Ol Yangpela i Laik Save . . .

Mi Inap i Stap Gutpela Wantaim Papa o Mama Tasol?

OL YANGPELA long Amerika, paslain long ol i winim 18-pela krismas, planti bilong ol bai lusim sampela yia long i stap wantaim papa o mama tasol. Nau i gat 12 milion yangpela manmeri​—long Amerika wanpela bilong ol 5-pela 5-pela yangpela​—i bin kamap long kain famili olsem. Olsem na nau long Amerika dispela kain famili, olsem pikinini i stap wantaim papa o mama tasol, i kamap planti hariap. Tu, ol narapela kantri i gat dispela hevi na namba bilong ol i wok long kamap planti tru, olsem na dispela samting inap kamap long olgeta hap bilong graun.

Ol famili i gat papa o mama tasol i wok long kamap planti, na i kamapim bikpela hevi winim bilong bipo. Wanpela yangpela i tok olsem, planti yangpela long nau i mas “daunim o haitim tru ol tingting i kamap long bel na tingting bilong ol” bambai ol inap long i stap gut wantaim papa o mama bilong ol. Sampela ol i pret, nogut ol i sot long sampela samting, long wanem ol i gat papa o mama tasol. Tasol wanem as bilong dispela kain tingting? Ol i pret nating o olsem wanem?

Wanem As na i Gat Papa o Mama Tasol long Famili?

I no gat planti pikinini bai tok ol i laikim papa o mama tasol, a? Ol i laikim papa na mama wantaim. Dispela em laik bilong Man i bin wokim yumi. (Stat 1:​27, 28) Long Baibel, Efesus 6:1 i tok olsem: “Yupela pikinini, yupela i mas bihainim tok bilong papamama bilong yupela. Yupela olgeta i pas wantaim Bikpela, na dispela pasin em i stretpela pasin bilong yupela i mekim.”

Ating i gat kain kain as na yu no gat papa o mama​—yu stap wantaim wanpela tasol. Ating wanpela samting i bin kamap na papa o mama i bin i dai. (Saveman 9:11) Kain samting olsem tu i bin kamap bipo tu taim ol i raitim Baibel, olsem na dispela tok “pikinini, papa bilong ol i dai pinis” i stap inap 40 taim long Baibel. (Skelim Lo 24:​19-21.) O ating papa o mama i mas lusim yupela long wanem wok mani bilong em i pulim em i go long narapela kantri. Na tu, i gat narapela samting olsem: Wanpela i pamuk, olsem na marit bilong tupela i bruk o ol i katim marit. (Matyu 19:​3-6, 9) O ating paslain long taim mama bilong yu i kamap wanpela Witnes Bilong Jehova em i no marit na em i kisim bel, olsem na em wanpela i mekim bikpela long yu.

Tasol maski wanem kain samting i bin kamap, yu no inap long bosim gut ol samting o ol hevi bilong marit bilong papamama bilong yu. Na nogut yu pilim em asua bilong yu na dispela ol hevi i kamap; na tu, no ken sem long wanem yu no gat papa taim mama i karim yu. Sapos nau mama bilong yu em i wanpela wokboi bilong God Jehova na em i dediket pinis, longtaim pinis God i lusim tingting long ol pasin i no stret bipo em i bin mekim. (Skelim Efesus 2:​2, 4.) Na sapos em i no askim yet God long lusim tingting long ol rong bilong em, dispela i no ken pasim yu long i stap klin long ai bilong God.​—1 Korin 8:3.

Taim yu wok long kamap bikpela insait long famili i gat papa o mama tasol, ating sampela hevi na traim i no save painim ol narapela em ol i save painim yu. Wanpela buk (How to Live With a Single Parent) i tok, ‘Planti ol hevi i painim ol pikinini i gat papa o mama tasol . . . i kamap long wanem ol i gat sampela tingting kranki o ol yet i laik bagarapim i stap bilong ol.’ Dispela kain tingting i save kam we? Olsem wanem yu inap rausim dispela kain tingting?

Taim Famili i Bruk​—I Stap Bilong Ol i Nogut?

Ating yu bin harim sampela man i tok olsem: ‘Ol i olsem, long wanem, famili i bruk,’ o ‘famili i stap nabaut,’ o ‘hap famili tasol i stap,’ o ‘famili i bruk bruk nabaut.’ Ol i mekim dispela tok planti taim, olsem na yu pilim hevi moa, long wanem planti taim yu harim, tasol sampela taim ating dispela tok i sutim bel bilong yu.

Pasin ol narapela i mekim long yu i ken kirapim dispela tingting kranki long famili bilong yu. Sampela tisa long skul, ol i no pilim hevi bilong ol sumatin i gat papa o mama tasol i lukautim ol. Sampela tisa i ting ol dispela pikinini ol i sot long ol gutpela samting long sindaun bilong ol, olsem na taim ol i mekim wanpela samting i no stret, ol tisa i kirap kwik na sutim toktok i go long ol dispela pikinini. Sapos oltaim ol i mekim dispela kain tok, dispela inap mekim na yu tingting planti na bel bilong yu i hevi.

Tasol olsem wanem? Dispela samting bai bagarapim tingting na bel bilong yu long wanem yu gat papa o mama tasol i stap wantaim yu? Nogat! Wanpela nius (The Journal of Marriage and the Family) i tok, taim ‘papa o mama i lusim ol pikinini, dispela inap daunim ol pikinini na ol i no inap wokim gut tingting na mekim hariap sampela wok samting.’ Tasol ‘bihain pikinini i kamap gutpela olsem ol narapela pikinini o em i winim ol narapela pikinini.’ Long pinis bilong dispela stori dispela nius i tok, ‘Tasol nogut yumi ting samting nogut o hevi i save painim olgeta pikinini i gat papa o mama tasol i lukautim ol.’ Long dispela nius yet narapela stori i tok, taim ol i skelim dispela kain famili ol ‘i no painim wanpela as olsem taim famili i bruk dispela bai bagarapim sindaun bilong ol pikinini.’

Dispela toktok inap strongim bel bilong ol pikinini i gat dispela kain hevi, tasol sampela taim tingting kranki inap kamap. Yu ken mekim wanem bambai yu inap daunim dispela ol tingting i no stret?

Winim Tingting Kranki

Pastaim yu mas save olsem nau ol samting bai i narapela kain long bipo. Bai yu bel hevi na pilim olsem yu stap wanpis nau, long wanem papamama i katim marit bilong tupela, o indai i painim papa o mama em yu save laikim tru. Papamama bilong yangpela meri Sara em i gat 13 krismas, ol i bin katim marit taim em i gat 10-pela krismas tasol. Em i tok, “Yu no ken tingting tumas long ol hevi o dispela samting i painim yu nau, na ting ‘sapos dispela samting i no bin kamap . . . ’ na yu stap bel hevi. Na yu no ken ting olsem ol hevi i painim yu nau, long wanem yu gat papa o mama tasol i stap wantaim yu, na ol pikinini i gat papamama i pas gut wantaim, ol i no gat ol hevi na ol i stap amamas tru.”

Maski famili em i gat gutpela sindaun tru, em i no inap long abrusim sampela hevi. Na no ken ting famili bilong yu i sot long sampela samting olsem i no stap long famili i gat papamama​—yu ken ting olsem i narapela kain liklik tasol. Narapela samting tu em olsem​—yu no ken larim toktok bilong ol man o pasin bilong man long pasim maus i sutim bel bilong yu. Ating sampela bai ol i surik long kolim ol tok olsem “papa,” o “marit,” o “katim marit,” o “indai” long taim yu stap wantaim ol, nogut yu bel hevi long dispela tok ol i mekim na yu ting ol i laik semim yu long ai bilong ol narapela. Tasol yu no ken bihainim dispela pasin. Yangpela man Toni, em i gat 14 krismas na em i no bin save long papa tru bilong em, tasol em i tok: “Taim mi i stap wantaim ol narapela na ol i no save kolim sampela ol toktok olsem, mi save kolim tasol. Mi laik bai ol i mas save mi no sem liklik long dispela samting, olsem mi no save husat em papa tru bilong mi.”

Skelim Ol Gutpela Samting i Kamap

Em i bikpela samting tu sapos yu no ken tingim ol gutpela samting i bin kamap bipo o inap painim yu nau sapos papamama i no bin brukim marit bilong ol. Na no ken tingim tumas ol samting yupela i bin amamas wantaim long en long bipo. (Saveman 7:10) Wok long tingim ol gutpela samting i painim yu nau. Olsem ating nau mama em i mas i go long wok mani.a Olsem na ating nau yu gat planti wok long mekim long haus. Yangpela meri, nem bilong em Melani, em i tok olsem: “Sapos yu gat wok bilong lukautim samting long haus, dispela i helpim yu long kamap bikpela kwik long tingting, winim ol narapela wankrismas bilong yu em ol i gat papamama i lukautim ol na ol i no save mekim bikpela wok tumas insait long famili.” Sampela man em ol i save skelim dispela samting ol tu i wanbel long dispela tok. Wanpela man bilong Yunivesiti Harvard, em Robert S. Weiss, em i tok ol pikinini i gat papa o mama tasol ol i kamap “bikpela long tingting hariap, na ol yet i kirap long mekim samting ol i laik mekim, na ol i bosim gut bel na tingting bilong ol.” Dispela i bikpela samting, na ol kain samting olsem insait long famili bilong yu inap helpim yu long winim ol dispela gutpela pasin.

Sapos yu insait long kain famili olsem, ating papa o mama i givim bel long yu na askim ol long kamapim tingting bilong yu long sampela samting. Sampela taim em bai givim ol bikpela askim o tok long yu bambai yu ken skelim, tasol ating yu mas tokaut olsem yu yangpela yet na i gutpela sapos em i askim narapela man i bikpela pinis i ken helpim em, olsem wanpela elda Kristen. Tasol i gat planti samting yupela ken toktok wantaim papa o mama long en, olsem sampela ol hevi i save painim yu. Dispela bai helpim yu long pas gut wantaim papa o mama bilong yu na i helpim yu long rausim sampela ol tingting kranki. Melani, em pastaim yumi stori long em, i tok: “Kirap long taim papamama i katim marit mitupela mama i save toktok gut wantaim; na mitupela i kamap gutpela pren tru.”

Tasol no ken ting olsem hevi bai i no inap painim yu long bihain. Nogat. Dispela bai helpim yu long sanap strong na winim. Baibel i tok: “Na tu, i gutpela sapos ol man [o meri] i karim hevi taim ol i yangpela yet.” (Krai 3:27) Wanpela rot bilong karim ol hevi bilong yu em taim papa o mama tasol i stap wantaim yu na ol samting i painim yu insait long dispela taim. Tingim tu olsem yu no stap wanpis long karim ol dispela hevi. Bilipman David i tok: “Maski papa na mama i givim baksait long mi, Bikpela bai i lukautim mi.”​—Buk Song 27:10.

Yu inap kisim dispela ol gutpela tok bilong God long rot bilong dispela papa o mama i stap na lukautim yu. Yu bai kamap gutpela na kamap gutpela Kristen sapos yu bihainim ol dispela tok. Wanpela elda Kristen nem bilong em Wen, em i tok: “Papa bilong mi i dai taim mi gat 8-pela krismas tasol, olsem na nau mama i mas i go long wok. Planti taim em i kam bek long haus na skin bilong em i les nogut tru na em i no laik mekim sampela wok moa long haus. Tasol oltaim em i mekim Baibel-stadi wantaim mipela, na mipela i go long ol miting Kristen. Nau mi tok tenkyu tru long Jehova long givim wanpela gutpela mama long mi, em i givim bel tru long mekim gut wok bilong em.”b

[Ol Futnot]

[Piksa long pes 23]

Famili i gat papa o mama tasol, ol tu inap i stap amamas