‘Ol Pikinini i Gutpela, Tasol Yumi Mas i Gat Pikinini Man’
Winim 850 milion manmeri i stap long India na long ol wan tausen wan tausen i gat 31 nupela pikinini i kamap, na long olgeta yia i gat 26 milion nupela pikinini i kamap, na dispela namba i wankain long olgeta manmeri long Kanada. Olsem na gavman i kirapim wanpela wok bilong pasim ol manmeri na bai ol i no ken kamapim planti pikinini tumas. Olsem wanem? Wok bilong ol i kamap gutpela? Na i gat wanem sampela hevi ol i mas abrusim?
“SAPOS yu no winim yet 20 krismas, maski long kamapim pikinini! Tasol sapos yu winim pinis 30 krismas, yu no ken tru kamapim pikinini! Tupela pikinini em inap!” Dispela toksave wantaim piksa i gat kala kala ol i pasim long wanpela haus em hetkwota bilong family planning long Bombe, long hap bilong India. Na i gat narapela piksa ol i wokim, em i makim wanpela mama i gat 5-pela pikinini, na i olsem mama i gat bikpela hevi na i hatwok tru long lukautim ol. Toksave bilong en i tok olsem, ‘No Ken Kamapim Planti Pikinini na Bihain Yu Bel Hevi Long Dispela!’ Ol toksave i laik tokaut klia olsem: Tupela pikinini long famili, em inap. Tasol i hatwok tru long kirapim ol man long bihainim dispela toksave bilong gavman.
Wanpela buk (Hindu Manners, Customs and Ceremonies) i tok: “Long lain Hindu sapos man i gat planti pikinini, em i amamas tru. Tru tumas, ol pikinini i olsem gutpela blesing long famili. Maski papamama i gat planti pikinini pinis, ol bai beten long kisim sampela moa.” Long lotu bilong ol, pikinini man i gat bikpela namba long papa bilong wanpela famili. Dispela buk i tok moa, ‘sapos man i no gat wanpela pikinini man o tumbuna pikinini man, dispela em i samting nogut tru, long wanem bai i no gat man bilong mekim ol samting long taim bilong i dai bilong papa. Man bai i no gat rot tru bilong i go long kisim gutpela laip taim em i dai pinis.’
Na tu, ol pikinini man i mas bihainim lotu bilong ol tumbuna bilong ol. Wanpela man em A. L. Basham, em i tok long wanpela buk (The Wonder That Was India) olsem: ‘Ol i strong long ol i mas i gat pikinini man. Na dispela i kirapim ol Hindu long laikim planti pikinini man; sapos nogat, lain bilong ol bai i pinis olgeta.’
I no ol samting bilong lotu tasol ol i mas bihainim—ol i mas bihainim pasin bilong ol tumbuna insait long famili, olsem pikinini man i marit i mas stap wantaim papamama. Dokta Lalita S. Chopra (Bombay Municipal Corporation Health and Family Welfare Division) em i tok, ‘Ol pikinini meri bai i marit na ol i go i stap wantaim tambu papamama bilong ol. Tasol ol pikinini man bai stap wantaim papamama bilong ol; ol i bilong lukautim papamama taim tupela i lapun. Dispela i rot bilong papamama i ken i stap gutpela. Papamama i amamas sapos i gat tupela pikinini man i stap bilong lukautim ol. Olsem na sapos tupela marit i karim tupela pikinini meri, orait ol bai wok long traim traim inap long ol i kisim pikinini man.
Ol i save ol pikinini i kam long God, tasol pasin ol i bihainim em i narapela kain tingting. Wanpela nius (Indian Express) i tok, ‘Taim ol pikinini meri i gat sik samting, dokta i no tingting tumas long givim marasin long ol. Na papamama i no tingting tumas sapos em i stap laip o em i dai.’ Wanpela ripot long Bombe i tok, long olgeta 8,000 pikinini ol i rausim long bel, 7,999 bilong ol i pikinini meri. Taim pikinini i stap long bel, dokta i kisim piksa bilong en na mama inap save, em i pikinini man o meri.
Ol i Strong Yet Long Skulim Ol
Wanpela man, em S. S. Sabnis, em i tok, ‘insait long famili, man yet i save tingim hamas pikinini bai ol i kamapim. Maski meri i laik isi liklik long kamapim pikinini na ol i no ken planti tru, man bai i putim hevi long em sapos em i no wanbel wantaim man. Olsem na mipela salim ol man na meri wantaim long ol ples i no gat gutpela sindaun bambai man i ken toktok wantaim papa bilong famili na helpim em long kamapim liklik famili tasol bambai em inap long lukautim ol gut.’ Tasol i gat sampela hevi long dispela.
Sabnis i tok moa, ‘Long ol famili i stap rabis tru, planti pikinini i save dai, long wanem, ol i sot long ol samting bilong skin. Olsem na ol i laik kamapim planti pikinini moa, long wanem, ol i save sampela bai i dai yet.’ Tasol sampela ol i no lukautim gut ol pikinini. Planti ol i raun raun nating, na singaut long mani na painim nabaut kaikai long ol ples pipia samting. Na papamama i mekim wanem? Ol i no save pikinini i stap we.
Planti taim ol i putim piksa bilong papamama wantaim tupela pikinini—em pikinini man na pikinini meri, ol i gat gutpela skin na ol i amamas. Ol man i gat wok mani na ol i gat gutpela sindaun liklik ol i bihainim dispela tingting bilong kamapim tupela pikinini tasol. Tasol ol man i stap rabis tru, nogat. Ol i tok, ‘sapos papamama bilong mipela na ol tumbuna bipo ol i karim 10-pela o 12-pela pikinini, bilong wanem mipela mas karim inap 2-pela tasol?’ I hatwok tru long skulim dispela lain ol i stap rabis na bai ol i bihainim dispela tingting bilong kamapim 2-pela o sampela pikinini tasol na no ken kamapim planti tru. Tasol dispela dokta i tok, “planti manmeri ol i yangpela na ol i laik kamapim ol pikinini. Na i olsem wok bilong gavman bai i lus nating. Olsem na i gat bikpela wok moa i stap yet bilong mekim.”