“Nogut Sampela i Lus Nating”

Wanpela man long Gana i raitim dispela stori bilong Kirap!

EM I wok long katim diwai long so na plenim i stap taim mi bungim em long woksop bilong em long Labadi, em wanpela hap bilong taun Akra. Nem bilong em Adams Akuetteh. Em i gat 70 krismas na em i bin mekim wok kamda inap 50 yia.

Taim mi askim em long wanem taim em i bin kisim bikpela amamas tru long mekim wok kamda, kwiktaim em i tok, long taim em i bin helpim ol brata long wokim nupela haus brens bilong Sosaiti Was Taua long Nungua long Gana long 1984 i go inap long 1988.

Mi askim em, “Yu mekim wanem wok long dispela hap?”

“Mi wok long simen na helpim ol brata i wok long rup.”

Mi tok moa, “Planti brata i tingim yu, long wanem, yu mekim bikpela wok long bungim ol nil long dispela hap.”

“Em i stret. Yu save, pe bilong nil long Gana em i antap tumas. Long dispela taim, hap kilogram bilong nil i olsem 2 kina o 3 kina samting. Olsem na mi askim mi yet, ‘Mipela inap mekim wok long olpela nil, o nogat? Bai mi traim.’

“Olsem na mi yet mi kirap long mekim dispela wok bilong stretim ol olpela nil long taim mi gat liklik malolo. Taim wasman bilong konstraksen i save, em i amamas tru. Em i tokim mi long mekim dispela wok long taim bilong wok. Olsem na inap 4-pela yia, mi save kirap long moningtaim na bungim ol nil i pundaun long graun. Mi save rausim ol nil i pas long ol olpela plang.”

“Olsem wanem long ol nil i no strong o ol i krungut pinis? Yu save tromoi?”

“Nogat. Ol nil i no strong, em mipela i save paitim i go insait long ol plang i no strong. Sapos mipela i mekim wok long strongpela plang, mipela i save wokim hul long boa na bihain mipela i paitim nil i go insait. Na ol nil i krungut mi save stretim.”

“Olsem wanem? Yu les long mekim dispela wok?”

“Ating wanpela yangpela man bai les, tasol mi nogat. Wasman bilong konstraksen i tokim mi, wok mi mekim i helpim Sosaiti na ol i no lusim nating mani, em mani bilong Jehova. Mi save amamas tru taim mi lukim ol kain kain nil mi stretim na bungim i kamap planti tru, na mi save tokim mi yet olsem, ‘Em nau! Nau wok bilong mi i winim wok ol man long rup i mekim!’ Bihain ol i kisim olgeta nil i go na i no gat wanpela i stap. Na ol lain long rup i singaut long sampela nil moa! Olsem na mi hariap gen long stretim sampela moa.”

“Wok bilong konstraksen i pinis, olsem na yu mekim wanem long nau?”

“Mi mekim gen wok painia, na mi wet inap yupela i kam bek bilong skruim brens-ofis bilong Gana i go bikpela, na bai mi amamas long bungim gen ol olpela nil.”

Inap 4-pela yia em i mekim kain wok em sampela bai ting em wok bilong man i no gat save. Tasol Adams Akuetteh i no gat dispela kain tingting. Em i amamas long bungim na stretim ol olpela nil, na mani bilong Jehova i no ken lus nating!

Jisas i gat wankain tingting. Em i tanim sampela bret i kamap planti, tasol bihain long wanpela kaikai em i tok: “Yupela bungim olgeta hap kaikai i stap. Nogut sampela i lus nating.”​—Jon 6:12.

[Piksa long pes 31]

Adams Akuetteh, man bilong stretim nil long brens bilong Gana