Kirapim Ol Long Bihainim Em
1 Long 1 Korin 3:6, Pol i tok: “Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap.” Pol i mekim dispela tok bilong helpim ol brata bilong em long save, ol i mas wok gut wantaim aninit long wok bos bilong Krais. Na tu, long dispela rot em i helpim ol long pilim tru olsem, taim ol i mekim wok bilong planim samting na givim wara long en, ol i mekim bikpela wok tru.
2 Dispela wok bilong helpim ol man long abrusim bagarap na i stap laip, em bai pinis long taim bilong yumi. Yumi ol Kristen i dediket pinis, yumi gat bikpela wok bilong helpim ol narapela long kamap disaipel bilong Jisas. (Ap 13:48) Sapos yu bin kirapim tingting bilong wanpela man long rot bilong buk Nambawan Man Tru i Winim Olgeta Narapela Man, na em i amamas long harim tok, orait taim yu go bek lukim em, bai yu helpim em olsem wanem?
3 Taim yu go bek lukim man i kisim dispela buk, yu ken mekim tok olsem:
◼ “Taim mi bin kam lukim yu, yumi stori long Krais Jisas em i wanem kain man taim em i stap long graun. Na mi amamas yu bin kisim dispela buk, em Nambawan Man Tru i Winim Olgeta Narapela Man. Yu laikim wanem ol tok Jisas i bin lainim ol man long en, na yu laikim wanem pasin bilong em?” Larim em i bekim tok. Orait nau opim buk long sapta 113, na stori long gutpela pasin daun Jisas i mekim bilong ol narapela i ken bihainim. Kaunim Filipai 2:8, em i kamapim tingting bilong aposel Pol long pasin daun Jisas i mekim. Orait nau yu ken stori, sapos long olgeta wik em i stadi long Baibel, bai em i kisim sampela save moa.
4 O yu ken kirapim tok, olsem:
◼ “Yumi bin toktok long ol samting Jisas i mekim taim em i stap long graun na dispela i kamapim klia olsem em i tingim tru yumi. Yu ting em bai mekim wanem bilong helpim ol man i bin kisim bikpela pen na hevi?” Larim em i bekim tok. Opim buk long sapta 133, na stori long ol tok bilong paragraf 5. Opim wanpela pes moa na lukim piksa, na stori long sindaun bilong yumi taim God i kamapim laik bilong em long graun olsem em i kamapim long heven. Helpim em long save, sapos em i kisim sampela save moa, dispela inap helpim em.
5 Sapos em i no kisim buk samting taim yu autim tok long em long namba wan taim, ating yu ken kirapim tok olsem:
◼ “Ating yumitupela wantaim i save, long nau planti man i save bihainim pasin bilong wanpela man em i stap olsem gutpela piksa bilong ol. Krais Jisas i stap olsem nambawan gutpela piksa bilong ol man i ken bihainim pasin bilong em. Mi laik tokim yu long wanpela bikpela samting em gutpela pasin bilong Jisas i bin lainim mi long mekim. [Opim buk Nambawan Man Tru long sapta 40, na stori long pasin marimari Jisas i lainim ol man long mekim.] Dispela i helpim mi long save, mi tu mas mekim dispela pasin long ol narapela.” Kaunim Matyu 5:7. Sapos nau em i gat laik long harim tok, orait tilim dispela buk, o tilim buklet Tru God i Save Tingim Yumi?
6 O yu ken mekim tok olsem:
◼ “Taim mi bin kam lukim yu, yumi bin toktok olsem em bikpela samting long yumi mas kisim save long Jisas. Jon 17:3 i tok, sapos man i laik kisim ‘laip i stap gut oltaim,’ em i mas kisim dispela save. Olsem wanem yumi inap kisim dispela save?” Larim em i bekim tok. Orait nau tokim em, yumi save stadi wantaim ol man long Baibel, na stori olsem wanem em tu i ken insait long dispela samting.
7 Pol i tok, man i mekim wok bilong kisim kaikai, “bai i kisim pe inap long wok [em] i bin mekim.” (1 Ko 3:8) Sapos yumi wok strong long helpim ol narapela long kamap disaipel bilong Jisas, bai yumi kisim bikpela pe tru.
This article is repeated in km 12/99.