Pas Bilong Ol Man
Papa na Mama i Katim Marit Papa na mama bilong mi i bin katim marit taim mi gat 3-pela krismas tasol. Inap 36 yia, mi no save bai mi mekim wanem long papa, long wanem, em i no stap gut long mama bilong mi. Tingting bilong mi i paul taim mi tingim wanem samting mi mas mekim. Stori bilong yupela i kamap long hap “Ol Yangpela i Laik Save . . . Mi Ken Bihainim Wanem Kain Tingting Long Papa o Mama i Bin Lusim Mipela?” (Ogas 8, 1991) i stori long ol samting yumi ken mekim sapos papa na mama i katim marit. Nau mi save long ol samting mi mas mekim, na i olsem Jehova i holim mi long han bilong em na tok, ‘Mi pilim hevi bilong yu.’
G. M., long Amerika
Mi wanpela mama na mi gat 3-pela pikinini, tasol mi save tingim yet taim papa na mama bilong mi i katim marit. Ol stori yupela i mekim i helpim mi long senisim tingting nogut bilong mi long papa na mama bilong mi, na nau mi wok strong long mekim ol samting bilong helpim mi long mekim gutpela pasin. Mi raitim pinis wanpela pas em mi laik salim i go long papa bilong mi, long wanem, mi laik bai mitupela papa i ken toktok gut wantaim gen.
K. Y., long Japan
Bilong Wanem God i Larim Pasin Nogut i Stap? Kirap long 1985 i kam inap nau mi save kaunim olgeta stori i save kamap insait long nius Kirap! Tasol em namba wan taim tru mi kisim gutpela bekim bilong dispela askim olsem: Bilong wanem God i larim pasin nogut i stap? (Epril 8, 1991) Ol man i gat gutpela tingting ol inap kisim gutpela bekim bilong dispela askim sapos ol i kaunim ol dispela stori yupela i bin kamapim gut.
E. T. V., long Brasil
Pasin Kranki Long Kaikai Mi gat sik anoreksia, na mi amamas tru olsem Sosaiti i stori gut long dispela hevi, na ol i kamapim long ples klia olsem ol meri i gat dispela hevi ol i gat rot bilong stretim. (Julai 8, 1991) Tenkyu long mekim ol dispela stori em ol man i no save kamapim tumas long ol narapela nius samting.
C. L., long Frans
Inap 7-pela yia mi gat sik bulimia. Mama bilong mi i tok, taim mi kamap bikpela dispela sik bai pinis. Mi stap sikspela mun tasol dispela sik i stap yet. Olsem na mi stori long dispela hevi bilong mi long sampela meri Kristen, na ol i save kam lukim mi bilong helpim mi. Wanpela taim tasol mi bin pundaun long dispela hevi. Sapos ol narapela i helpim yu em gutpela samting tru, tasol bikpela samting em olsem mi no laik mekim wanpela samting na bai pren bilong mi, em Jehova, i no amamas moa long mi. Mi bin kaunim ol narapela buk i stori long dispela hevi, tasol ol stori yupela i raitim i kamapim klia na i stori gut long dispela hevi.
E. S., long Amerika
Taim mi gat 13-pela krismas, mi bin kisim pasin bilong kaikai na traut. Insait long wanpela aua, mi inap kaikai ol samting em 10-pela man inap kaikai. Mi lukim wanpela dokta i save gut long dispela hevi, na em i helpim mi long senisim dispela pasin bilong mi. Nau mi wanpela Witnes Bilong Jehova i baptais pinis. Tenkyu tru long helpim mi long ol stori em yupela i wok strong long kisim save long en na bihain yupela i raitim bilong helpim mipela.
N. I., long Japan
Tenkyu tru long ol stori i kamapim hevi bilong kaikai. Tupela yia bipo mi bin i gat sik anoreksia, na planti taim mi pundaun gen long bihainim dispela laik na pasin bilong bipo. Taim mi beten long Jehova, dispela samting i helpim mi tru. Mi amamas long lukim olsem nius Kirap! i save helpim ol man i gat sik, na i mekim gut bel bilong ol long gutpela pasin sori na pasin bilong tingim gut narapela man.
L. H., long Japan