Stretpela Pasin i Save Kamapim Amamas

SAPOS yu lusim pikinini na em wanpela i stap klostu long tebol i gat ol gutpela kaikai na loli samting i pulap long en, yu ting em bai mekim wanem? Sapos i no gat man bilong stiaim em, ating em bai kisim kaikai em yet i save laikim, olsem loli samting, a? Dispela bai mekim na ating bai em i gat sik long en.

Olsem na i gat kain kain samting em man i ken mekim. Em i tingim wanem samting i olsem namba wan samting long em? Amamas insait long famili na gutpela sindaun? o bihainim wanpela pasin bilong amamasim skin tasol, maski wanem wanem hevi dispela inap kamapim? Tasol ol samting em i mekim i as bilong ol samting bai painim em long nau na long bihain​—dispela inap helpim em o nogutim em.

Ol Samting i Kamap

Planti ol i lusim stretpela pasin bilong marit na mekim nabaut, na ol i bihainim laik bilong ol yet, tasol dispela i no mekim gut long ol. Ol man na meri i mekim laik bilong ol yet ol i bin kisim planti hevi, olsem: Ol famili i bruk, kisim nating bel, dai long sik AIDS na long ol narapela sik bilong pamuk, i stap bilong ol i bagarap long kisim ol drak nogut, na ol kain kain narapela samting nogut i painim ol. Ol dispela samting nogut i painim ol i stret wantaim tok bilong Baibel long Sindaun 16:25: “Sampela man i save ting, pasin bilong ol i gutpela na ol i bihainim gutpela rot. Tasol nogat. Ol i mekim i go i go na bihain bai ol i dai.”​—Lukim tu Galesia 5:​19-21.

Na pasin bilong tingim ol yet na bihainim laik bilong ol yet na maski long ol narapela, dispela pasin i kamap bikpela, na dispela tu i stret long tok bilong 2 Timoti 3:​1-4 i stori long taim bilong yumi long nau, olsem: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu long ol manmeri i mekim gutpela pasin long ol. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God.”

As Bilong Ol Nambawan Stretpela Pasin

Olsem na yumi save olsem: Sapos yumi laik wokabaut stret long dispela taim nogut bilong nau, as bilong ol pasin na lo yumi bihainim i mas winim ol pasin na lo em ol man bilong graun i bin kamapim. Wanpela man bilong raitim ol hap bilong Baibel, em Jeremaia, em i wanbel long dispela na em i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.”​—Jeremaia 10:23.

Tasol husat i as bilong kamapim ol nambawan stretpela pasin? Long wanpela buk (Cours de philosophie) wanpela profesa bilong Frans, em Armand Cuvillier i tok olsem; em wantaim planti narapela saveman i bilip olsem ‘man yet i as bilong ol pasin na lo.’ Tasol em i laik bai yumi save olsem, olgeta gutpela lo em ol man i bin kamapim i no strongpela lo tumas, olsem na bihain ol narapela lo inap kamap senis bilong ol.

Yumi save, man bilong wokim wanpela masin, em i winim ol narapela long save gut long pasin bilong mekim wok long dispela masin. Na i wankain long God na yumi man. Jehova i Man bilong wokim yumi, olsem na em i winim ol man long makim ol pasin na lo ol man i mas bihainim na bilong wanem ol i mas bihainim. Long Baibel, Jehova i kolim em yet olsem Man bilong ‘skulim yumi na soim yumi long ol stretpela pasin yumi mas bihainim na bai yumi stap gut.’​—Aisaia 48:17.

Em Pasin Bilong Ol Lain Bilong Bipo Tasol?

Yu ting ol stretpela pasin em Baibel i stori long en i stret long taim bilong yumi? Winim 1,900 yia i go pinis, aposel Pol i wokim lista bilong ol pasin ol wokboi bilong God i mas bihainim. Em i kolim “pasin bilong laikim tru ol arapela na pasin bilong amamas na pasin bilong i stap bel isi na pasin bilong i no belhat kwik na pasin bilong helpim ol man na mekim gutpela pasin long ol na pasin bilong wokabaut stret oltaim [na bilip] na pasin bilong i stap isi na pasin bilong daunim laik bilong olpela bel.” Yu ting ol dispela pasin i no gutpela long nau? Nogat tru! Ol i gutpela yet. Tru, sindaun bilong man i bin senis, tasol ol dispela gutpela pasin i stap nambawan yet.​—Galesia 5:​22, 23.

I wankain tu long ol samting Baibel i tambuim, na yumi ken askim olsem: Bilong wanem na God i bagarapim ol taun Sodom na Gomora? Disaipel Jut i tok, God i mekim olsem, long wanem ol man bilong ol dispela taun i “bihainim ol pasin nogut na ol i mekim ol narakain pasin pamuk i nogut tru.” Na Jut i tok moa olsem, dispela bagarap i stap olsem piksa bilong “yumi ken tingim ol na yumi no ken bihainim pasin nogut bilong ol dispela lain.” Dispela stori wantaim ol narapela stori olsem, “ol i bin raitim bilong skulim yumi,” na “bilong givim tingting long yumi,” olsem na ol stretpela pasin ol dispela stori i skulim ol man long bihainim, i gutpela yet bilong yumi ol man bilong nau i mas bihainim.​—Jut 7; Rom 15:4; 1 Korin 10:11.

Ol Stretpela Pasin Bilong Kamapim Amamas long Yu

Tingim dispela samting: I nogat narapela buk i wankain long Baibel, nogat. Tok bilong Baibel i no “tok bilong man. Nogat. . . . [em i] tok tru bilong God.” (1 Tesalonaika 2:13) Tru, i gat planti milion milion buk i stap, tasol Baibel wanpela em ‘God yet i bin kamapim, na em inap skulim ol man long ol pasin i stret.’ (2 Timoti 3:16) Baibel tasol i gat ol nambawan gutpela lo bilong ol man i ken bihainim, na em i helpim ol man long save olsem wanem ol dispela lo inap bringim ol long kisim laip oltaim long nupela graun. Olsem na em i savepasin tru sapos yumi kaunim na skelim ol tok bilong Baibel, a?

Wanpela yangpela man nem bilong em Joel, em i bin mekim olsem. Sampela yia i go pinis, em i wokabaut long ples bilong em long Frans wantaim sampela ol yangpela, na ol i holim gan samting. Em i gat nem olsem man bilong belhat na kros kwik, na em i save baim drak nogut i go long ol man, na em i man bilong bosim ol meri pamuk. Tasol Joel i kisim save long Baibel na long ol gutpela samting bai kamap bihain, na isi isi em i senisim pasin bilong em na lusim ol pasin Baibel i tambuim. Na sampela poroman bilong em long bipo, ol i bilip strong olsem em i painim lotu i tru, na ol tu i mekim bikpela senis long i stap bilong ol, na ol i kamap Witnes Bilong Jehova na kisim baptais.

Tru planti manmeri, taim ol i no kamap Witnes Bilong Jehova yet, i stap bilong ol i no wankain olsem Joel na ol poroman bilong em, nogat. Tasol ol man i kamap Witnes, ol i save ol i mas skelim gut i stap bilong ol na senisim ol samting i bin i stap olsem bikpela samting long ol​—maski ol dispela samting yet i no nogut​—long wanem, ol i bilip tru olsem ol i painim pinis ol lo bilong helpim ol long save wanem samting i bikpela samting tru long ol i mas bihainim bambai ol i ken i stap amamas.

Long olgeta hap bilong graun, klostu 4 milion Witnes i wok long bihainim ol dispela lo long olgeta de, maski ol i stap we we na maski long sindaun bilong ol. Kingdom bilong God i stap namba wan samting long bel bilong ol, na ol i tingim ol samting bilong spirit pastaim. Ol i singautim yu tu long skelim ol gutpela samting ol dispela stretpela lo inap kamapim long yu sapos yu bihainim. Bai yu mekim olsem? Sapos yu mekim, God i tok promis olsem, bai yu inap “stap gut tru.”​—Buk Song 119:165; Matyu 6:33.

[Piksa long pes 20]

Ol samting i bikpela samting tru long yumi i mas winim ol samting ol man bilong graun i ting i bikpela samting