnius long olgeta hap bilong graun. (Mat. 24:14) Jehova i makim Jisas long bosim dispela wok. Na Jisas i stiaim ol samting bambai ol manmeri bilong God i ken mekim gut dispela wok. Long taim bilong ol aposel, taim ol i kamapim ol nupela kongrigesen long planti ples, ol i makim ol hetman long givim daireksen na i go pas long mekim ol wok. (Apo. 14:23) Long Jerusalem, i gat wanpela lain elda em ol aposel na ol hetman i insait long en, na ol i mekim ol disisen em olgeta kongrigesen i mas bihainim. (Apo. 15:2; 16:4) Ol Kristen long dispela taim i bihainim ol tok ol i kisim, olsem na “ol kongrigesen i kamap strong moa long bilip, na long olgeta de ol i wok long i go bikpela.”—Apo. 16:5.

2. Kirap long 1919 na i kam, long wanem rot Jehova i stiaim yumi na givim yumi kaikai bilong strongim bilip?

² Long nau, Jehova i wok yet long oganaisim lain bilong em. Kirap long 1919 na i kam, aninit long daireksen i kam long Jehova, Jisas i makim liklik lain brata namel long ol Kristen God i bin makim bilong oganaisim wok bilong autim tok na givim kaikai bilong strongim bilip long ol disaipel bilong em.a (Luk 12:42) I klia tru olsem Jehova i blesim wok em dispela lain i mekim.—Ais. 60:22; 65:​13, 14.

3-4. (a) Wanem gutpela samting i kamap taim yumi oganaisim gut ol samting? Stori long wanpela eksampel. (b) Yumi bai stori long wanem samting long dispela atikol?

³ Sapos yumi no oganaisim gut ol samting, yumi no inap mekim gut dispela wok em Jisas i givim yumi long mekim. (Mat. 28:​19, 20) Olsem, sapos ol brata i no oganaisim gut ol teritori bilong autim tok, orait ol pablisa yet bai makim wanem ol ples ol i laik go autim tok long en. Ating ol pablisa bai autim tok long sampela teritori inap planti taim, na sampela ples bai i no gat pablisa i autim tok long en. Yu inap tingim ol narapela gutpela samting i kamap taim yumi oganaisim gut ol samting?

⁴ Taim Jisas i stap long graun, em i oganaisim gut ol disaipel bilong em long mekim wok. Olsem tasol, em i wok yet long oganaisim gut ol wok bilong yumi long nau tu. Long dispela atikol, yumi bai stori long ol samting Jisas i mekim na olsem wanem oganaisesen bilong yumi i bihainim eksampel bilong em. Na tu, yumi bai stori long rot yumi ken soim olsem yumi trastim oganaisesen bilong Jehova.

OGANAISESEN BILONG YUMI I BIHAINIM EKSAMPEL BILONG JISAS

5. Long wanem rot oganaisesen i bihainim eksampel bilong Jisas? (Jon 8:28)

⁵ Jisas i kisim skul long Papa bilong em long heven long wanem tok na wanem samting em bai mekim. Oganaisesen bilong Jehova i bihainim eksampel bilong Jisas taim ol i yusim Tok Bilong God long stiaim yumi na skulim yumi long ol lo bilong stretpela pasin. (Ritim Jon 8:28; 2 Tim. 3:​16, 17) Planti taim yumi save kisim ol tok bilong kirapim yumi long ritim Baibel na bihainim ol tok bilong en. Yumi inap kisim wanem helpim taim yumi mekim olsem?

6. Yumi kisim wanem gutpela helpim taim yumi stadi long Baibel?

⁶ Yumi kisim gutpela helpim taim yumi yusim ol pablikesen bilong yumi long stadi long Baibel. Olsem, yumi inap skelim ol tok Baibel i mekim wantaim daireksen i kam long oganaisesen. Taim yumi luksave olsem Baibel i as bilong ol stiatok yumi kisim long oganaisesen bilong Jehova, dispela bai strongim pasin bilong yumi long trastim dispela oganaisesen.—Rom 12:2.

7. Jisas i bin autim wanem bikpela tok, na olsem wanem oganaisesen bilong Jehova i bihainim eksampel bilong em?

⁷ Jisas i autim “gutnius bilong Kingdom Bilong God.” (Luk 4:​43, 44) Na tu, Jisas i tokim ol disaipel bilong em long ol i mas autim tok bilong Kingdom. (Luk 9:​1, 2; 10:​8, 9) Long nau, olgeta insait long oganaisesen bilong Jehova i save autim gutnius bilong Kingdom, maski ol i stap long wanem ples o ol i mekim wanem wok insait long oganaisesen.

8. Yumi kisim wanem wok i nambawan tru?

⁸ Yumi amamas long mekim dispela wok i nambawan tru, em long autim gutnius bilong Kingdom Bilong God long ol manmeri! I no olgeta manmeri inap mekim dispela gutpela wok. Olsem, taim Jisas i stap long graun, em i no orait long ol spirit nogut i tokaut long em i husat. (Luk 4:41) Long nau, paslain long wanpela i insait long wok autim tok wantaim lain bilong Jehova, em i mas winim ol mak bilong mekim dispela wok. Yumi soim olsem yumi amamas long mekim wok autim tok long rot bilong autim tok long olgeta kain taim na ples. Olsem Jisas, wok bilong yumi em long planim ol sid bilong tok i tru bilong Kingdom long bel bilong ol man na givim wara long en.—Mat. 13:​3, 23; 1 Kor. 3:6.

9. Long wanem rot oganaisesen i kamapim nem bilong God long ol man?

⁹ Jisas i kamapim nem bilong God long ol man. Long beten Jisas i mekim long Papa bilong em long heven, em i tok: “Mi bin kamapim nem bilong yu long ol.” (Jon 17:26) Oganaisesen bilong Jehova i bihainim eksampel bilong Jisas long mekim olgeta samting bilong helpim ol narapela long kisim save long nem bilong God. Baibel Nupela Taim Trenslesen Bilong Ol Skripsa Holi i mekim bikpela wok long putim bek nem bilong God long ol ples stret bilong en. Ol i bin tanim dispela Baibel olgeta o sampela hap bilong en long winim 270 tokples. Long Apendiks A4 na A5 bilong dispela Baibel, yu bai kisim sampela save moa long risen na ol i putim bek nem bilong God long Baibel. Apendiks C i stap long Study Bible i kamapim planti evidens i soim olsem nem bilong God i mas stap long Ol Skripsa Grik inap 237 taim.

10. Yu kisim wanem skul long tok bilong wanpela meri i stap long Mianma?

¹⁰ Olsem Jisas, yumi laik helpim planti manmeri moa long kisim save long nem bilong God. Taim wanpela meri long Mianma husat i gat 67 krismas i kisim save olsem God i gat nem, em i krai na em i tokim Baibel tisa bilong em olsem: “Dispela em fes taim long laip bilong mi long harim olsem nem bilong God em Jehova. . . . Yu skulim mi long nambawan bikpela samting em mi mas save long en.” Dispela ekspiriens i soim olsem taim ol manmeri i gat gutpela bel i kisim save long nem bilong God, dispela inap mekim bikpela samting tru long laip bilong ol.

WOK YET LONG TRASTIM OGANAISESEN BILONG YUMI

11. Long wanem rot ol elda i ken soim olsem ol i trastim oganaisesen bilong Jehova? (Lukim tu piksa.)

¹¹ Wanem wanpela rot ol elda i ken soim olsem ol i trastim oganaisesen bilong God? Taim ol i kisim daireksen i kam long oganaisesen, ol i mas ritim gut na bihainim gut olgeta dispela tok ol i kisim bilong stiaim ol. Olsem, ol i save kisim ol stiatok long hau ol i mas lukautim ol hap bilong miting, hau long mekim beten bilong kongrigesen, na tu, pasin ol i mas bihainim bilong lukautim ol sipsip bilong Krais. Taim ol elda i bihainim gut daireksen i kam long oganaisesen, ol i helpim ol bratasista long save olsem Jehova i laikim ol na em i tingim tru ol.

12. (a) Bilong wanem yumi mas wok gut wantaim ol man i go pas long yumi? (Hibru 13:​7, 17) (b) Bilong wanem yumi mas tingim ol gutpela pasin bilong ol?

¹² Taim yumi kisim daireksen i kam long ol elda, yumi mas redi long bihainim dispela daireksen. Taim yumi mekim olsem, em i isi moa long ol brata i go pas long yumi long mekim gut wok bilong ol. Baibel i strongim yumi long bihainim tok na stap aninit long ol man i go pas long mekim ol wok. (Ritim Hibru 13:​7, 17.) Sampela taim i hatwok long mekim olsem. Bilong wanem? Long wanem, ol dispela brata i no gutpela olgeta. Tasol sapos oltaim yumi tingim ol pasin kranki bilong ol na i no ol gutpela pasin bilong ol, i olsem yumi wok long sapotim ol birua bilong yumi. Wai na yumi tok olsem? Ol birua i laik kirapim yumi long holim tupela tingting long oganaisesen bilong God, so sapos yumi holim tingting kranki long ol elda, dispela inap daunim pasin bilong yumi long trastim oganaisesen. Yumi mas mekim wanem samting bilong luksave na sakim ol stori giaman em ol birua bilong yumi i kamapim?

NO KEN LARIM OL NARAPELA I DAUNIM PASIN BILONG YU LONG TRASTIM OGANAISESEN

13. Long wanem rot ol birua bilong God i traim long krungutim gutnem bilong oganaisesen bilong em?

¹³ Ol birua bilong God i traim long kirapim yumi long kisim tingting kranki long ol gutpela samting oganaisesen i mekim. Olsem, long rot bilong Baibel yumi kisim save olsem Jehova i laik bai ol man i lotuim em i mas stap klin long bodi, bihainim ol stretpela pasin, na lotuim God long pasin em i orait long en. God i tok sapos wanpela i mekim sin na em i no tanim bel na lusim pasin nogut em i mekim, orait ol i mas rausim em long kongrigesen. (1 Kor. 5:​11-13; 6:​9, 10) Yumi bihainim dispela tok bilong em i stap long Baibel. Tasol taim yumi mekim olsem, ol birua bilong yumi i sutim tok long yumi olsem yumi no gat pasin laikim, yumi gat hatpela pasin, na yumi no orait long olgeta kain man.

14. Husat em i as bilong ol stori giaman ol man i mekim long oganaisesen?

¹⁴ Luksave long husat em i as bilong ol tok giaman ol man i sutim long oganaisesen. Satan em i as bilong ol stori giaman ol man i mekim long yumi. Em i “papa bilong pasin giaman.” (Jon 8:44; Stt. 3:​1-5) Olsem na yumi save pinis olsem Satan bai yusim ol birua bilong yumi long mekim ol stori giaman long oganaisesen bilong Jehova. Dispela samting i bin kamap long taim bilong ol aposel.

15. Ol hetman bilong lotu i mekim wanem long Jisas na ol disaipel bilong em?

¹⁵ Long taim bilong Jisas na long taim bilong ol aposel, ol man i stap long sait bilong Satan i mekim planti tok giaman long Pikinini Bilong God, em man i gutpela olgeta na em i bin wokim planti mirakel. Olsem, ol hetman bilong lotu i tokim ol manmeri olsem Jisas i rausim ol spirit nogut long strong bilong “hetman bilong ol spirit nogut.” (Mak 3:22) Taim Jisas i sanap long kot, ol bikman bilong lotu i sutim tok long em olsem em i tok bilas long God na ol i kirapim bikpela lain manmeri long singaut olsem kilim Jisas i dai. (Mat. 27:20) Bihain, taim ol disaipel bilong Krais i autim gutnius, ol birua bilong ol i “kirapim ol manmeri . . . long kisim tingting nogut” long ol dispela Kristen na mekim nogut long ol. (Apo. 14:​2, 19) Wastaua bilong Disemba 1, 1998 i stori long tok bilong Aposel 14:2 olsem: “Ol Juda i no bilip ol i sakim tok [Pol na Barnabas] i autim, tasol i no dispela samting tasol ol i mekim—ol i kirap na sutim ol tok giaman long ol Kristen na bai ol man bilong ol narapela lain i bel nogut long ol.”

16. Yumi mas tingim wanem samting taim yumi harim ol stori giaman?

¹⁶ Satan i bin giamanim ol Kristen long taim bilong ol aposel na em i mekim olsem long nau tu. Em i wok yet long “giamanim olgeta manmeri bilong graun.” (Rev. 12:9) Sapos yu harim ol stori giaman ol man i mekim long oganaisesen o long ol brata i go pas long mekim ol wok, tingim ol samting ol birua bilong God i bin mekim long Jisas na ol disaipel long taim bilong ol aposel. Long nau, ol man i sutim ol tok giaman na mekim nogut long lain bilong Jehova olsem Baibel i bin tok profet long en. (Mat. 5:​11, 12) Tasol yumi no inap bilipim ol stori giaman sapos yumi luksave long husat tru i as bilong ol dispela stori na kwiktaim yumi mekim ol samting bilong lukautim yumi yet. Yumi mas mekim wanem bilong lukautim yumi yet?

17. Yumi ken mekim wanem na bai yumi no larim ol stori giaman i bagarapim bilip bilong yumi? (2 Timoti 1:13) (Lukim tu blok “Samting Yu Ken Mekim Taim Yu Harim Ol Stori Giaman.”)

¹⁷ Sakim ol stori giaman. Aposel Pol i tokaut klia long samting yumi mas mekim sapos yumi harim ol stori giaman. Em i tokim Timoti long “tokim sampela man long ol i no ken . . . putim yau long ol giaman stori” na ol i mas “sakim ol giaman stori.” (1 Tim. 1:​3, 4; 4:7) Tingim dispela, wanpela liklik bebi inap kisim samting i doti i stap long floa na putim long maus bilong em, tasol man i bikpela pinis i no inap tru long mekim olsem bikos em i save dispela inap kamapim hevi long em yet. Olsem tasol, yumi sakim ol stori giaman bikos yumi save olsem Satan em i as bilong ol dispela stori. Na yumi wok strong long bihainim yet “ol gutpela tok” bilong tok i tru.—Ritim 2 Timoti 1:13.

18. Olsem wanem yumi inap soim olsem yumi trastim oganaisesen bilong Jehova?

¹⁸ I gat planti rot oganaisesen bilong God i bihainim eksampel bilong Jisas, tasol yumi bin stori long 3-pela rot tasol. Taim yu stadi long Baibel, traim long luksave long ol narapela rot em oganaisesen i bihainim eksampel bilong Jisas. Helpim ol narapela long kongrigesen bilong yu long strongim pasin bilong ol long trastim oganaisesen. Na wok yet long soim olsem yu trastim dispela oganaisesen long rot bilong stap gut long Jehova na mekim yet wok bilong em na pas gut wantaim oganaisesen em i yusim bilong mekim laik bilong em. (Sng. 37:28) Yumi olgeta i ken amamas yet long dispela gutpela blesing yumi kisim bilong stap namel long lain bilong Jehova em ol i laikim narapela narapela na ol i stap gut long God.