Ol Gutpela Tingting i Lukautim Yumi
OLGETA lain man i save bihainim sampela kain lo. Ating yu wanbel long tok ol kain pasin olsem pasin bilong tok tru, mekim gut long narapela, pasin sori, na i no tingim em yet, em ol pasin planti man long olgeta hap bilong graun i save laikim.
Tingting Bilong Husat?
Long taim bilong ol aposel, wanpela man i bin skul gut, nem bilong em Sol, em i bin stap namel long tripela lain i gat ol tingting na pasin bilong ol yet—em ol Juda, ol Grik, na ol Rom. Ol dispela lain i gat ol pasin na lo i bosim ol samting, na tu, Sol i luksave olsem ol man i gat lo long bel i save stiaim pasin bilong ol. Dispela samting em maus bilong bel bilong yumi. Bihain long taim Sol i kamap aposel Pol, em i tok: “Ol arapela lain ol i no gat lo, tasol long tingting bilong ol yet sampela bilong ol i save bihainim pasin bilong lo. Ol i no gat lo, tasol sapos ol i bihainim pasin bilong lo, orait tingting bilong ol yet i stap olsem lo bilong ol. Long dispela pasin bilong ol, tok bilong lo God i bin raitim long bel bilong ol em i kamap ples klia. Na tingting i stap insait tru long bel bilong ol, dispela tu i soim olsem lo i stap long bel bilong ol.”—Rom 2:14, 15.
Tasol olsem wanem? Em inap sapos yumi bihainim tasol ‘lo i stap long tingting’ taim yumi makim wanem samting i stret o i no stret? Olsem yu lukim pinis, kirap long bipo na i kam inap long nau, i gat planti stori tumas long ol samting ol man na ol lain man i bin pundaun long en. Dispela i bin kirapim planti man long ting olsem yumi mas kisim helpim long wanpela man em i winim yumi na bai yumi ken kamapim ol nambawan gutpela tingting na pasin bilong bihainim. Planti man bai tok olsem Man i bin wokim ol manmeri, em tasol inap kamapim ol kain lo olsem. Long buk The Undiscovered Self, Dokta Carl Jung i tok: “Man husat i no bilip na i no pas gut wantaim God, em i no inap sakim long strong bilong em yet ol traim bilong dispela graun i laik pulim em.”
Dispela tok i stret wantaim tok wanpela profet i bin raitim long bipo, olsem: “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Man Bilong Wokim yumi i tok: “Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—Aisaia 48:17.
Wanpela Buk i Gat Ol Tok Yumi Inap Bilip Long En
Ol dispela tok i kam long wanpela buk i kamapim ol stretpela lo na ol i bin tilim long planti hap bilong graun, winim olgeta narapela buk—em Baibel. Planti milion manmeri long olgeta hap—ol man i no Kristen na ol man i no save lotu—ol i bin kirap ritim Baibel bilong kisim gutpela tingting na save. Man Jeman bilong raitim ol stori, Johann Wolfgang von Goethe, em i tok: “Mi yet mi rispek na laikim tru [Baibel], long wanem, klostu olgeta stretpela pasin mi bin kisim i kam long Baibel.” Lida bilong ol Hindu, Mohandas Gandhi, em i tok: “Yes, dring gut long wara em Krais i givim long yu long Bikpela Tok Long Maunten [hap bilong ol tok Jisas Krais i bin skulim ol man long en na i stap long Baibel] . . . Long wanem, dispela Bikpela Tok bilong skulim man i bilong yumi olgeta wan wan.”
Aposel Pol, em yumi kamapim pinis sampela tok bilong em, i soim olsem Baibel i kamapim ol stretpela tingting yumi ken bihainim. Em i tok: “Spirit bilong God yet i bin kamapim olgeta tok i stap long buk bilong God.” (2 Timoti 3:16) Dispela tok em i tru o nogat?
Gutpela sapos yu yet i painimaut. Skelim ol stiatok i stap long pes bihain long dispela. Luksave long ol gutpela tingting na pasin ol i strongim yu long bihainim. Tingim tingim long bel long olsem wanem ol dispela tok inap mekim sindaun bilong yu i kamap gutpela na i helpim yu long pas gut wantaim ol narapela.
Dispela Bai Helpim Yu?
Ol dispela stiatok em sampela tasol bilong ol gutpela tok bilong Baibel em ol inap helpim tru yumi. Na i no dispela samting tasol, Baibel i gat planti tok lukaut long ol tingting, toktok, na pasin nogut em ol inap bagarapim tru laip bilong yumi.—Sindaun 6:16-19.
Yes, ol tok Baibel i skulim ol man long en i kamapim ol samting em ol manmeri bilong graun i sot tru long en—ol gutpela tok i helpim ol manmeri long kamapim ol nambawan gutpela lo long stretpela pasin. Ol man husat i bilip na bihainim ol dispela tok ol i senis tru. Tingting bilong ol i senis na i kamap gutpela. (Efesus 4:23, 24) Ol tingting i kirapim ol long mekim ol samting i kamap gutpela. Taim ol man i kisim save long tingting bilong God em Baibel i kamapim, dispela i bin helpim planti man long rausim pasin bilong bel nogut long ol man bilong narapela skin na lain, tingting nogut long ol narapela, na pasin bilong birua. (Hibru 4:12) Tok bilong Baibel na ol tingting na pasin em i strongim ol man long mekim i bin kirapim ol man long lusim olkain pasin bilong pait na pasin nogut na ol i kamap gutpela manmeri.
Em nau, tok bilong Baibel i bin helpim planti milion manmeri long winim olkain pasin i bin bagarapim laip bilong planti narapela man. (1 Korin 6:9-11) Ol tok bilong Baibel i bin senisim ol kain man olsem—em i senisim pasin bilong ol, na tu, senisim tingting i stap long bel, ol samting ol i bilip na wet long en, na sindaun bilong famili. Maski pasin bilong ol man bilong graun i wok long i go nogut moa, i gat ol man long olgeta hap bilong graun em ol i wok long senis na kamap gutpela. Na dispela samting bai i no pinis. Baibel i tok: “Gras i save drai, na ol plaua i save pundaun. Tasol tok bilong God bilong yumi i save stap oltaim oltaim.”—Aisaia 40:8.
Tasol olsem wanem? “Tok bilong God” bai helpim yu yet? Ol Witnes Bilong Jehova i amamas long helpim yu long kisim pasin bilong bihainim ol tok bilong Baibel em ol inap helpim yu tru. Taim yu bihainim ol dispela tok, God bai orait long yu long nau na bai yu kisim laip oltaim em ol stiatok bilong God i bosim.
[Blok/Ol Piksa long pes 6, 7]
OL STIATOK I HELPIM YUMI OLTAIM
Pasin yumi mekim long ol arapela. “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol. Dispela em i as tok bilong lo, na em i as bilong tok bilong ol profet.”—Matyu 7:12.
Laikim tru ol arapela man. “Yu mas laikim ol wantok olsem yu laikim yu yet.” (Matyu 22:39) “Man i save givim bel bilong em long arapela man, em i no save mekim pasin nogut long em. Olsem na . . . em i save bihainim tru lo.”—Rom 13:10.
Rispek na givim biknem long ol arapela. “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.”—Rom 12:10.
Stap bel isi wantaim ol narapela. “Kamapim gutpela sindaun namel long ol brata.” (Mak 9:50) “Oltaim yupela i mas painim rot bilong i stap wanbel wantaim olgeta man.” (Rom 12:18) “Yumi mas bihainim olgeta pasin i save mekim yumi i stap wanbel.”—Rom 14:19.
Lusim rong bilong arapela. “Lusim ol rong bilong mipela, olsem mipela i save lusim ol rong ol arapela i mekim long mipela.” (Matyu 6:12) “Mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol.”—Efesus 4:32.
Stap gut long narapela. “Yu mas i stap gut wantaim meri bilong yu, na slip wantaim em wanpela tasol, . . . Meri i olsem hul wara bilong yu na yu ken amamas long em. Em i naispela tumas na pasin bilong en i gutpela tru. Em i save laikim yu tumas, olsem na oltaim yu mas tingting long em na laikim em tru. . . . Pikinini, nogut yu tingting oltaim long meri bilong narapela man na yu laik holim susu bilong en.” (Sindaun 5:15-20) “Sapos wanpela man i save lukaut gut long ol liklik samting, orait em bai i lukaut gut long ol bikpela samting tu. Na man i save mekim pasin i no stret long ol liklik samting, em bai i mekim pasin i no stret long ol bikpela samting tu.” (Luk 16:10) “Man i mekim wok bilong wanpela man, em i mas bihainim gut tok.”—1 Korin 4:2.
Mekim pasin i tru. “Mi no inap lusim sin bilong man i save yusim giaman skel bilong skelim ol samting.” (Maika 6:11) “Mipela i pilim olsem bel bilong mipela i stap stret long ai bilong God. Na mipela i laik wokabaut stret long olgeta taim.”—Hibru 13:18.
Mekim tok tru. “Lusim pasin nogut, na bihainim gutpela pasin tasol. Yupela i mas mekim stretpela kot tasol.” (Amos 5:15) “Mekim tok tru tasol long ol arapela man. Na yupela i mas stretim tok gut long kot na bai tok i dai.” (Sekaraia 8:16) “Yupela i mas lusim pasin bilong giaman. Yupela olgeta i mas mekim tok tru tasol long ol arapela.”—Efesus 4:25.
Givim bel long wok. “Sapos man i mekim gutpela wok, orait em bai i kamap wokman bilong king.” (Sindaun 22:29) “Yupela i mas wok strong oltaim.” (Rom 12:11) “Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela.”—Kolosi 3:23.
Mekim pasin isi, pasin sori, na gutpela pasin. “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik.”—Kolosi 3:12.
Mekim gutpela pasin long man i mekim pasin nogut. “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.” (Matyu 5:44) “Yu no ken larim pasin nogut i winim yu. Nogat. Yu mas mekim gutpela pasin na bai yu daunim pasin nogut.”—Rom 12:21.
Givim bel olgeta long God. “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru.”—Matyu 22:37, 38.
[Ol Piksa]
Pasin bilong bihainim ol tok bilong Baibel inap helpim marit bilong yumi long stap gut, na pas gut wantaim famili na ol pren