Mekim Ol Samting i Helpim Ol Bratasista na Lukautim Planet

Olsem ol Witnes Bilong Jehova, yumi save olsem klostu nau Jehova God bai mekim ol samting bilong seivim planet long ol samting ol man i mekim long bagarapim. (Revelesen 11:18) Tasol yumi yet tu inap ken mekim ol samting bilong lukautim planet. Olsem, yumi bin disainim ol bilding long wei we i no inap bagarapim win, wara, na ol diwai samting.

Ol dispela kain projek i kamap long pasin we inap daunim bagarap long graun. Yumi bin mekim wanem ol projek long dispela kain wei? Na hau dispela i helpim yumi long yusim gut ol donesen?

Wanpela Rot Bilong Mekim Haus Kibung i Stap Kol

Pastaim, ol i bin wokim Matola Haus Kibung long Mosambik wantaim metal rup na i no gat wol long sait sait bilong en. Dispela rup i save kisim planti hat bilong san i go insait long haus kibung, na mekim ples i hot tru. Wanpela brata long dispela hap, i tok: “Dispela i save mekim mipela i tuhat! Olsem na long pinis bilong program, ol bratasista i save hariap long go ausait long kisim fres win na bai ol i kol liklik.” Hau bai yumi helpim ol bratasista long wokim gutpela ples bung we ol inap go bilong kisim skul long en?

Mipela i mekim disisen long wokim wanpela projek, tasol em bai no kamapim hevi long graun: putim ol fen we win bai mekim em i tanim, wantaim ol insuleta. Ol insuleta i daunim strong bilong san we i go insait long bilding, na ol fen bai kamapim fres win. Ol dispela fen i no nidim pawa tasol ol i yusim strong bilong win na tanim bilong rausim hatpela win insait long ples bung. Wan wan bilong ol dispela fen em inap olsem $50.a

Dispela projek i mekim na i gat fres win insait long haus kibung. Bikos i gat fres win, i no gat hatpela win na mak bilong moul insait long dispela bilding. Na tu, i gat liklik ron bilong kabon daioksait na bikpela oksijen. Olsem na nau ol lain i kam long bung i save sindaun gut na putim yau. Brata em yumi kamapim tok bilong em long pastaim, i tok: “Nau taim program i pinis mipela i no save hariap long go ausait olsem long bipo. Long belo, mipela i save stap insait long ples bung, na stori wantaim ol pren. Taim mipela i sindaun aninit long nupela rup, i olsem mipela i sindaun aninit long wanpela naispela bikpela diwai!”

Kisim Strong Long San

Mipela i putim photovoltaic (PV) sistem long planti bilding bilong yumi long olgeta hap bilong graun. Ol dispela sistem i yusim ol sola panel long kisim lait bilong san—em yet inap kamapim nupela strong—tanim i kamap elektrisiti. Olsem na gutpela samting i kamap, mipela i no yusim tumas elektrisiti em ol samting olsem oil, gas, na kol, em ol samting we i save kamapim planti polusen. PV sistem i kamapim liklik polusen tasol na dispela i helpim mipela long seivim sampela donesen.

Long 2023, ol i putim wanpela PV sistem long Slovenia brens ofis. Em i saplaim 30 pesen bilong pawa we bilding i nidim. Na sapos sampela taim em i kamapim planti pawa tumas winim skel em i nidim, orait ol asples lain long dispela komiuniti i ken yusim. Dispela PV sistem em inap olsem $360,000. Maski i olsem, bikos nau brens i baim elektrisiti long liklik mani, insait long 4-pela yia ol i kisim mani ol i yusim long mekim dispela sistem.

Long 2024, mipela i putim PV panel na wanpela bikpela bateri long Sri Lanka brens ofis. Dispela projek em inap olsem $3 milion, na dispela sistem i saplaim 70 pesen bilong elektrisiti em brens i nidim. Insait long 3-pela yia mipela bai seivim planti mani moa winim mani mipela i yusim long baim ol panel. Long dispela seim yia, mipela i putim tu wanpela PV sistem long Netelan brens ofis. Dispela sistem em inap olsem $1.1 milion na em i saplaim 35 pesen bilong elektrisiti long brens. Insait long 9-pela yia mipela inap seivim gen mani mipela i yusim long baim dispela sistem.

Mipela i putim tu ol PV sistem long sampela rimot trenslesen ofis (RTO) long Meksiko. Yumi laik stori long wanpela eksampel : Tarahumara (Sentral) RTO i stap long Chihuahua. Long taim bilong winta, ples i save kol nogut tru na tempresa i stap aninit long 0 digri Selsias, na long taim bilong bikpela san, hat bilong en i winim 40 digri Selsias! Maski i olsem, bikos long bikpela pe bilong elektrisiti, ol brata i no save yusim hat na kol sistem. Jonathan, em wanpela brata husat i save wok long RTO, i tok: “Mipela i save yusim blanket na ol strongpela klos long taim bilong winta na opim ol windo long taim bilong bikpela san.”

Long 2024, ol i putim wanpela PV sistem long RTO. Dispela sistem em inap olsem $21,480, tasol insait long 5-pela yia mani ol i seivim bai inap long baim dispela sistem. Nau ol brata bilong yumi i ken yusim hat na kol sistem inap planti taim. Jonathan i tok: “Mipela i amamas moa long asainmen bilong mipela, na mipela inap mekim planti wok. Na long wankain taim, mipela i amamas olsem mipela i yusim gut mani bilong oganaisesen long ol RTO na long pasin we i no bagarapim win, wara, na ol diwai samting.”

Kisim Ren Wara

Long Afrika, sampela Haus Kingdom i no gat rot bilong kisim gutpela wara. Olsem na, ol brata i mas karim wara sampela kilomita i go long Haus Kingdom bilong ol. Long ol narapela Haus Kingdom, ol brata i save baim wara na kar i save bringim i kam, tasol em bikpela pe na i save kamapim bagarap long wara, na ol diwai samting.

Long ol bratasista bilong yumi i ken kisim wara, mipela i putim ol gata long rup na ol bikpela tenk long planti Haus Kingdom long Afrika. Paslain long mipela i putim ol dispela samting, ol brata i skelim gut klaimet bilong dispela ples na disainim sistem we inap wok gut long Haus Kingdom. Taim mipela i putim ol dispela samting long Haus Kingdom, pe bilong em bai stap namel long $600 na $3,000. Maski i olsem, planti taim pe bilong en i aninit long mani Haus Kingdom i save yusim long baim ol samting, bikos ol brata i no gat wok moa long baim wara.

Dispela sistem bilong ren wara i helpim ol bratasista bilong yumi. Noemia, em wanpela sista long Mosambik, i tok: “Bipo mipela i save wokabaut i go longpela hap bilong kisim wara. Mipela i save pilim tait na strong i pinis long taim mipela i kamap long Haus Kingdom. Na bikos wara i sot, i hatwok long stap klin. Nau, olgeta i ken wasim han bilong ol. Mipela i ken go long Haus Kingdom na amamas long kisim tok long miting na i no pilim tait. Tenkyu tru!”

Ol i kisim mani long wanem hap long baim ol dispela projek? Long rot bilong donesen long sapotim wok long olgeta hap bilong graun, planti i mekim olsem long rot bilong yusim ol kain kain wei i stap long donat.jw.org. Tenkyu long givim kontribiusen!