God i Wokim Yumi Bambai Yumi Ken Tingim Rot Yumi Laik Bihainim

YU AMAMAS long yu inap tingim wanem rot yu laik bihainim na wanem ol samting yu laik mekim, na wanem ol tok yu laik mekim? O yu laik bai wanpela man i bosim olgeta samting o olgeta tok yu mekim?

Ating yumi no laik bai narapela i bosim olgeta wan wan samting yumi laik mekim, a? Long wanem dispela bai putim hevi long yumi na bagarapim tingting na bel bilong yumi. Yumi gat laik long i stap fri, a?

Tasol bilong wanem yumi gat laik long i stap fri long tingim ol samting yumi laik mekim? Sapos yumi save long dispela, orait bai yumi save bilong wanem God i larim pasin nogut na pen na hevi i kamap. Dispela bai helpim yumi long save tu, i gat wanem as na God i bin wet longtaim inap long nau bilong pinisim ol pasin nogut wantaim pen na hevi.

God i Wokim Man Olsem Wanem?

Taim God i wokim man em i wokim em i gutpela tru na bai em inap tingim rot em i laik bihainim. Baibel i tok, God i wokim man ‘i kamap olsem em yet.’ (Stat 1:26; Lo 7:6) God yet i save tingim ol samting em i laik mekim, olsem na em i wokim man bambai em tu i ken tingim ol samting em i laik mekim.

Em nau, long dispela as yumi gat laik long i stap fri​—yumi no laik i stap kalabus aninit long ol gavman nogut. Na em as tu na planti man i bel nogut long ol hatpela gavman i save daunim ol, na ol i bikhet na pait long dispela kain gavman bambai ol i ken i stap fri.

Dispela laik bilong i stap fri i no kamap nating, nogat. Baibel i tokaut olsem: “Sapos Spirit bilong Bikpela i stap long wanpela man . . . Em i stap fri.” ( 2 Korin 3:17) Olsem na yumi gat laik long i stap fri, long wanem God i wokim yumi olsem. God yet i Man bilong i stap fri, na em i laik bai yumi tu i stap fri.

Na tu God i wokim yumi bambai yumi inap wokim tingting na skelim ol samting​—wanem ol pasin i gutpela na wanem ol pasin i nogut. (Hi 5:14) God i no wokim yumi olsem wanpela masin i no gat tingting; na yumi no olsem ol animal​—skin bilong ol i kirapim ol long mekim ol samting, na ol i mas mekim tasol. Ol i no inap tingting pastaim. Yumi no wankain olsem ol, a?

God i wokim namba wan papa na mama bilong yumi bambai ol i ken tingim ol samting ol i laik mekim, na em i givim olgeta samting long tupela bilong inapim laik bilong ol. Tupela i stap long gutpela ples paradais; tupela i gat planti gutpela samting bilong skin; tingting na skin bilong tupela i gutpela olgeta na bai ol i no inap kisim sik na go lapun na i dai. Tupela bai kamapim ol pikinini i gat gutpela sindaun, na ol man bai kamap planti na ol bai amamas long mekim graun olgeta i kamap gutpela ples paradais.​—Stat 1:​26-30; 2:15.

Baibel i tok long olgeta samting God i wokim olsem: “God i lukim olgeta dispela samting i gutpela, na em i amamas tru.” (Stat 1:31) Na Baibel i tok long God olsem: “[Wok] bilong en i gutpela na stretpela tasol.” (Lo 32:4) Olsem na taim God i wokim namba wan man na meri tupela i stap gutpela olgeta.

Stap Fri, Tasol Bihainim Lo

Tru, God i wokim yumi bambai yumi ken tingim rot yumi laik bihainim, tasol yu ting i gat sampela lo yumi mas bihainim o nogat? Olsem wanem? Sapos i no gat lo bilong bosim rot, na planti ka i pas pas long rot na ol draiva i bihainim tingting bilong ol yet long draiv, olsem ol yet i makim spit bilong ka na wanem hap bilong rot ka i ran long en, bai yu amamas long draivim ka? Nogat, a? Sapos ol draiva inap mekim laik bilong ol yet long draiv na no gat wanpela lo bilong bosim ol, ating ol ka bai bam na planti man bai kisim bagarap.

I wankain tu long sindaun bilong man wantaim ol narapela man. Sapos sampela inap bihainim olgeta laik bilong ol yet na no gat wanpela samting i pasim ol, dispela bai bagarapim sindaun bilong ol narapela, na pasin nogut tru bai kamap. Olsem na i mas i gat sampela lo bilong bosim ol man. Tru, God i wokim yumi bambai yumi ken tingim ol samting yumi laik mekim, tasol em i no laik bai yumi mekim laik bilong yumi yet tasol na yumi no tingim sindaun bilong ol narapela.

Baibel i tok: “Yupela i mas wokabaut olsem ol man i stap fri. Tasol yupela i no ken ting, ‘Nau mipela i stap fri,’ na yupela i go mekim ol kain kain pasin nogut. Nogat.” (1 Pita 2:16) Olsem na God i laik bai yumi tingim gut ol samting yumi laik mekim, na bai dispela i no ken mekim nogut long ol narapela. God i no wokim man bambai em i ken stap fri olgeta, nogat​—em i stap fri, tasol em i mas bihainim lo.

Ol Lo Bilong Husat?

God i wokim man bilong bihainim lo bilong husat? Ol lo bilong husat i gutpela bilong helpim yumi? Laspela hap bilong 1 Pita 2:16 i tok: “Yupela i mas wokabaut olsem ol wokboi bilong God.” Tru i no olsem yumi mas i stap olsem kalabus, tasol God i wokim yumi bambai yumi mas bihainim ol lo bilong em. Sapos yumi stap aninit long ol dispela lo bai yumi stap gut na amamas.

Ol lo bilong God i gutpela tru long stiaim wokabaut bilong ol man​—winim ol lo ol man yet i bin kamapim. Aisaia 48:17 i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” Ol lo bilong God i givim rot long ol man long tingim ol samting ol i laik mekim, tasol ol i mas was gut na bihainim ol lo bilong em. Ol man inap mekim ol samting long tingting na pasin bilong ol yet, olsem na yumi amamas long lukim kain kain bilas, na sindaun, na pasin bilong ol man.

Tasol i gat sampela samting yumi no inap mekim. Ol man i mas bihainim ol lo God i putim bilong bosim ol samting long graun, olsem: Sapos yumi kalap i go daun long wanpela ples i antap tru, dispela bai nogutim skin bilong yumi o bagarapim yumi. Na sapos yumi go insait long wara na yumi no pulim win inap sampela minit, bai yumi dai. Na sapos yumi sakim lo bilong skin na yumi no kaikai o dring wara, bai yumi dai.

Olsem na God i wokim namba wan papa na mama na ol pikinini bilong tupela bambai ol i mas bihainim ol lo bilong God, em ol lo i makim ol stretpela pasin ol i mas bihainim, na ol lo bilong bosim sindaun bilong man na bilong bosim ol samting bilong graun. Ol dispela lo i no ken putim hevi long ol​—pasin bilong bihainim ol lo em bai helpim gut ol. Sapos namba wan papamama i bin bihainim ol lo bilong God, nau bai yumi gat gutpela sindaun na i stap amamas.

Wanem samting i mekim na dispela gutpela sindaun i no kamap? Bilong wanem pasin nogut na pen na hevi i kamap bikpela moa yet? Bilong wanem God i larim pasin nogut i stap longtaim?

[Piksa long pes 7]

Yumi inap tingim ol samting yumi laik mekim​—yumi no olsem wanpela masin i no gat tingting, na yumi no olsem ol animal, em skin bilong ol i kirapim ol long mekim ol samting na ol i mas mekim tasol