Ol i Mekim Bikpela Long Ol Pikinini Long Olgeta Hap—Mekim Wok Papamama Long Pasin Sori, Stretim Ol, Stap Gutpela Piksa, Tingim Ol Samting Bilong Spirit
PAPAMAMA bilong sampela kantri i salim ol pas i kam na toksave long olsem wanem ol i bin mekim gut wok bilong lukautim pikinini taim ol i liklik yet i go inap long taim ol i bikpela. Olgeta i Witnes Bilong Jehova na tok bilong ol i kamapim klia wok bilong papamama long 4-pela samting, em dispela 4-pela samting mipela raitim long het-tok antap. Ol dispela pas i kamapim sampela samting tasol ol i bin mekim bilong skulim ol pikinini.
Long Hawaii
“Baibel i tokim yumi, pasin sori em i nambawan ‘bikpela’ samting. Long sindaun bilong famili, pasin sori i mas i stap. Mitupela meri bilong mi Karol i bin kamapim dispela bikpela samting, olsem pasin sori, long marit bilong mitupela. Mitupela i pas gut wantaim. Mitupela i laik stap wantaim. Mi mas tok strong olsem, sapos man na meri i pas gut wantaim na tupela i amamas long marit bilong tupela, dispela i bikpela samting long helpim ol long mekim gut ol wok bilong mekim bikpela long ol pikinini.
“Mi tingim yet ol strongpela tingting long bel bilong mi taim namba wan pikinini bilong mipela i kamap. Mipela kirap nogut long dispela nupela laip i kamap. Mi tingim pasin bilong Karol taim em i givim susu long pikinini bilong mipela, Resel, em i amamas tru. Mi amamas long wanem, Karol yet i amamas, tasol mi bel hevi liklik tu—mi lukim dispela amamas bilong em na nau mi mangal liklik long dispela samting. Karol i pas gut wantaim liklik pikinini Resel, tasol olsem wanem long mi? Mi pilim olsem isi isi tupela i rausim mi long famili. Tasol Jehova i helpim mi na mi inap kamapim tingting bilong mi long Karol na Karol em i sori tru na em i helpim mi.
“Taim mi kamapim pinis tingting bilong mi long Karol, mi kirap mekim olgeta wok samting bilong pikinini, na wasim laplap em pikinini i bin pekpek long en tu! Long dispela rot mi inap pas gut long nupela pikinini bilong mipela. Bihain long Resel mipela i kamapim 5-pela pikinini moa. Rebeka em i laspela na nau em i gat 8-pela krismas. Mipela i bin mekim Baibel-stadi wantaim olgeta wan wan pikinini bilong mipela.
“Narapela samting mipela bin mekim taim ol pikinini i liklik yet—mitupela Karol i bin amamas long toktok wantaim ol taim ol i nupela yet. Mipela stori wantaim long ol kain kain samting. Sampela taim mipela bin stori long Jehova na olgeta naispela samting em i bin wokim. Na sampela taim mipela bin stori long ol samting bilong tok pani. Tru, mipela wok long lainim ol long sampela samting, tasol mipela bin mekim long pasin isi na olsem mipela pilai long dispela samting. Mi ting dispela kain tok i bin helpim gut mitupela long pas gut wantaim ol pikinini bilong mipela, na i helpim famili bilong mipela long toktok gut wantaim.
“Jehova i lainim yumi olsem ol samting bilong spirit em bikpela samting, olsem yumi mas givim yumi yet long helpim narapela. Mitupela Karol i no bin holim planti mani kago samting, tasol mipela i no tingim dispela samting. Sapos mipela i wok strong long kisim mani kago samting, bai mipela i no gat taim bilong mekim laik bilong Jehova na helpim famili bilong mipela. Mipela bin mekim stret olgeta samting.” (Nau Karol i kamapim tingting bilong em.)
“Mi ting sapos mama i givim susu long ol pikinini, dispela i mekim na wantu ol pikinini bai pas gut tru wantaim mama. Mama i tromoi bikpela taim long holim pikinini na karim em i go i kam olsem na mama i pas gut wantaim pikinini. Mama i no inap lusim pikinini longtaim liklik, winim tupela aua samting, nogat. Mitupela man bilong mi Ed i bin pasim tok olsem, mipela no ken larim narapela i lukautim pikinini bilong mipela. Mi yet mi laik lainim ol pikinini bilong mi na mekim bikpela long ol. Olsem na taim ol pikinini i liklik, mi no bin mekim wok mani. Ating dispela i bin helpim ol pikinini long save, ol i bikpela samting long mitupela papa. Sapos yu laik pas gut wantaim pikinini bilong yu, yu mas lusim taim na stap wantaim em. Ol samting bilong skin i no inap amamasim pikinini olsem.
“Taim ol pikinini i wok long go bikpela, nau mi mas stretim tingting bilong mi, olsem ol i no liklik pikinini moa. Dispela i hatwok tru, long wanem, mi mas save, nau ol i wok long go bikpela, olsem na i gat planti samting ol yet inap mekim. Long dispela taim tu mi pret liklik, long wanem, nau mi save tingting, ol samting mipela bin lainim ol pikinini long en na stretim ol long en, em bai karim gutpela kaikai o nogat. Taim ol i bikpela pinis yu no inap mekim dispela wok. Long dispela taim yu no inap lainim ol long bihainim stretpela pasin samting, na long givim bel long ol manmeri, na long givim bel tru long Jehova, nogat. Yu mas kirap mekim ol dispela samting taim ol i liklik pikinini yet.
“Sapos yu bin wok strong long lainim ol pikinini long ol lo bilong Baibel, na nau yu lukim ol i givim bel long Jehova, em taim bilong amamas tru.”—Edward na Carol Owens.
Long Simbabwe
“Ol pikinini i olsem ‘presen’ Jehova i givim long yumi. Baibel i tok olsem long Buk Song 127:3. Mipela tingim dispela tok bilong Baibel na em i bin helpim mipela long mekim gut wok papamama long ol dispela ‘presen’ bilong mipela. Wanpela bikpela samting long famili bilong mipela, em mipela save mekim olgeta samting wantaim—beten wantaim, stadi wantaim long Baibel, lotu long Jehova wantaim, wok wantaim, go lukim ol pren wantaim, na pilai wantaim.
“Sampela taim mipela mas stretim ol pikinini. Wanpela nait yangpela pikinini man bilong mipela em i no kam bek hariap long haus. Mipela i bin tingting planti long dispela. Taim em i kamap long haus em i no stori gut long mipela long wanem samting i bin pasim em. Mipela ting wanpela hevi i bin kamap, tasol mipela ting long askim em tumora. Long biknait mipela i harim wanpela i paitim dua bilong rum slip bilong mipela. Em pikinini bilong mipela na aiwara i stap long ai bilong em.
“Em i tok, ‘Papa, Mama, inap sampela aua nau na mi no bin slip, na as bilong dispela i olsem: Mi no bin bihainim tok bilong yutupela taim yupela givim tok bilong Baibel long mi, olsem mi no ken poromanim ol manki nogut. Bihain long skul sampela ol manki i strong long mi mas go wantaim ol long waswas. Mi go wantaim ol na wanpela bilong ol dispela manki i pulim mi i go insait long wara. Sapos narapela manki i no bin helpim mi, ating mi bai dring wara na dai. Olgeta i lap long mi na tok mi man bilong pret. Mi kam stret long haus, tasol mi no kam insait—mi stap ausait, long wanem, bel bilong mi i gat tok. Mi sori tru long mi no bin harim tok bilong yupela taim yupela i toksave long mi long tok bilong Baibel long ol poroman nogut.’—1 Korin 15:33.
“Em i krai na mitupela mama tu i krai. Mitupela i amamas, long wanem, em i save em i bin popaia, tasol mipela stretim em bambai em i ken save em i bin mekim rong. Kisim Bek 34:6, 7 i tok, Jehova em i man bilong marimari na sori, na man bilong lusim tingting long ol kain kain sin, tasol em i ‘mekim save long ol man i gat asua.’ ”—David na Betty Mupfururirwa.
Long Brasil
“Mi meri wanpis na mi wanpela i mekim bikpela long pikinini man bilong mi. Na tu, mi save mekim wok tisa. Em i hatwok long skulim na stretim ol pikinini. Ol papamama mas toktok gut wantaim ol, na stretim ol long savepasin, na kamapim gutpela pasin long ol. Mi lain long kamap meri bilong putim gut yau long harim tok bilong pikinini bilong mi. Em bikpela samting long toktok gut wantaim pikinini na long helpim em long kamapim tingting bilong em tu. Taim mi skelim ol mani bilong baim kaikai na haus samting, mi larim pikinini i helpim mi long skelim dispela samting. Taim pepa bilong paua i kam, o pe bilong ol klos o su samting i go antap, mitupela pikinini i save sindaun na skelim ol dispela samting wantaim.
“Em bikpela samting long tok amamas long pikinini sapos em i mekim wanpela gutpela samting. Taim sampela samting i kamap, mi bin soim pikinini bilong mi bilong wanem yumi mas bihainim ol lo bilong Baibel. Wanpela taim mi bin stikim em, long wanem, planti taim mi toksave long em long wanpela samting, tasol em i no bin harim tok. Em hatwok long mi mekim olsem, tasol dispela pasin i bin karim gutpela kaikai! Taim pikinini i wok long go bikpela, sampela taim em i mekim gutpela pasin, na sampela taim, nogat, tasol sapos yumi lainim pikinini na stretim em, gutpela samting bai kamap. Pikinini bilong mi i save tokim mi long ol hevi bilong em.
“Mi mas was gut, nogut mi lusim pasin bilong toktok gut wantaim pikinini bilong mi. Bilong mekim olsem mi save was gut, nogut wok mani i pasim mi tumas na mi no gat taim bilong toktok wantaim pikinini man bilong mi. Taim hevi i kamap namel long mitupela, mi wok long putim yau na harim gut tok bilong em, na Jehova i save helpim mipela long winim ol dispela hevi. Mi save tokim em, mi tu mi save popaia. Wanpela taim mi bin belhat tru na mi tokim em long pasim maus. Em i tokim mi, sapos yumi tokim wanpela man long pasim maus dispela i makim olsem yumi no laikim dispela man. Tok bilong em i sutim tru bel bilong mi. Olsem na mitupela i bin sindaun na toktok gut longpela taim.”—Yolanda Moraes.
Long Ripablik Bilong Koria
“Mi amamas long bihainim ol lo bilong Baibel long famili bilong mi. Buk Lo 6:6-7 i stap tru long bel bilong mi. Olsem na mi bin wok strong long i stap planti taim wantaim ol pikinini bilong mi, long wanem mi laik stap klostu long ol na lainim ol long putim ol lo bilong Baibel long bel na tingting bilong ol. Sampela taim mi singautim ol misineri na ol manmeri i wok long Betel long kam long haus bilong mipela; stori bilong ol inap helpim pikinini bilong mi long tingting long wok bilong Jehova, olsem wok misineri samting.
“Namba wan samting ol papamama i mas mekim taim ol pikinini i bikhet samting, em ol i mas kamapim pasin bilong spirit. I no hatwok long kros long ol pikinini, tasol yumi ol papamama i no ken kros kwik—yumi mas kamapim gutpela pasin. Em bikpela samting long litimapim nem bilong pikinini na larim em i kamapim tingting bilong em sapos rong i bin kamap. Sapos yu no save gut long as bilong pasin kranki o rong em pikinini i bin mekim, orait, no ken ting em i giaman. Taim yu mas stretim pikinini, pastaim toktok wantaim em na bai em i save, olsem wanem pasin bilong em i no amamasim Jehova na papamama. Mekim dispela samting pinis, orait, bihain stretim em. Taim mi stikim ol pikinini man bilong mi, planti taim ol i bin tok, ‘Papa, mi no save bilong wanem mi bikhet. Mi bin mekim pasin longlong.’ Ol pikinini i save laikim papamama em ol i save stretim ol, long wanem ol i save papamama i laikim ol na ol i laik helpim ol.
“Ol papamama i mas was gut taim pikinini i kirap mekim pasin nogut. Taim namba wan pikinini man bilong mi i stap long hai-skul mi bin harim ol musik nogut long rum slip bilong em. Mi kisim save olsem em i bin insait long wanpela lain long skul na dispela i mekim na em i kisim sampela pasin nogut bilong dispela graun. Sampela ol narapela manki bilong dispela lain long skul i subim em long smok. Mitupela i bin toktok long ol hevi bilong dispela pasin bilong smok, na em i kamapim tingting bilong em yet olsem em i mas lusim dispela lain long skul, na em i bin mekim olsem. Sampela samting long skul i no gutpela bilong em i mekim, olsem na mitupela mama i stretim rot bambai mipela famili i ken mekim sampela samting na kisim amamas wantaim, na mekim sampela samting wantaim insait long kongrigesen tu bambai ol pikinini i ken kisim amamas.
“Laspela samting mi laik tokaut long en em olsem: Ol papamama i mas bihainim gutpela pasin bambai pikinini i ken bihainim. Olgeta taim mi bin tokim tupela pikinini man bilong mi, mi laik insait long wok bilong autim tok long olgeta taim, olsem wanpela painia. Taim namba 2 pikinini bilong mi i pinis long skul, mi lusim wok mani, olsem ritaia, na mi go insait long wok painia. Tupela pikinini man bilong mi i lukim olsem mi givim bel long mekim dispela wok, olsem na tupela tu i insait long en. Tupela i bin kalabus long wanem, tupela i no laik insait long ami samting, tasol taim tupela i lusim kalabus tupela i kirap gen long mekim wok bilong autim tok long olgeta taim, na tupela i mekim inap long nau.”—Shim Yoo Ki.
Long Swiden
“Mipela i bin mekim bikpela long 7-pela pikinini, 5-pela pikinini man na 2-pela pikinini meri. Olgeta i bikpela pinis na ol i mekim wok bilong autim gutpela tok bilong Kingdom. Taim ol i liklik yet ol i bin go long olgeta miting bilong kongrigesen na ol i bin autim tok wantaim mitupela meri bilong mi. Taim mipela autim tok, isi isi mipela lainim ol long paitim dua bilong haus, na tok ‘gude,’ na kolim nem bilong ol long man bilong haus, na givim liklik nius o magasin samting long man bilong haus. Taim ol i liklik yet ol i bin insait long Skul Bilong Wok Autim Tok.
“Sampela taim ol hevi i bin kamap na mipela mas mekim sampela samting bilong stretim. Long kain taim olsem, pasin sori, na no ken kros hariap, na no ken bikmaus o tok pait, dispela i bikpela samting. Mipela stretim ol hevi long rot bilong toktok na bai ol i save, Jehova i ting olsem wanem long dispela samting. Mipela lainim ol long lukautim gut mani, na taim ol i bikpela liklik ol i mekim liklik wok mani olsem tilim niuspepa, wok long gaden bilong ol man, na kain wok olsem. Taim ol i go lukim ol bubu, ol i lain long ol hevi bilong ol lapun na dispela i helpim ol long sori long kain man olsem.
“Taim mitupela meri bilong mi i bin marit inap 30 yia, mipela bin kisim dispela pas long ol pikinini. Pas i tok:
“ ‘Long Gutpela Papamama Bilong Mipela:
“ ‘TENKYU TRU LONG OLGETA SAMTING YUPELA BIN MEKIM! Yupela i bin mekim gutpela pasin sori long mipela, na yupela i bin lainim gut mipela long trupela bilip, na long gutpela samting mipela inap wetim. Mani i no inap baim dispela samting, olsem na mipela givim bel tru long yupela, long wanem, yupela i gutpela papa na mama. Mipela ol pikinini bilong yupela.’
“Taim mipela i tingim ol dispela 20 yia 20 yia mipela bin lusim long ol wan wan pikinini, mipela tok tenkyu tru long Jehova, em Papa bilong yumi long heven, long wanem, em i bin marimari tru long mipela.”—Bertil na Britta Östberg.
Ol Liklik Tok Moa Bilong Ol Papamama
“Taim mama i givim susu long pikinini, dispela em rot bilong Jehova long helpim mama na pikinini long pas gut wantaim. Tasol papa tu inap pas wantaim pikinini taim em i holim em. Long olgeta nait mi amamas tru long holim ol pikinini bilong mipela na meknaisim ol inap ol i slip.”
“Tru mi papa na mi no inap givim susu long pikinini, tasol mi inap stap klostu long ol taim mi wasim ol long olgeta nait. Long mi na long ol pikinini, dispela taim em taim bilong pilai! ”
“Wan wan taim mi bin kisim ol wan wan pikinini i go wantaim mi bilong kaikai long wanpela haus kaikai. Ol i laikim tru dispela samting, olsem ol inap stap wantaim papa.”
“Taim ol i wok long i go bikpela, isi isi mipela larim ol i mekim sampela wok moa.”
“Yumi i mas holim pikinini na kis long em planti taim. Sapos yumi no mekim olsem, ol pikinini i no ken holim yumi o kis long yumi.”
“No ken kros kwik. No ken toktok planti long ol liklik liklik samting. Sapos yu krosim ol wanpela taim, tok amamas long ol inap fopela taim! ”
“Givim ol gutpela samting bilong yu yet long ol na ol bai i givim ol gutpela samting bilong ol long yu.”
[Piksa long pes 9]
Yumi mas mekim gutpela pasin sori long ol liklik pikinini olsem Rebeka
[Piksa long pes 10]
Lusim hap taim bilong mekim ol samting wantaim ol pikinini bilong yu; dispela bai helpim yupela long pas gut wantaim