Kirap Long Wanem Taim, na Mekim Bikpela o Liklik Tok

PLANTI papamama i ting ol i ken kisim pikinini na wokabaut inap 10-pela minit samting na insait long dispela sotpela taim ol i ken lainim pikinini long ol samting bilong maritpasin. Tasol planti taim papamama i kisim save olsem, 10-pela minit i no inap. Na tu, ol i kisim save olsem, mobeta ol i bin toktok wantaim pikinini taim em i no winim yet 13 krismas. Planti papa o mama i bin tok: ‘Klostu olgeta samting mi bin wok long tokim pikinini long en, i olsem ol i save pinis long en.’

Tasol olsem wanem? I gat gutpela rot bilong kamapim ol dispela bikpela samting long pikinini? Sapos i gat, papamama i mas kirap long wanem taim, na ol i ken mekim wanem na stori long wanem samting?

Bihain liklik long taim mama i karim pikinini, em gutpela taim bilong tingim dispela samting. Sapos yu kirap na stori taim pikinini i yangpela yet, yu inap givim liklik toksave long em inap long krismas bilong em.

Taim papamama i wasim ol pikinini ating em gutpela taim long lainim ol long ol wan wan hap bilong skin. Ol i ken tok: “Dispela em bros bilong yu . . . na dispela em bel bilong yu . . . na dispela em skru bilong lek.” Tasol bilong wanem papamama i stori long bel na bihain ol i stori long lek? I olsem ol samting namel long bel na lek i samting bilong sem, a? Tru, yumi no laik kamapim sampela tok doti long ol dispela samting olsem sampela man i mekim, tasol yumi ken tok liklik olsem: em “sem” bilong yu. God i bin wokim dispela tu na dispela i insait long olgeta samting God i bin tok “i gutpela.”​—Stat 1:31; 1 Korin 12:​21-24.

Ating bihain taim pikinini i lukim wanpela mama i senisim nepi bilong bebi, yu ken lainim em olsem olgeta pikinini i gat hap bilong bodi olsem “sem”​—manki i gat “sem” bilong em, na meri i gat “sem” bilong em. Na yu ken tok isi olsem, dispela samting i no bilong toktok wantaim narapela pikinini o narapela man long en, nogat; em samting bilong toktok long en insait long famili tasol.

Taim pikinini i liklik ating yu no inap sem long toktok long ol dispela samting, olsem na i gutpela long mekim taim em i liklik yet na wok long skulim em isi isi inap long krismas na save bilong em.

Stori Long Pikinini i Kamap Olsem Wanem

Taim pikinini i gat 3 i go 5-pela krismas samting ating pikinini i askim olsem: “Ol bebi i kamap olsem wanem?” Yu ken givim sotpela bekim olsem: “Yu bin stap liklik liklik tru na go bikpela insait long bel bilong mama.” Ating dispela bekim em inap long pikinini, tasol bihain ating em bai askim olsem: “Olsem wanem bebi i lusim bel bilong mama?” Ating yu ken tok: “God em i bin wokim wanpela kain hul long skin bilong mama, na bebi i lusim mama long dispela rot.” Ol pikinini i no save putim yau na harim tok longpela taim, nogat; olsem na yumi mas givim ol sotpela stretpela bekim long ol. Givim liklik toksave long pikinini bilong bekim askim bilong em na inap long em. Long dispela taim yu no ken tokim em long olgeta samting.

Sapos papamama i tingting gut ol inap painim planti rot long lainim pikinini. Sapos wanpela wanblut i gat bel ating mama inap tok: “Ating Anti Susan bai karim pikinini klostu nau. Sampela wik paslain long taim mi karim yu, bel bilong mi i wankain long Anti Susan.” Sapos yu gat bel ating ol pikinini insait long famili i amamas tru na em i gutpela rot long skulim ol long dispela samting.

Bihain moa ating pikinini i gat askim olsem: “Bebi i kirap olsem wanem?” Yu ken bekim olsem: “Wanpela samting long papa olsem hap melek i bung wantaim wanpela kiau insait long mama na nau nupela pikinini i wok long kirap. I olsem sapos yu planim pikinini bilong plaua o diwai samting long graun, bihain plaua o diwai i kamap.” Ating narapela taim pikinini i askim olsem: “Olsem wanem melek bilong papa i kamap insait long mama?” Long pasin isi olsem yu ken tok: “Yu save long ol pikinini man, a? Ol pikinini man i gat sem i narapela kain long ol pikinini meri. Na ol mama i gat wanpela liklik hul long skin bilong ol na sem bilong papa inap i go insait long en. Long dispela rot melek inap i go insait long mama. God em i wokim man na meri, olsem na bai nupela pikinini inap kamap long gutpela ples, em bilum bilong mama. Em bai stap inap long em i bikpela na em i ken lusim bilum bilong mama. Em nau, naispela nupela pikinini i kamap!” Taim yu toktok long dispela samting, yu ken tok olsem em i wanpela gutpela samting, olsem gutpela rot God i wokim bilong yumi ol man i ken kamap.a

Yu mas was gut. Sapos pikinini i gat askim, nogut yu sem na tok: “Bihain bai mi tokim yu taim yu bikpela.” Dispela inap mekim na pikinini i laik save, olsem na em bai painim narapela rot long kisim dispela save. Sapos pikinini inap givim kain askim olsem, em inap kisim bekim. Sapos yu no bekim askim bilong em, ating pikinini i no ken askim yu moa bilong kisim save long wanpela samting.

Wanem Taim?

Planti papamama i ting pikinini bilong ol i mas save long ol bikpela samting bilong maritpasin paslain long ol i go long skul. Ating long skul ol bai harim ol stori kranki long dispela samting.

Wanpela lapun bubu man i bin tok: “Mi no bin givim askim long papamama bilong mi, tasol taim mi gat 6-pela krismas papa bilong mi i ting em i mas lainim mi long olsem wanem pikinini i kamap. Papa i bin tokim mi, man na meri i mekim maritpasin, dispela i olsem pasin bilong yumi ol man na meri, olsem taim yumi kaikai, em tu pasin bilong yumi man. Tasol God i bin tok maritpasin i bilong ol man na meri marit tasol. God i tok olsem long wanem, em i laik bai olgeta pikinini i gat mama na papa bilong lukautim ol na mekim bikpela long ol. Dispela tok papa i givim long mi i kamap long taim stret, long wanem, mi bin lukim ol narapela wankrismas i lap long ol piksa nogut ol i bin wokim, tasol mi no gat save long dispela.”

Ol dispela samting yumi toktok long en yumi no ken tok olsem em samting bilong sem, nogat; em samting bilong yumi yet. Yu ken tokim pikinini olsem samting yupela i bin toktok long en em wanpela tok bilong famili tasol, na i no samting bilong tokim narapela pikinini o man long en.

I No Samting Bilong Sem

Sapos wanpela i kaunim dispela stori na em i kirap nogut na i pilim sem, orait em i mas tingim ol yangpela papamama, em ol i wok long painim gutpela rot bilong stori long dispela ol samting wantaim pikinini bilong ol. Sapos papamama i putim yau long pikinini na bekim ol tok bilong em, bihain taim pikinini i wok long go bikpela na em i gat sampela askim moa, i no hatwok long pikinini i ken kamapim ol dispela askim long yu.

[Ol Futnot]

[Piksa long pes 6]

Klostu long taim mama i karim pikinini em gutpela rot long lainim narapela pikinini