Yu Ting Moses i Painim Wara Long Stik?

WANPELA buk (The Encyclopedia Americana) i tok, sampela man i ting Moses em namba wan man i bin painim wara long rot bilong stik, long wanem, Baibel i tok: “[Moses] i apim stik na paitim dispela ston tupela taim. Na bikpela wara i kamap long en.” (Namba 20:​9-11) Wanpela nius (National Wildlife) i bin tok, stik Moses i bin holim em wanpela ‘stik bilong marila o glasman samting.’ Olsem na sampela man i mekim wok long stik bilong painim wara samting i ting, dispela strong i kam long Moses.

Tasol i no olsem, long wanem, Moses yet i kamapim lo bilong God olsem, yumi no ken mekim ol samting bilong marila o glasman! (Lo 18:10) Na dispela mirakel i bin kamap long Meriba i no samting bilong marila o glasman samting, nogat. Planti man i mekim wok long rot bilong stik bilong painim wara. Ol i bihainim stik na wet inap long stik i meknais. Tasol Moses i no bin mekim olsem. Em i no bin bihainim stik bilong em na wet inap long stik i meknais, nogat. Em i no bin raun painim wara. God Jehova i bin tokim Moses long ples na long rot em inap painim wara. Long Namba 20:8 God i tok: “Yu mas tok long dispela bikpela ston hia na wara bai i kamap long en.”

Na tu, ol man bilong painim wara ol i save tokim ol man long hap ol i mas digim graun, tasol taim stik bilong Moses i paitim ston, bikpela wara i kamap inap long olgeta man na animal inap dring long en. Taim Moses i tok em yet i bin kamapim dispela mirakel, God i krosim em. Olsem na sapos yumi tok, stik bilong Moses i gat strong, em i no stret​—em wanpela hap diwai nating tasol!