Namba 5 Hap
Yumi Inap Bihainim Laik Bilong Yumi—Em Gutpela Presen
1, 2. God i wokim wanem pasin long yumi i olsem gutpela presen em i givim long yumi?
SAPOS yumi laik save bilong wanem God i larim pen na hevi i stap na em bai mekim wanem bilong pinisim, pastaim yumi mas save em i wokim yumi olsem wanem. Em i wokim yumi i gat bodi na kru bilong het, tasol em i wokim yumi i gat tingting tu na laik bilong bel.
2 Olsem na yumi inap bihainim laik bilong yumi. Tru tumas, God i wokim yumi bilong yumi yet i ken tingim wanem samting yumi laik mekim. Em olsem gutpela presen yumi kisim.
Pasin Bilong Yumi
3-5. I gat wanem as na yumi amamas long yumi inap bihainim laik bilong yumi?
3 Yumi inap bihainim laik bilong yumi, tasol olsem wanem dispela i insait long wok God i laik mekim na em i larim pen na hevi i stap? Orait, yu tingim: Yu laik i stap fri na bai yu ken mekim olgeta samting na olgeta tok yu laik mekim, na kisim wanem kain kaikai na klos na wok yu laikim, na stap long wanem hap yu laik i stap long en, na bihainim wanem kain pasin yu yet yu laikim? O yu laik bai wanpela man i bosim olgeta samting yu mekim?
4 No gat wanpela man i laik bai narapela man i bosim olgeta samting em i mekim, a? As bilong dispela em pasin God i putim long skin bilong yumi. Baibel i tok, God i wokim ol man ‘i kamap olsem em yet,’ na em inap mekim ol samting long laik bilong em. (Stat 1:26; Lo 7:6) Olsem na em i wokim yumi bambai yumi inap bihainim laik bilong yumi. Em wanpela as na yumi no laik kalabus aninit long ol hatpela bos.
5 Em nau, laik bilong i stap fri i no kamap nating—God bilong i stap fri i as bilong en. Baibel i tok: “Sapos Spirit bilong Bikpela i stap long wanpela man, orait . . . [dispela man] i stap fri.” (2 Korin 3:17) Olsem na God i wokim yumi i gat dispela pasin, em yumi inap bihainim laik bilong yumi. Em i save, tingting na bel bilong yumi i wok olsem wanem, na em i save, sapos yumi inap bihainim laik bilong yumi bai yumi inap i stap amamas.
6. God i wokim kru bilong yumi em inap mekim wanem wok na yumi inap bihainim laik bilong yumi?
6 Na God inapim yumi long wokim tingting, na skelim ol samting, na tingim gut wanem samting yumi laik mekim, na save long pasin i stret na i no stret. (Hibru 5:14) Olsem na yumi inap tingting gut na bihainim laik bilong yumi. Yumi no olsem masin i no gat tingting na i no inap mekim samting long laik bilong en. Na yumi no olsem ol animal, em skin i kirapim ol long mekim ol samting na ol i mekim tasol—ol i no tingting pastaim. God i wokim gut kru bilong yumi bambai yumi inap tingting na bihainim laik bilong yumi.
Pastaim Ol i Stap Gutpela Olgeta
7, 8. God i givim wanem ol gutpela samting long namba wan tumbuna papamama bilong yumi?
7 God i tingim tru yumi, olsem na taim em i wokim namba wan tumbuna papamama bilong yumi, em Adam na Iv, em i wokim tupela bambai tupela inap bihainim laik bilong ol na ol i no sot long wanpela samting. Ol i stap long gutpela ples paradais na ol i gat planti samting bilong skin. Tingting na skin bilong ol i gutpela olgeta, olsem na ol i no ken i go lapun o sik o i dai—ol inap i stap oltaim. Ol inap kamapim ol pikinini i gutpela olgeta na ol tu inap i stap amamas oltaim oltaim. Bai lain bilong ol i go bikpela, na bai ol i gat gutpela wok bilong kamapim paradais long olgeta hap bilong graun.—Stat 1:26-30; 2:15.
8 Baibel i stori long ol samting God i givim long ol na i tok: “God i lukim olgeta dispela samting i gutpela.” (Stat 1:31) Na Baibel i tok, olgeta wok bilong God “i gutpela na stretpela tasol.” (Lo 32:4) Tru tumas, God i wokim namba wan man na meri i stap gutpela olgeta. Em i tingim tru yumi ol man!
Ol i No Stap Fri Olgeta
9, 10. Yumi inap bihainim laik bilong yumi, tasol bilong wanem i mas i gat ol lo bilong bosim gut dispela?
9 Tasol yu ting God i wokim ol man i stap fri olgeta, no gat sampela lo ol i mas bihainim? Orait, olsem wanem sapos long wanpela biktaun i no gat ol lo bilong rot na olgeta man i bihainim laik bilong ol yet na draivim ka long wanem hap na wanem spit ol yet i laikim? Bai planti bagarap i kamap long rot, a?
10 Olsem tasol, yumi inap bihainim laik bilong yumi, tasol i mas i gat sampela lo bilong bosim ol samting yumi mekim, nogut yumi mekim nabaut. Baibel i tok: “Yupela i mas wokabaut olsem ol man i stap fri. Tasol yupela i no ken ting, ‘Nau mipela i stap fri,’ na yupela i go mekim . . . pasin nogut.” (1 Pita 2:16) God i no wokim yumi i stap fri olgeta. I gat ol lo yumi mas bihainim bambai olgeta man i ken i stap gutpela.
Ol Lo Bilong Husat?
11. God i wokim yumi bilong bihainim ol lo bilong husat?
11 Yumi mas bihainim ol lo bilong husat? Hap tok bilong 1 Pita 2:16 i tok, yumi mas i stap “wokboi bilong God.” I no olsem yumi stap kalabus. Tasol God i wokim yumi bilong bihainim ol lo bilong em bambai yumi ken i stap amamas. (Matyu 22:35-40) Ol lo bilong em i soim gutpela rot long yumi, winim ol lo bilong ol man. Em i tok: “Mi save . . . soim yupela long ol stretpela pasin yupela i mas bihainim na bai yupela i stap gut.”—Aisaia 48:17.
12. Yumi stap aninit long ol lo bilong God, tasol yumi inap bihainim wanem ol laik bilong yumi?
12 Yumi stap aninit long ol lo bilong God, tasol yumi inap bihainim planti laik bilong yumi. Olsem na i gat kain kain man, na kaikai na klos na musik na haus bilong ol narapela narapela lain i kain kain. Yumi laik bihainim laik bilong yumi yet long ol dispela samting, a? Yumi no laik bai narapela man i makim wanem kain kaikai ol klos o musik o haus samting yumi mas laikim.
13. Yumi mas bihainim wanem ol lo bilong graun na bilong skin bilong yumi bambai yumi inap i stap gutpela?
13 God i wokim yumi bilong bihainim ol lo bilong Em bambai yumi ken i stap amamas, olsem ol lo i makim stretpela pasin ol man i mas bihainim, na ol lo i bosim ol samting long graun tu, olsem lo bilong graviti. Sapos yumi sakim dispela lo na yumi sanap antap long wanpela haus samting na yumi kalap, orait bai yumi kisim bagarap o i dai. Sapos yumi sakim ol lo i bosim skin bilong yumi na yumi no kaikai, o dring wara, o pulim win, bai yumi dai.
14. Olsem wanem yumi save, God i no wokim yumi bilong sakim em na bosim wokabaut bilong yumi yet?
14 Yumi mas bihainim ol lo bilong God i bosim graun na skin bilong yumi, na yumi mas bihainim tu ol lo bilong stretpela pasin. (Matyu 4:4) God i wokim yumi olsem. Sapos yumi sakim Man i bin wokim yumi, yumi no inap i stap gutpela. Profet Jeremaia i tok: “Bikpela, mi save, mipela man i no inap bosim wokabaut bilong mipela yet . . . yu ken stretim mipela.” (Jeremaia 10:23, 24) Olsem na God i no bin wokim yumi bilong bosim wokabaut bilong yumi yet; em i mas bosim yumi.
15. Yu ting ol lo bilong God i bin nogutim Adam tupela Iv?
15 Namba wan tumbuna papamama bilong yumi i mas bihainim ol lo bilong God, tasol dispela i no nogutim ol. Sapos ol i bin bihainim, dispela inap helpim tupela yet na yumi olgeta manmeri—bai olgeta samting i stap gutpela, na bai yumi olgeta manmeri i stap amamas nau long gutpela ples paradais na i pas gut wantaim long pasin sori! Bai i no gat pasin nogut o pen o i dai.
[Piksa long pes 11]
God i wokim namba wan man na meri i gutpela olgeta
[Piksa long pes 12]
Sapos i no gat ol lo bilong rot, yu laik draivim ka long rot i gat planti ka long en?