Pas Bilong Ol Man

Beten Insait Long Spot Tenkyu long ol tok i stap long hap “Baibel i Tok Wanem? Beten Insait Long Spot​—God i Save Harim o Nogat?” (Disemba 8, 1990) Mi save beten strong long God taim mi laik pilai spot. Na long ol bikpela pilai, mi save beten long God i ken givim strong long tim bilong mipela long win. (Mipela i no bin winim ol dispela pilai.) Nau mi save ol dispela pilai i no stret wantaim laik bilong God.

M.A.L.S., long Brasil

Ol Yangpela​—Long Nau Taim mi kisim dispela nupela buk long tok Inglis Questions Young People Ask​—Answers That Work, mi kaunim olgeta tok bilong en. Ol stori bilong yangpela (Jun 8, 1991) i kirapim mi long kaunim gen dispela buk. Na mi ken tok olsem, mi kisim bikpela amamas moa taim mi kaunim dispela buk nambatu taim!

B. B., long Amerika

Mi wanpela meri i gat 13-pela krismas, na mi laik tokim yupela olsem mi bin kisim bikpela amamas tru long kaunim ol stori bilong ol yangpela. Mi save kisim Kirap! long olgeta mun long rot bilong pos ofis, tasol taim mi kisim mi save putim long kabot. Wanpela stori bilong ol yangpela long dispela nius i pulim tru ai bilong mi, na mi kaunim na mi painim bikpela amamas tru long mekim olsem. Bihain mi kisim ol narapela nius Kirap! i stap insait long kabot, na mi kaunim sampela stori long ol dispela nius. Nau mi askim mama long stadi wantaim mi long Baibel.

A. P., long Amerika

Man i Kilim i Dai Em Yet Mama bilong mi em i wanpela gutpela wokboi bilong God, tasol long wanpela mun olgeta em i gat bikpela bel hevi tru, na em i kirap kilim i dai skin bilong em yet. Indai bilong em i givim bikpela bel hevi long mipela olgeta, long wanem, mipela i laikim em tru. Mi gat tingting olsem mi no inap lukim em gen, olsem na dispela i mekim na bel bilong mi i bagarap tru. Stori bilong yupela i stap long hap “Baibel i Tok Wanem? Man i Kilim i Dai Em Yet​—Em Inap Kirap Bek?” (Jun 8, 1991) i helpim mi na bel bilong mi i stap isi, long wanem, nau mi save ating mama inap kirap bek.

T. M., long Amerika

Sik Bilong Skin i Dai Taim mi kaunim dispela stori “Mekim Moa Yet Wok Bilong Helpim Ol Narapela” (Mas 8, 1991), mi pilim olsem mi mas tok tenkyu long yupela long kamapim dispela stori, long wanem, em i strongim mi na givim gutpela tingting long mi. Mi no gat sik olsem, tasol sampela taim mi save ting olsem, sapos mi gat dispela sik, bai mi inap mekim wanem. Pasin bilong dispela graun i save putim bikpela hevi long yumi olgeta, tasol Tony Wood i save karim dispela hevi na sampela hevi moa na em i larim Jehova i helpim em.

P. G., long Inglan

Piksa Wokabaut Tenkyu long stori i stap long hap bilong “Ol Yangpela i Laik Save . . . Olsem Wanem Mi Ken Skelim Ol Piksa Wokabaut i Stret Long Lukim?” (Mas 8, 1991) Long nau planti yangpela i no save wanem kain piksa i gutpela bilong Kristen i ken lukim, na ol i no save askim papamama, ol inap lukim wanpela piksa long televisen samting o nogat. Mi laikim dispela tingting olsem sapos wanpela man i lukim wanpela piksa i no stret, i gutpela sapos em i pasim televisen.

J. N. S., long Brasil

Taim Ol i No Tokim Man Em i Gat Sik Kensa Mi laik tok olsem stori bilong Rie Kinoshita i strongim mi. (Epril 8, 1991) Em i pasim pinis tingting long mekim strong wok bilong God maski em i gat sik, na dispela samting i kirapim mi tru. Mi no gat sik, olsem na dispela samting i kirapim mi long i go autim tok long Sarere na long ol narapela apinun samting. Taim skin bilong mi i les, mi tingim Rie​—na dispela i kirapim mi long go autim tok!

T. F., long Kanada