Husat i Lainim Ol Long Ol Samting Bilong Maritpasin?
NUPELA pikinini i save kamapim bikpela amamas tru! Papamama i save pilai wantaim em, na tokim ol pren bilong ol long olgeta samting pikinini i save mekim. Tasol liklik taim bihain papamama i save ol i mas mekim wanpela bikpela wok, olsem skulim pikinini long abrusim ol pasin i gat sem i go moa nogut long dispela graun.
Olsem wanem papamama i ken helpim liklik pikinini bilong ol long i stap amamas insait long famili i gat pasin sori na amamas, na bihain taim dispela pikinini i marit na kamapim pikinini bilong em yet em inap skulim ol long stap gut long God? Ating sampela papamama i ting dispela em i bikpela wok tru, olsem na ating ol bai amamas long sampela toksave long dispela stori.
Ating yu save lainim pikinini bilong yu olsem papamama bilong yu yet i bin lainim yu. Tasol planti papamama taim ol i yangpela, ating ol i bin kisim liklik save tasol long papamama bilong ol yet long ol samting bilong maritpasin, na ating sampela nogat. Na maski papamama i bin lainim yu gut long ol samting olsem, ol samting i senis nau na ol pikinini bilong nau i mas kisim sampela save moa. Olsem na yu mas askim skin bilong yu yet olsem: ‘Pasin bilong mi long lainim pikinini bilong mi i helpim em long winim ol hevi bilong nau long dispela graun?’
Sampela papamama i no skulim pikinini, ol i larim pikinini i kisim save long narapela rot. Tasol sapos olsem, sampela bikpela askim i kamap, olsem: Ol bai lain long wanem samting? Wanem taim ol bai lain? Husat bai lainim ol na long wanem rot?
Samting Ol Skul i Lainim Ol Long En
Planti papamama i tok: “Ol bai lainim dispela samting long skul.” Tru planti skul i lainim pikinini long ol samting bilong maritpasin, tasol ol i no lainim ol long bihainim stretpela pasin long dispela samting.
Wanpela papa em i gat tupela pikinini meri na em i bin askim mausmeri bilong skul bilong ol pikinini, bilong wanem skul i no lainim ol pikinini olsem maritpasin em i no stret sapos ol i no marit. Dispela meri i tok em i laik tok olsem, tasol em i mas tingim mama bilong ol pikinini em ol i no marit na boipren i stap wantaim ol. Olsem na planti skul bai lainim ol pikinini olsem ol yet i ken makim wanem samting ol i laik mekim, tasol ol skul i no tokaut long wanem laik i gutpela na wanem laik i no gutpela.
‘Mi Bai Baim Wanpela Buk’
Ating sampela papamama bai tok: “Mi bai baim wanpela buk bilong pikinini i ken kaunim.” Ating wanpela gutpela buk bai helpim pikinini, tasol yu mas save, dispela buk i gat wankain tingting olsem yu yet o nogat? Planti buk i save stori long ol samting bilong maritpasin, tasol wan wan buk tasol i save stori long ol stretpela pasin bilong dispela samting. Sampela buk i tok i orait long mekim pasin sem samting. Na bai yu hatwok tru long painim wanpela buk i tok, mas mekim maritpasin insait long marit tasol.
God i bin givim wok long papamama long ol i mas lainim pikinini long ol stretpela pasin, i no wok bilong narapela. Baibel i tok olsem: “Yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.”—Lo 6:7.
Ol papamama inap kamap gutpela tisa bilong pikinini bilong ol, winim ol narapela. Olgeta samting papamama i bilip long en, na gutpela pasin bilong ol insait long famili i olsem mak em pikinini i ken bihainim, na i no gat wanpela buk o skul inap kamap senis bilong ol. Wanpela man i bin tok: ‘Ol man i skelim dispela samting i tokaut olsem, sapos papamama i lainim pikinini long ol samting bilong maritpasin, ating pikinini i no ken mekim pasin pamuk. . . . Olsem na i bikpela samting long papamama yet i mas lainim pikinini long dispela samting.’
Tasol sampela papamama i pret na ting sapos pikinini i kisim save long dispela samting, ol bai laik long traim. Tasol sapos papamama i lainim gut pikinini, ating nogat. Yumi save bihain ol yangpela bai lain long samting bilong maritpasin. Olsem na mobeta ol pikinini i lain long dispela samting long stretpela, klinpela rot, em long rot bilong gutpela papamama. I no gutpela sapos ol i lain long dispela samting long maus bilong narapela man, o skulmanki o ol man ol i no gat klinpela tingting, a?
Tasol olsem wanem yu ken mekim dispela wok long pasin i stret? Taim ol yangpela i harim tok olsem, “olgeta i save mekim dispela samting,” olsem wanem yu ken lainim ol olsem ol gutpela pikinini ol i no mekim olsem? Olsem wanem yu ken helpim pikinini long save, sapos ol i bihainim tok bilong Baibel olsem “yupela i mas abrusim olgeta kain pasin pamuk,” em rot bilong i stap amamas, na em tasol i rot bilong amamasim God? Ol narapela stori i kam bihain bai kamapim sampela gutpela tok bilong bekim ol dispela askim.—1 Tesalonaika 4:3.
[Rait long pes 3]
“Ol samting papamama i lainim pikinini long en i bikpela samting.”—U.S.News & World Report