Ol Witnes Bilong Jehova i Bilip Long Jisas?

Yes. Mipela i bilip long Jisas, na em i bin tok: “Mi yet mi rot na tok i tru na laip. I no gat man inap kam long Papa long narapela rot, nogat, long rot bilong mi tasol.” (Jon 14:6) Mipela i bilip olsem Jisas i bin lusim heven na i kam daun long graun, na em i givim laip bilong em i gutpela olgeta olsem sakrifais bilong baim bek ol manmeri. (Matyu 20:28) Em i bin dai na kirap bek, na dispela i opim rot na ol man husat i bilip long em, ol inap kisim laip oltaim. (Jon 3:16) Na tu, mipela i bilip olsem Jisas i stap King long Kingdom Bilong God long heven, na klostu nau dispela Kingdom bai kamapim bel isi long graun. (Revelesen 11:15) Tasol mipela i bilipim dispela tok bilong Jisas: “Papa i winim mi.” (Jon 14:28) Olsem na mipela i no lotuim Jisas bikos mipela i no bilip olsem Jisas em i God i Gat Olgeta Strong.