Pilim Tru Presen Bilong i Stap Fri Long Mekim Disisen

1, 2. (a) Ol manmeri i holim wanem ol tingting long presen bilong i stap fri long mekim disisen bilong yumi yet? (b) Baibel i givim wanem stretpela tingting long yumi? (c) Yumi bai skelim wanem ol askim?

WANPELA meri i mas mekim disisen, tasol em i tokim pren bilong em: “Mi les long tingting; yu tokim mi long disisen mi mas mekim.” Dispela meri i laik bai narapela i tokim em long samting em i mas mekim, na em i les long yusim presen God i givim long em—em i stap fri long mekim disisen bilong em yet. Olsem wanem? Yu save amamas long mekim disisen bilong yu yet, o yu laik bai ol narapela i mekim disisen bilong yu? Yu holim wanem tingting long presen God i givim long yu, olsem yu stap fri long mekim disisen bilong yu yet?

² Inap planti handret yia, sampela man i tok God i makim pinis olgeta samting yumi mekim long laip bilong yumi, olsem na yumi no stap fri long mekim disisen bilong yumi yet. Ol narapela i tok, sapos yumi mekim olgeta samting long laik bilong yumi yet, dispela em fridom tru. Tasol mobeta yumi skelim ol tok bilong Baibel bambai yumi inap kisim stretpela tingting. Baibel i tok, Jehova i wokim yumi na em i givim yumi pasin bilong tingim na skelim gut ol samting, na yumi stap fri long mekim ol disisen bilong yumi yet. (Ritim Josua 24:15.) Baibel i bekim ol dispela askim: Yumi mas bihainim wanem kain pasin taim yumi yusim fridom bilong yumi long mekim disisen? I gat lo bilong kontrolim dispela fridom? Hau bai yumi inap yusim dispela fridom long soim olsem yumi laikim tru Jehova? Hau bai yumi soim rispek long disisen bilong ol narapela?

YUMI KISIM WANEM SKUL LONG JEHOVA NA JISAS?

3. Jehova i yusim fridom bilong em long mekim wanem?

³ Jehova wanpela tasol em Man i gat fridom long mekim olgeta samting, na yumi inap kisim skul long hau em i yusim fridom bilong em. Em i makim lain Israel long kamap lain manmeri i holim nem bilong em—ol i stap “lain manmeri bilong em stret.” (Lo 7:6-8) Jehova i no mekim nating dispela samting. Planti handret yia paslain em i mekim dispela tok promis long Abraham, na nau em i truim dispela tok promis. (Stt. 22:15-18) Taim Jehova i yusim fridom bilong em, oltaim em i bihainim pasin laikim na stretpela pasin. Em i mekim olsem taim em i stretim lain Israel—planti taim ol i givim baksait long lotu i tru. Taim ol i tanim bel tru, Jehova i soim pasin laikim na marimari long ol na i tok: “Bai mi kisim bek ol dispela manmeri i bin lusim mi. Bai mi laikim ol long bel bilong mi olgeta.” (Hos. 14:4) Jehova i yusim fridom bilong em long helpim ol narapela, na yumi ken bihainim gutpela pasin bilong em!

4, 5. (a) Husat em fes ensel long kisim fridom bilong mekim disisen bilong em yet? (b) Olsem wanem em i yusim fridom bilong em? (b) Yumi olgeta i mas givim wanem askim long yumi yet?

⁴ Taim Jehova i wokim ol ensel na ol man, em i larim ol i stap fri long mekim disisen bilong ol yet. Jisas em fes ensel long kisim fridom bilong mekim disisen bilong em yet. God i wokim em pastaim na em fesbon Pikinini na “piksa tru bilong dispela God ol man i no inap lukim.” (Kol. 1:15) Taim Jisas i stap long heven, em i mekim disisen long i stap gut long Papa na em i no bihainim Satan long mekim pasin bikhet. Bihain, taim Jisas i kam long graun, em i mekim disisen long sakim ol traim bilong Satan. (Mat. 4:10) Long nait paslain long Jisas i dai, em i givim bel olgeta long beten na strongim tingting bilong em long mekim laik bilong God. Em i tok: “Papa, sapos yu laik, rausim dispela kap long mi. Tasol laik bilong mi i no ken kamap, nogat, laik bilong yu i mas kamap.” (Luk 22:42) Yumi mas bihainim pasin bilong Jisas na yusim fridom bilong yumi long onarim Jehova na mekim laik bilong em! Yu ting yumi inap mekim olsem?

⁵ Yes, yumi inap bihainim eksampel bilong Jisas bikos yumi inap kamapim ol pasin bilong God. (Stt. 1:26) Tasol i gat sampela samting yumi no inap long mekim. Yumi no inap mekim olgeta samting olsem Jehova inap mekim. Baibel i tok Jehova i gat rait long putim lo long ol samting yumi ken mekim na ol samting yumi no ken mekim, na yumi mas bihainim ol dispela lo. Maritmeri i mas i stap daun long man bilong em, na pikinini i mas i stap daun long papamama. (Efe. 5:22; 6:1) Hau na ol dispela lo i stiaim yumi taim yumi mekim ol disisen bilong yumi yet? Bekim bilong dispela askim inap stiaim yumi long kisim laip oltaim.

FRIDOM—YUSIM GUT O MEKIM NABAUT?

6. Bilong wanem na i stret long God i putim ol lo bilong kontrolim fridom bilong yumi?

⁶ Yumi gat fridom long mekim disisen bilong yumi yet, tasol i gat ol lo bilong kontrolim yumi, olsem na yu ting dispela em fridom tru? Yes, yumi inap tok olsem! Taim man i gat fridom, hevi inap painim em sapos em i no was gut, olsem na i mas i gat ol lo bilong stiaim em long abrusim ol hevi. Tingim dispela tok piksa: Yumi laik draivim kar i go long wanpela taun i stap longwe. Rot i go long dispela taun i no gat ol lo bilong trafik, olsem na olgeta wan wan draiva i ken bihainim laik bilong ol yet na draivim kar long wanem hap bilong rot ol i laik draiv long en, na tu, ol i ken spit long laik bilong ol yet. Yu ting yumi bai pilim seif long draivim kar long dispela rot? Nogat tru, laka? Olsem na fridom tru i makim olsem olgeta manmeri i stap fri long mekim disisen bilong ol yet, tasol i mas i gat ol lo bilong stiaim ol. Yumi ken skelim sampela stori long Baibel bilong helpim yumi long luksave olsem em gutpela long larim ol lo bilong Jehova i stiaim yumi taim yumi yusim fridom bilong yumi.

7. (a) Hau na Adam i narapela kain long ol animal? (b) Adam i yusim fridom bilong em long mekim wanem wok?

⁷ Taim God i wokim namba 1 man, Adam, God i givim em wankain presen olsem em i givim long ol ensel—Adam i stap fri long mekim disisen bilong em yet. Adam i narapela kain long ol animal bikos ol animal i bihainim tasol ol lo i stap pinis long tingting bilong ol. Adam i mekim wanpela samting i soim klia olsem em i yusim gut fridom bilong em. God i wokim ol animal paslain long em i wokim man. Tasol Jehova i no givim nem long ol animal, nogat, em i givim dispela wok long namba 1 pikinini bilong em hia long graun. “God i bringim olgeta animal na pisin i go long man, bilong man i ken givim nem long ol.” Adam i skelim gut olgeta wan wan animal na em i givim nem i stret long ol, na Jehova i no senisim ol nem Adam i givim. Olsem na “wanem nem man i kolim ol long en, orait dispela nem i stap nem bilong ol.”—Stt. 2:19, 20.

8. (a) Adam i mekim wanem na dispela i soim olsem em i mekim nabaut long fridom bilong em? (b) Disisen bilong Adam i kamapim wanem samting?

⁸ God i tokim Adam long mekim graun i kamap ples paradais na bosim na lukautim ol samting i stap long en. Tasol Adam i pilim olsem dispela i no inap long em; em i laik kisim sampela samting moa. Em i no holim stretpela tingting long fridom bilong em long inapim wok God i givim long em. God i tok: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.” (Stt. 1:28) Adam i brukim lo bilong God na em i kaikai prut em God i tambuim. Adam i no mekim gutpela wok long fridom bilong em, olsem na ol tumbuna pikinini bilong em i karim pen na hevi inap planti tausen yia. (Rom 5:12) Yumi luksave olsem disisen bilong Adam i kamapim hevi, olsem na dispela i mas kirapim yumi long larim ol lo bilong Jehova i stiaim yumi taim yumi yusim fridom bilong yumi.

9. (a) Jehova i tokim lain Israel long mekim wanem? (b) Lain Israel i mekim wanem disisen?

⁹ Adam na Iv i no bihainim tok bilong God, olsem na ol tumbuna pikinini bilong ol i kisim sin na dispela i kamapim dai. Tasol God i larim ol i stap fri long mekim disisen bilong ol yet. Yumi luksave long dispela taim yumi skelim pasin God i mekim long lain Israel. Jehova i yusim Moses long tokim ol manmeri long mekim disisen—ol i laik kamap lain manmeri tru bilong em, o nogat. (Kis. 19:3-6) Ol manmeri i redi long mekim olgeta samting God i tokim ol long mekim, na ol i wanbel na tok: “Mipela bai mekim olgeta samting olsem Bikpela i bin tok.” (Kis. 19:8) Tasol bihain, lain Israel i mekim nabaut long fridom bilong ol na ol i brukim dispela tok promis. Yumi no ken bihainim pasin bilong ol. Oltaim yumi mas yusim fridom bilong yumi long mekim ol disisen bilong pas gut wantaim Jehova na bihainim ol stretpela lo bilong em.—1 Kor. 10:11.

10. Wanem ol eksampel i soim klia olsem yumi ol sinman inap yusim fridom bilong yumi long givim biknem long God? (Lukim piksa long kirap bilong stadi.)

¹⁰ Hibru sapta 11 i kolim nem bilong 16 manmeri em ol i mekim wok bilong God, na ol i bihainim ol lo bilong Jehova taim ol i yusim fridom bilong ol long mekim disisen. Olsem na ol i kisim planti blesing na ol i bilip tru long kisim gutpela laip long bihain. Noa i gat strongpela bilip na em i bihainim tok bilong God na wokim sip bilong lukautim famili bilong em bambai i gat ol manmeri i stap yet long graun. (Hib. 11:7) Abraham na Sara i bihainim tok bilong God na ol i go long graun em God i tok promis long givim long ol. Taim ol i lusim ples na kirap long mekim longpela wokabaut i go long graun bilong promis, “rot inap op long ol i go bek” long taun Ur, em ples i gat planti mani kago. Tasol ol i bilip na tingim tingim “truim bilong ol tok promis God i bin mekim long ol”; “ol i tingting long i go i stap long wanpela ples i gutpela moa.” (Hib. 11:8, 13, 15, 16) Moses i givim baksait long mani kago bilong Isip, na “em i wokim tingting olsem i gutpela long kisim hevi wantaim lain bilong God, na em i no laik bihainim pasin bilong sin na kisim amamas bilong sotpela taim tasol.” (Hib. 11:24-26) Yumi ken bihainim bilip bilong ol dispela bilip lain na yusim fridom bilong yumi long mekim disisen long bihainim laik bilong God.

11. (a) Sapos yumi yet i mekim disisen, yumi inap kisim wanem spesel blesing? (b) Wanem samting i kirapim yu long yusim gut fridom bilong yu long mekim disisen?

¹¹ Em isi moa long larim ol narapela i mekim disisen bilong yumi, tasol dispela bai pasim yumi yet long mekim disisen we inap opim rot bilong yumi long kisim wanpela spesel blesing. Lo 30:19, 20 (ritim) i stori long dispela blesing. Long ves 19, God i kolim 2-pela narapela narapela rot, na lain Israel i mas mekim disisen long rot ol i laik bihainim. Long ves 20, Jehova i tokim ol long mekim disisen we inap kamapim klia tingting tru bilong ol. Yumi tu inap mekim disisen long lotuim Jehova. God i givim presen long yumi—em i larim yumi i stap fri long mekim disisen bilong yumi yet—olsem na mobeta yumi yusim dispela presen long givim glori na ona long God na soim olsem yumi laikim em!

NO KEN MEKIM NABAUT LONG FRIDOM

12. Yumi no ken mekim wanem long presen bilong yumi long i stap fri long mekim disisen?

¹² Tingim olsem yu givim wanpela gutpela presen long pren bilong yu. Ating bai yu bel hevi tru sapos yu harim olsem em i tromoi dispela presen long pipia dram, na moa yet sapos em i yusim dispela presen long bagarapim narapela man! Tingim Jehova: Em i pilim olsem wanem taim em i lukim planti manmeri i mekim nabaut long fridom bilong ol na ol i bagarapim ol narapela manmeri? Olsem Baibel i tok profet long en, “long taim bilong las de,” ol man “bai i no tok tenkyu.” (2 Tim. 3:1, 2) Yumi no ken mekim nabaut long presen i kam long Jehova o tingim olsem samting nating. Orait, hau bai yumi no ken mekim nabaut long dispela presen?

13. Yumi mas mekim wanem sapos yumi no laik mekim nabaut long fridom bilong yumi?

¹³ Yumi olgeta i gat fridom long makim husat yumi laik poromanim, wanem kain stail bilong klos na bilas yumi laik werim, na wanem kain amamas yumi laik kisim. Tasol dispela fridom inap “i stap olsem rot bilong mekim pasin nogut” sapos yumi bihainim ol laik nogut bilong yumi yet o yumi bihainim ol pasin doti bilong dispela graun. (Ritim 1 Pita 2:16.) Yumi no ken yusim fridom bilong yumi “long inapim ol laik nogut bilong bel,” nogat. Yumi mas tingting strong long mekim ol disisen we i helpim yumi long bihainim dispela tok: “Yupela i mas mekim olgeta samting bilong givim glori long God.”—Gal. 5:13; 1 Kor. 10:31.

14. Sapos yumi bilip tru long Jehova, yumi bai mekim wanem taim yumi yusim fridom bilong yumi long mekim ol disisen?

¹⁴ Narapela rot bilong yusim gut fridom bilong yumi em olsem, yumi mas bilip tru long Jehova na larim em i yusim ol lo bilong em long stiaim yumi. Em tasol i ‘save skulim yumi na soim yumi long ol stretpela pasin yumi mas bihainim na bai yumi stap gut.’ (Ais. 48:17) Yumi mas daunim yumi yet na luksave olsem tok bilong Baibel em i tru: “Mipela man i no inap bosim wokabaut bilong mipela yet na bihainim ol rot mipela i laikim.” (Jer. 10:23) Yumi no ken bilip long save bilong yumi yet olsem Adam na bikhetlain Israel i bin mekim. Mobeta yumi “bilip strong” long Jehova long bel olgeta bilong yumi.—Snd. 3:5.

RISPEKTIM FRIDOM BILONG OL NARAPELA

15. Yumi kisim wanem skul long stiatok bilong Galesia 6:5?

¹⁵ Yumi mas rispektim ol narapela manmeri na luksave olsem ol i gat rait long mekim disisen bilong ol yet. Yumi olgeta i stap fri long mekim disisen bilong yumi yet, olsem na 2-pela Kristen i no inap mekim wankain disisen long olgeta taim long sait bilong pasin ol i laik bihainim na wok lotu ol i laik mekim. Tingim stiatok bilong Galesia 6:5. (Ritim.) Yumi mas tingim olsem olgeta wan wan Kristen “i mas mekim ol samting em ol yet i gat wok long mekim.” Taim yumi holim dispela tingting, yumi bai rispektim rait bilong ol narapela long mekim disisen bilong ol yet.

16, 17. (a) Bilong wanem sampela Kristen long Korin i sutim tok long ol wanbilip taim ol i yusim fridom bilong ol long mekim disisen? (b) Olsem wanem Pol i stretim dispela hevi? (c) Yumi kisim wanem skul long dispela stori?

¹⁶ Yumi ken skelim wanpela stori bilong Baibel we i soim klia olsem yumi mas rispektim ol bratasista taim ol i bihainim maus bilong bel na mekim disisen bilong ol yet. Ol Kristen long Korin i brukim lain na kamapim liklik grup bilong ol yet taim ol i tok pait long sampela i baim na kaikai abus ol man i ofaim long ol imis na bihain ol i salim long maket. Sampela i tingting olsem: ‘Ol imis ol i samting nating, olsem na i no gat rong long kaikai dispela abus.’ Tasol ol narapela husat i lotuim ol dispela imis long bipo, ol i pilim olsem sapos man i kaikai dispela abus, i olsem em i lotuim ol dispela imis. (1 Kor. 8:4, 7) Dispela tok pait inap kamapim bikpela hevi na mekim ol Kristen long kongrigesen i brukim lain na kamapim ol liklik grup bilong ol yet. Olsem wanem Pol i helpim ol Kristen long Korin long luksave long tingting bilong God?

¹⁷ Pastaim, Pol i tokim olgeta long kongrigesen olsem kaikai i no inap bringim ol i go klostu moa long God. (1 Kor. 8:8) Em i givim strongpela tok olsem ol “i mas lukaut, nogut samting [ol] i gat rait long mekim i pundaunim wanpela husat i no strong.” (1 Kor. 8:9) Bihain, em i givim tok long ol Kristen em maus bilong bel i no strong, na em i tok ol i no ken sutim tok long ol arapela Kristen husat i kaikai dispela abus. (1 Kor. 10:25, 29, 30) Olgeta wan wan Kristen i mas bihainim maus bilong bel bilong ol yet na mekim disisen. Dispela i skulim yumi olsem, yumi mas rispektim ol bratasista taim ol i mekim disisen bilong ol yet long ol liklik samting.—1 Kor. 10:32, 33.

18. Yu bai mekim wanem bilong soim olsem yu laikim tumas presen bilong i stap fri long mekim disisen bilong yu yet?

¹⁸ Jehova i larim yumi i stap fri long mekim disisen bilong yumi yet, na yumi gat fridom tru. (2 Kor. 3:17) Yumi laikim tumas dispela presen bikos yumi inap mekim ol disisen i soim olsem yumi laikim tru Jehova. Oltaim yumi mas soim olsem yumi amamas long presen yumi kisim long God, na yusim dispela presen long onarim God, na rispektim fridom bilong ol narapela long mekim disisen bilong ol yet.