Ol Man i Wok Long Pulap Long Graun—Em Bikpela Hevi Tru
“BEBI Namba 5 Bilion.” Em nem gavman bilong Saina i givim long wanpela nupela pikinini meri nem bilong em Wang He, em mama i karim em long wanpela haus sik long Beising long 12 klok biknait long Julai 11, 1987. Yumi no save, tru dispela nupela pikinini em i namba 5,000,000,000 o nogat, tasol maski, em i kamap stret long taim Yunaitet Nesen i makim olsem namba bilong olgeta man long graun bai inapim dispela namba. Gavman bilong Saina i mekim dispela tok bilong kirapim ol man long tingim wanpela bikpela hevi em i stap long Saina na long ol narapela hap, em olsem: Ol man i wok long pulap tru long graun.
Ol saveman i tok olsem ol man i wok long pulap hariap long graun, na ol dispela saveman i tingting planti. Ol i tok, inap 40 yia bihain, dispela namba bai i go bikpela inap 10 bilion. Ol i tok, bai kaikai i sot, na dispela bai kamapim bikpela hangre tru. Na taim yumi tingim ol samting ol man i save kisim long graun, olsem ain na wel na kopa samting, dispela tu bai pinis, long wanem, planti man i mekim wok long em, na dispela samting inap kamapim bikpela hevi tru. Tasol sapos ol samting i no pinis, na kaikai tu em inap, bai yumi bagarap tu, long wanem, ol man i wok long bagarapim graun long nau. Ol i wok long bagarapim ol yet, long wanem, ol i bagarapim win, na wara, na graun, na sapos i gat planti man, dispela hevi bai go bikpela hariap tru. Olgeta dispela samting i olsem i tokaut long wanpela bikpela bagarap i laik kamap.
I gat wanem samting yumi inap mekim? Ol man i tingim planti rot bilong stretim ol dispela hevi. Sapos yumi no mekim sampela samting hariap bambai ol man i no ken kamap planti olsem, orait, sindaun bilong ol man long bihain bai i bagarap. Tasol sampela i bin tingim ol samting i bin kamap long bipo, na ol i tok bai yumi painim rot bilong stretim ol dispela hevi bilong kaikai, na ol man i sot long graun, na pipia i bagarapim graun, na ol narapela hevi tu. Na sampela i ting ol man bai sindaun inap tru long graun, olsem na yumi no ken kirap nogut. Tru i gat planti narapela kain tingting long dispela, olsem na dispela samting em wanpela bikpela hevi tru.
Tasol ol dispela tok i kamap long maus bilong ol man i stap long hap i gat bikpela hap graun na planti mani kago samting. Ol i tok olsem, long wanem, ol i pilim olsem i stap na gutpela sindaun bilong ol long bihain bai bagarap. Tasol olsem wanem long ol man i stap long ol kantri i no gat planti samting, na ol man i pulap tru? Ol i gat wanem tingting long ol dispela samting? Ol i stap olsem wanem long ol dispela liklik hap bilong graun?
Nius Kirap! bai stori long ol samting i kamap long ol dispela hap i gat planti tumas man, na bai yu ken kisim save long ol samting i wok long kamap.