As Bilong Bikpela De Krismas na Nuyia

Wanpela profesa long Polan, em Aleksander Krawczuk, em i raitim stori long wanpela nius (Polityka) na em i stori long as bilong bikpela de Nuyia, na em i tok:

‘Ol Rom bilong bipo i save wokim amamas long de Nuyia. Ol i save bung na lap na mekim nabaut na bihainim laik bilong ol yet. Ol Kristen i lukim dispela pasin bilong ol em i pasin nogut. Ol i save em i pasin haiden na i no samting bilong lotu Kristen. Ol Rom i bin mekim ofa long ol god giaman, olsem na lotu Kristen i tambuim ol Kristen long mekim ol samting bilong de Nuyia na mekim ol amamas bilong en.’

Na profesa i stori long olsem wanem ol i bin makim taim bilong wokim de Krismas, na em i tok:

‘Bihain long yia 300 ol Rom i save wokim amamas long Disemba 25, em bikpela de bilong ol long lotuim san. Ol man i save laikim tru dispela bikpela de, olsem na i no hatwok long putim nem Kristen long dispela de.

‘Gavman bilong Rom i bagarap, tasol ol narapela lain i kisim pasin tumbuna bilong ol na ol i bihainim yet pasin bilong litimapim Disemba 25 na Janueri 1 olsem ol i bikpela de. Long Janueri 1 ol i save pati na kaikai na mekim bikpela amamas na givim ol presen long narapela narapela, maski ol Kristen bilong pastaim i nolaik tru long dispela samting.

Profesa Krawczuk i tok klia, as bilong ol pati na amamas samting bilong Nuyia em pasin haiden. Orait em i ting olsem wanem long ol Kristen i bihainim dispela pasin? Em i ting i stret ol Kristen i insait long ol dispela amamas samting bilong Nuyia o nogat? Em i tok:

‘Ol Kristen bilong nau ol i mas inap long mekim wankain tok olsem ol Kristen bilong pastaim, em ol wanbilip bilong ol. Ol haiden i bin tok bilas long ol dispela Kristen bilong bipo na ol i tok: “Lotu bilong yupela i rabis lotu; yupela i no gat ol bikpela haus lotu o piksa bilong ol man olsem imis samting, o gutpela klos lotu o ol gutpela dis samting bilong mekim lotu.” Tasol ol Kristen i bekim na ol i tok: “Tru mipela i rabis long ol kain samting olsem, tasol long bel mipela i save laikim tumas God na ol narapela man, na dispela i olsem senis bilong haus lotu; na mipela i save bihainim pasin daun na bihainim tok na givim bel long mekim wok, na dispela i olsem senis bilong ol gutpela klos lotu; na mipela i save mekim ol gutpela pasin long ol man, na dispela i olsem senis bilong ol gutpela dis samting bilong mekim lotu.” ’

Long 2 Korin 6:​14-18 Baibel i tok, ol Kristen “i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? Ating Krais i save stap wanbel wantaim Satan, a? Man i bilip long Krais na man i no bilip, tupela i ken holim wanpela kain tingting, a? Olsem wanem, bai yumi bungim haus bilong God wantaim haus lotu bilong ol giaman god? Yupela i save, yumi yet yumi stap haus bilong God bilong i stap oltaim, . . . Olsem na Bikpela i tok moa olsem, ‘Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God.’ ”