Wanem Samting Inap Mekim Gut Bel Bilong Ol?

WANPELA meri, Janice Lord, long wanpela buk bilong em (Survivor Grief Following a Drunk-Driving Crash) em i tok, taim wanpela bilong famili i kisim bagarap long rot long wanem narapela draiva em i kisim planti dring tumas na i draiv, “i no gat taim bilong famili i tok ‘Gutbai’ long em o tokim em, ‘Mi laikim yu tru.’ ”

Na taim man i bagarap long ka na em i dai, i gat ol narapela hevi i save painim famili bilong em, olsem pret nogut, na belhat, na bel wantaim tingting i bagarap. Taim kain bagarap olsem i painim wanpela long famili, i hatwok tru long ol i lusim tingting long dispela. Na bai ol i pilim olsem bel hevi bilong ol bai stap oltaim na i no ken pinis.

Long olgeta wan wan yia planti manmeri i save bagarap long ol ka, olsem na ol bikman bilong lo i skelim dispela samting na ol i wokim ol lo na ol i wok long painim kain kain rot bilong daunim dispela hevi. Wanpela ofisa i tok, planti man bilong dring na draivim ka ol i no gat strong bilong bosim skin, na em i ting i gutpela sapos ol i ken putim sampela kain skul bilong skulim ol dispela man i save dring planti, na long dispela rot ol inap strongim ol dispela man long bosim gut skin na lusim dispela pasin bilong dring na draiv.

Wanem Samting Inap Stretim Dispela Hevi?

Tru yumi laik bai dispela samting i mas kamap, tasol i no gat wanpela man o wanpela oganaisesen bilong ol man em inap long pinisim dispela bel hevi bilong ol man taim wanpela long famili i kisim bagarap long ka na em i dai. Na i no gat wanpela man long graun inap long kisim bek ol man i dai pinis. Olsem na i mas i gat nupela pasin i senisim ol pasin bilong nau, olsem ol man i tingim tumas ol yet na ol i mekim ol samting bilong givim amamas long ol, maski em i bagarapim laip bilong ol narapela man.

Olsem wanem? I gat as na yumi ken ting olsem dispela gutpela samting bai kamap tru na ol hevi bilong nau i no ken i stap moa? Em nau, i gat as na yumi ken bilip olsem. Ol gutpela samting bai i kamap long nupela taim hia long graun na bai i no gat ol bagarap i kamap, na ol man bipo ol i bin kisim bagarap na i dai ol bai i kirap bek. Bikpela amamas tru bai kamap taim lain bilong ol i lukim ol gen! Em nupela taim tru bai kamap, na bihain ol i no ken tingim moa ol dispela hevi​—em bai pinis olgeta.

Baibel i stori long dispela nupela taim bai i kamap, em i tok: “[God] bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.” (Aisaia 25:8) Na tu, ol man i dai pinis bai i kirap bek long matmat. Aposel Pol i tok: “Mi bilip . . . long God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Jisas na ol aposel bilong em ol i kamapim long ples klia dispela samting taim ol i kirapim bek sampela ol man i dai pinis.​—Luk 7:​11-16; 8:​40-42, 49-56; Jon 11:​1, 14, 38-45; Aposel 9:​36-42; 20:​7-12.

Long nupela taim olgeta man wantaim ol man i kirap bek bai ol i kisim ol gutpela samting, na bihain skin bilong ol bai i kamap gutpela olgeta. God bai i oraitim olgeta samting long skin na tingting tu wantaim: “Na long dispela taim, i no gat man . . . bai i tok olsem, ‘Mi gat sik.’ ” “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.”​—Aisaia 33:24; 35:​5, 6; lukim tu Matyu 15:​30, 31.

Baibel i stori long sindaun bilong ol man long nupela taim olsem: “[God] bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (Kamapim Tok Hait 21:4) Na Man i laik kamapim ol dispela gutpela samting em i tok: “Na ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.”​—Aisaia 65:17, 18.

Husat i tok na bai ol dispela bikpela senis i mas kamap? Em Man bilong wokim olgeta samting, em God Jehova tasol; em i gat olgeta strong na em inap tru long mekim ol dispela samting. Long Baibel em i tok promis pinis long “stretpela pasin tasol bai i stap” long graun, na liklik taim nau bai dispela nupela taim i senisim pasin bilong nau i stap klostu long pinis bilong “las de,” olsem ol man i save tingim ol yet tasol, na ol i pait na bagarapim ol man.​—2 Pita 3:13; 2 Timoti 3:​1-5, 13; Sindaun 2:​21, 22.

Tok Bilong God i Mekim Gut Bel

Hevi i save painim ol Witnes Bilong Jehova tu, wankain olsem ol narapela manmeri bilong dispela taim nogut nau i stap long graun, na ol i no ting olsem bai God i mas lukautim ol na i dai i no ken painim ol o bagarap i no ken painim ol. Nogat. Ol i save, i no laik bilong God long mekim olsem nau long dispela taim. Long Saveman 9:​11 Baibel i tok: “Taim nogut i save painim yumi olgeta.” Olsem na ol Witnes Bilong Jehova i save wok strong long kirapim ol man long lukim tok bilong God long Baibel, long wanem, ol tok promis bilong em tasol inap long strongim na mekim gut bel bilong ol man i bilip long ol dispela tok.

Wanpela meri em i wanpela Witnes Bilong Jehova, bel na tingting bilong em i bagarap stret taim wanpela spakman i bamim ka bilong tambu brata bilong em na em i dai, na meri bilong em (em susa bilong dispela meri Witnes) i kisim bikpela bagarap long het bilong em, olsem na nau dispela meri yet i mas lukautim em oltaim. Dispela man wantaim meri bilong em ol i bin kisim bagarap ol tu i Witnes Bilong Jehova. Dispela meri i tok olsem:

“Klostu wanpela yia olgeta mi save krai tasol na mi belhat. Bel bilong mi i nogut tru long dispela yangpela man i bin kamapim dispela samting nogut. Na tu, mi belhat long papamama bilong em, long wanem ol i no bosim gut pikinini bilong ol. Na sampela taim mi kros long God na long ol ensel, long wanem ol i no bin pasim dispela samting na bai bagarap i no ken painim ol. Ol i gutpela man na meri na tupela i wokboi bilong em!

“Tru, mi save olsem i no asua bilong God na i no laik bilong em na dispela hevi i painim ol. Tasol mi bin ting olsem God em i bosim olgeta wokabaut bilong yumi na em bai lukautim yumi na hevi i no ken painim yumi. Nau mi pilim olsem mi mas kisim stretpela tingting long dispela samting na mi kirap long painim ol tok bilong Baibel bilong bekim ol askim bilong mi.

“Inap sampela taim bihain mi stretim tingting isi isi long dispela samting. Mi bin pilim olsem Asap, em i tok long Buk Song sapta 73, i olsem i no gat hevi i save painim ol man nogut. Tasol em i tok moa long dispela hap bilong Buk Song olsem dispela tingting bilong em i no stret. God i no save helpim na lukautim ol man nogut​—liklik taim bihain bai em i bagarapim ol olgeta.

“Bihain mi save dispela tingting bilong mi i no stret, na i no asua bilong God na dispela hevi i painim mipela. Mi no bin skelim gut ol tok bilong Baibel. God i no tok olsem ol bagarap na sik na dai i no ken painim yumi long nau. Nogat. Tasol em i tok promis olsem bihain bai i gat ol gutpela blesing tru i kamap long graun long nupela taim bilong em. Nau tingting bilong mi i klia long Tok bilong God, olsem em bai lukautim yumi long ol samting bilong spirit, na i no bilong lukautim yumi long skin nau long dispela taim. Olsem na isi isi belhat bilong mi i pinis. Na tu, nau mi klia long as bilong ol dispela samting nogut i painim yumi, em Satan tasol. Long bipo yet em i man bilong kilim man i dai na em i man bilong giaman, kirap long taim em i birua long God. Baibel em i tokaut klia olsem Satan em i god bilong dispela graun em ol kain kain hevi i pulap long en.​—Jon 8:44; 2 Korin 4:4.

“Na taim mi save gut olsem bilong wanem i gat ol pasin nogut i kamap, na bilong wanem God i larim pasin nogut i stap, na long wanem rot em bai i pinisim, em nau, mi save God em i no birua bilong yumi​—em i Man bilong helpim na kisim bek yumi!

“Nau bel bilong mi i stap isi taim mi save gut olsem long rot bilong spirit holi bilong em, Jehova i save strongim ol wokboi bilong em. Baibel i tok promis olsem spirit holi bilong Jehova bai i givim ‘bikpela strong’ long ol, em i ‘strong bilong God.’ Olsem na ol inap long karim ol kain kain hevi. Na tu em i mekim gut bel bilong yumi, long wanem yumi save yumi inap lukim ol lain bilong yumi long taim bilong kirapim bek ol man i dai pinis. Olsem na yumi inap winim ol bikpela hevi i save painim yumi.”​—2 Korin 4:7.

Gutpela Sindaun long Bihain

Inap planti yia pinis kain kain hevi i bin painim planti manmeri na ol Witnes Bilong Jehova tu. Dispela i truim Tok bilong God, em i tok taim nogut i save painim yumi olgeta. (Saveman 9:11) Tasol ol samting i painim ol wokboi bilong God i strongim Tok bilong God, olsem em i save strongim na mekim gut bel bilong ol manmeri bilong em long taim bilong hevi. Na Baibel i tok promis tu olsem i gat gutpela sindaun tru bihain bai i kamap long graun na ol samting nogut bilong nau, olsem ol bikpela bagarap samting, bai i no ken kamap moa.

Na em i gutpela samting tru long save olsem: Insait long nupela taim God bai kamapim, bai i gat gutpela pasin sori tasol i stap na olgeta bai i tingim ol narapela na mekim gut long ol, na olgeta bai amamas long dispela gutpela presen God i givim long yumi​—em laip bilong yumi. Ol gutpela pasin bai i senisim pasin bilong ol man long tingim ol yet na pasin bilong bagarapim ol narapela, em nau i wok long nogutim ol man long planti hap bilong graun. Na ol pasin bilong ol bikpela man bilong bisnis long giamanim ol man na pulim mani bilong ol na kisim bikpela winmani, em tu bai pinis. Na ol hevi bilong nau i mekim na ol man i tingting planti na i pret long ol samting i kamap, na ol i pilim olsem ol i mas dring planti o kisim drak bilong daunim ol dispela hevi. Tasol ol dispela hevi tu bai i pinis olgeta.

Long nau, pasin sori tru i stap namel long ol Witnes Bilong Jehova na ol i pas gut wantaim na i stap olsem brata brata tru. (Jon 13:​34, 35) Olgeta manmeri i insait long dispela lain, olgeta i wok strong wantaim long helpim ol narapela em hevi i bin painim ol. Ol i amamas long helpim na mekim gut bel bilong man i gat laik long ol i helpim em, olsem sampela i bin mekim long ol yet bipo.​—2 Korin 1:​3, 4.

[Piksa long pes 13]

Baibel i tok promis olsem ol man i dai pinis bai ol i kirap bek