Pas Bilong Ol Man

Lukautim Kapa Bilong Pinga  Man! Inap 52 yia, mi bin kaikaim kapa bilong pinga. Inap 2-pela taim tasol mi lusim dispela pasin inap sotpela taim. Taim mi kaunim stori long Kirap! bilong Jun 8, 1998, “Kapa Bilong Pinga​—⁠Yu Save Lukautim?,” mi lusim dispela pasin. Bilong wanem? Long wanem, God Jehova em Man bilong wokim kapa bilong ol pinga na em i laik bai yumi lukautim, wankain olsem em i laik bai yumi lukautim ol narapela samting. Tenkyu tru long kamapim ol gutpela stori bilong helpim mipela tingim dispela samting.

D. H., long Inglan

Mi save lukautim haus na gaden, na tu, mi lukautim tambu mama bilong mi, em lek bilong em i bagarap. Olsem na mi no gat taim bilong lukautim gut han bilong mi. Inap longpela taim liklik mi tingting planti long kapa bilong pinga bilong mi, long wanem, ol i no strong​—⁠ol i save bruk bruk. Olsem na dispela stori i kamap long taim stret.

W. B., long Jemani

Kirap long taim mi liklik yet, mi save kaikaim ol kapa bilong ol pinga bilong mi, olsem na mi save sem, long wanem, ol i no luk gutpela. Taim mi kaunim dispela stori, mi pilim tru olsem kapa bilong ol pinga i gutpela samting tru long bodi bilong yumi. Stori i kirapim mi long wok strong long stretim dispela pasin bilong mi.

K. Y., long Japan

Lain Raskol  Mi pilim tru ol dispela stori bilong ol lain raskol long Kirap! bilong Me 8, 1998. Long nau mi stap long wanpela kain skul kalabus bilong stretim ol manki. Mama bilong mi em wanpela Witnes Bilong Jehova, tasol longtaim pinis mi lusim ol miting. Bihain mi pas wantaim ol poroman nogut, na mi insait long planti pasin stil i nogut tru. Long dispela as, mama bilong mi i bin salim dispela Kirap! i kam long mi. Pastaim mi ting, ‘Eh! Dispela nius gen!’ Tasol taim mi kirap long kaunim, dispela i pulim tru tingting bilong mi na mi kaunim olgeta stori. Taim mi kaunim pinis, tingting bilong mi i senis. Mi no bin ting Kirap! inap helpim mi olsem. Mi laik senisim ol pasin bilong mi na kirap gen long go long ol miting. Nau mi pilim olsem mi no laik bihainim gen ol dispela pasin nogut mi bin mekim, na mi laik mekim wok bilong Jehova i go inap long taim mi dai.

M. S., long Japan

Mi wanpela mama wanpis, na pikinini man bilong mi i gat 11-pela krismas na pikinini meri i gat 9-pela krismas, na mipela i sindaun long wanpela hap i gat planti narapela narapela lain raskol. Mi kaunim dispela stori na wantu mi toktok wantaim tupela pikinini bilong mi long ol tok bilong en. Dispela stori i bin helpim ol long save, taim ol i insait long wanpela lain raskol, dispela i no inap kisim ples bilong pasin sori o gutpela sindaun insait long famili.

B. S., long Amerika

Mi laik tok tenkyu tru long ol dispela stori. Planti taim mi save tingting planti long ol pikinini man bilong brata bilong mi. Ol tok yupela i bin kamapim i helpim mipela tru.

I. M. M., long Brasil

Ol dispela stori i kamap long taim stret, long wanem, ol wanklas bilong mi ol i wok long kirapim wanpela lain olsem raskol. Sampela i no save ol i laik insait long dispela lain o nogat, long wanem, gopas bilong en i tokim ol long raitim ol tok bilas na tok doti long banis bilong toknogutim het-tisa. Tenkyu long helpim ol yangpela long dispela taim nogut i gat ol hevi.

B. C. G., long Meksiko