ASKIM BILONG OL YANGPELA
Hau Bai Mi Inap Makim Gutpela Eksampel Long Bihainim?
“Taim mi bungim ol hevi long skul, mi tingim wanpela em mi laikim husat i bin karim wankain hevi na dispela i helpim mi. Nau mi laik bihainim eksampel bilong em. Taim i gat gutpela eksampel long bihainim dispela bai helpim yu long karim ol bikpela hevi.”—Haley.
Wanpela gutpela eksampel yu makim long bihainim inap helpim yu long abrusim ol hevi na winim ol mak yu putim. Olsem na gutpela eksampel i bikpela samting.
Wai na yu mas makim gut?
Lain yu makim long bihainim eksampel bilong ol bai stiaim toktok na pasin bilong yu.
Baibel i tok long ol Kristen i mas luksave long lain i stap gutpela eksampel, em i tok: “Tingting long ol gutpela samting i kamap long pasin ol i bihainim, na yupela i mas bihainim pasin bilong ol long bilip.”—Hibru 13:7.
Rot: Bikos ol lain yu makim long bihainim bai stiaim yu long mekim gutpela disisen o disisen nogut, makim lain husat i gat ol gutpela pasin, na i no lain em planti i save long ol o ol i gat krismas klostu i wankain long yu.
“Mi kisim skul long planti samting long wanbilip Kristen em nem bilong em Adam—long toktok na pasin na olgeta narapela samting em i mekim. Em nais tru olsem mi inap tingim stret ol samting em i toktok long en na samting em i mekim. Em i no luksave olsem dispela i helpim mi.”—Colin.
Lain yu makim long bihainim eksampel bilong ol bai stiaim tingting na filings bilong yu.
Baibel i tok: “Yupela i no ken larim ol arapela i giamanim yupela. Ol poroman nogut i save bagarapim ol gutpela pasin bilong man.”—1 Korin 15:33.
Rot: Makim wanpela husat i gat ol gutpela pasin, na i no wanpela husat i gat gutpela lukluk. Sapos yu no makim gut, yu yet bai bel hevi.
“Yu inap pilim olsem yu samting nating na yu no luk nais sapos olgeta taim yu skelim yu yet wantaim ol manmeri husat i gat gutpela lukluk na planti i laikim ol. Dispela inap mekim na yu tingim tumas lukluk bilong yu.”—Tamara.
Samting bilong tingim: Wanem ol hevi bai kamap long pasin bilong makim ol ekta, singa, na lain i insait long spot olsem eksampel yu laik bihainim?
Lain yu makim long bihainim eksampel bilong ol inap stiaim ol mak yu laik winim.
Baibel i tok: “Man i wokabaut wantaim ol man i gat savetingting, em bai gat savetingting.”—Provep 13:20.
Rot: Makim ol lain em yu laik bihainim eksampel bilong ol husat i gat ol gutpela ol pasin em yu tu i laik kamapim. Taim yu tingim ol dispela pasin, yu inap luksave long sampela rot em yu ken bihainim long winim mak yu putim.
“Kolim stret mak yu laik winim, yu ken tok, ‘Mi laik lain long mekim gut wok olsem Jane,’ na no ken putim mak we i no klia olsem, ‘Mi laik lain long mekim gut wok.’ Em i save kam long taim stret na mekim gut ol asainmen bilong em.’ ”—Miriam.
Poin em olsem: Taim yu makim wanpela gutpela eksampel em yu laik bihainim, dispela bai helpim yu long makim olsem yu laik kamap wanem kain man.
Taim yu bihainim wanpela gutpela eksampel, yu inap hariap long winim ol mak yu putim!
Hau bai yu inap makim
Yu inap makim eksampel yu laik bihainim long rot bilong makim wanpela bilong dispela tupela samting.
Yu ken makim wanpela pasin yu laik kisim na painim wanpela yu laikim husat i gat dispela pasin.
Yu ken makim wanpela em yu laikim na makim wanpela pasin em i save soim we yu tu i laik kisim.
Woksit i kam wantaim dispela atikol i ken helpim yu long mekim olsem.
Ol lain em yu laik bihainim eksampel bilong ol inap makim:
Ol wanlain. “Mi laik kamap olsem bes pren bilong mi. Em i bisi, tasol em i gat taim long helpim ol narapela. Em yangpela moa long mi, tasol mi lukim ol gutpela pasin bilong em we mi nogat, na dispela i mekim na mi laik bihainim eksampel bilong em.”—Miriam.
Ol bikpela manmeri. Dispela inap makim papamama o ol wanbilip bilong yu. “Tru tumas, papamama bilong mi i gutpela eksampel bilong mi. Ol i gat ol gutpela pasin. Mi lukim ol popaia bilong ol, tasol mi lukim tu olsem ol i wok strong long mekim ol gutpela pasin. Taim mi go kamap wankain krismas olsem ol, mi laik bai ol narapela i holim wankain tingting long mi.”—Annette.
Ol manmeri long Baibel. “Mi makim sampela lain long Baibel em mi laik bihainim eksampel bilong ol—Timoti, Rut, Jop, Pita, liklik meri Israel—olgeta wanwan bikos i gat narapela narapela risen. Taim mi kisim sampela skul moa long ol manmeri long Baibel, nau mi save gut long ol. Mi amamas tru long ritim ol stori long buk Bihainim Bilip Bilong Ol, na tu long ‘Role Model Index’ i stap long tupela volium bilong buk Questions Young People Ask—Answers That Work.”—Melinda.
Rot: No ken bihainim tasol wanpela eksampel. Aposel Pol i tokim ol wanbilip Kristen: “Yupela i mas lukim gut pasin bilong ol lain husat i wok long bihainim pasin bilong mipela.”—Filipai 3:17.
Yu save long dispela? Yu ken stap olsem eksampel bilong wanpela! Baibel i tok: “Yu mas i stap olsem gutpela eksampel long ol bilipman long pasin bilong yu long toktok, long wokabaut, long pasin laikim, long bilip, na long pasin i klin.”—1 Timoti 4:12.
“Yu ken wok yet long kisim ol gutpela pasin na long wankain taim helpim ol narapela long mekim olsem tu. Yu no inap save husat i wok long lukluk long yu, na yu no save hau tok bilong yu inap senisim laip bilong wanpela.”—Kiana.