Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • g93 3/8 p. 13
  • “Em Dok Nogut”?

No gat vidio bilong dispela seksen.

Sori, popaia kamap long lodim vidio.

  • “Em Dok Nogut”?
  • Kirap!—1993
  • Wankain Infomesen
  • Pas Bilong Ol Man
    Kirap!—1993
Kirap!—1993
g93 3/8 p. 13

“Em Dok Nogut”?

SAMPELA yia nau ol nius i kamapim stori long wanpela kain dok ol i kolim pit-bul (pit bull). Long Kanada, na Inglan, na Amerika, dispela dok i bin kaikaim planti man. Long Amerika, kirap long 1979 i go inap long 1988 ol dok i bin kaikaim 157 man na ol i dai, na klostu 70 bilong ol dispela 157 man, em dok pit-bul i bin kaikaim ol. Long ol nius long Inglan ol i givim narapela kain nem long dispela dok nogut olsem: “Dok Bilong Satan.” Wanpela nius (Equinox) i tok, dispela dok em “wanpela samting tru bilong kilim i dai man.”

I gat wanpela kain spot bilong ol dok i save pait, maski gavman i tambuim. Ol man i save larim dok i pait wantaim narapela dok. Na ol dispela man i kolim dok pit-bul ‘nambawan strongpela dok, na dok bilong pait,’ no gat narapela i winim em. Dok pit-bul i gat strongpela masol, na em inap siksti i go. Wanpela nius (The Globe and Mail) i tok, ‘ol man i kamapim dok pit-bul bilong em i ken kilim ol narapela dok.’

Narapela nius (The Toronto Star) i tok: ‘Strongpela maus bilong dok pit-bul inap bagarapim tru narapela animal, o wanpela man. Sapos em i kaikaim pikinini, pikinini inap bagarap stret, long wanem, pikinini i no gat strong bilong rausim dispela dok.’ Yumi ken tingim sampela samting nogut dispela dok i bin mekim, olsem: Wanpela pikinini i gat 9-pela krismas na dok pit-bul i bin kaikaim pes bilong em. Ol dokta i mas mekim wok olsem 5-pela aua long stretim pes bilong em. Na narapela em i gat 13 krismas, na dok pit-bul i bin kaikaim em na bagarapim planti hap bilong skin bilong em, olsem pes, na bel, na lek. Wanpela meri i gat 21 krismas i laik givim kis long dok pit-bul, tasol dok i kaikaim pes bilong em, na ol dokta i mas samapim pes bilong em inap olsem 70 samap. Na tupela dok pit-bul i rausim nus olgeta bilong wanpela man long Inglan.

Wanpela meri (Kathleen Hunter), em dairekta bilong wanpela lain (Toronto Humane Society), i tok, bipo em i ting sapos papa bilong dok pit-bul i lainim gut em, em bai kamap olsem ol narapela dok. Tasol nau dispela meri i gat narapela tingting. Em i tok: ‘I gat samting i stap long skin bilong dispela dok pit-bul na dispela samting i mekim na yumi no ken save gut long pasin bilong dispela dok na wanem taim em bai kirap kaikaim man. Wantu em bai kirap pait maski narapela dok o wanpela man i no skrapim bel bilong en.’a

Ol gavman i wok long kamapim lo bilong stretim ol hevi dispela dok pit-bul i save kamapim. Ol papa bilong dok pit-bul long Edmonton, long Kanada, i mas baim laisens bilong dispela kain dok olsem K100. Na ol i mas i gat insurens inap olsem K500,000. Olsem na sapos dok bilong ol i kaikaim man, insurens bai baim dispela man. Long Winipek, long Kanada, i gat lo olsem, nau man i no ken kisim moa dok pit-bul. Na man i gat dispela dok na em i laik raun, em i mas pasim waia long maus bilong dok, na pasim rop long nek bilong en. Na ol i mas i gat insurens inap long K300,000. Long Palamen Bilong Inglan ol i kamapim wankain lo, na man i no bihainim ol dispela lo em i mas baim kot o go kalabus.

Lo God i bin givim long Israel i tok, ol i mas banisim ol animal nogut. Sapos animal nogut i raun na bagarapim wanpela samting, papa bilong en i gat asua long dispela. Sapos dispela animal i bin bagarapim wanpela man na man i dai, kot inap makim olsem papa bilong dispela animal tu i mas i dai. (Kisim Bek 21:29) Olsem na taim yumi tingim Lo bilong God, yumi ken save sapos ol Kristen i gat dok na em i dok bilong kros, ol i mas was gut long ol, o sapos ol i ting ol i no inap, mobeta ol i no gat dispela dok.

[Ol Futnot]

a Bilong save moa long dispela, lukim Kirap! bilong Septemba 8, 1988, pes 25.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim