Baibel i Tok Wanem?

Beten​—Kolim Nating o Kamapim Bel?

WANPELA balus i flai antap long Solwara Pasifik. Em i flai antap olsem 12,500 mita na wantu tasol wanpela ensin i bagarap. Bihain liklik narapela 3-pela ensin i bagarap. Insait long tupela minit tasol balus i pundaun i go olsem 10,000 mita! Tasol taim balus i kam klostu long graun inap olsem 2,700 mita, ol ensin i kirap gen na em i kamap gut long San Fransisko. Wanpela pasindia long balus i tok: “Mi bin beten strong, winim ol narapela taim mi bin beten.”

Long taim bilong bikpela hevi o bagarap samting, planti man i save beten long God na askim em long helpim ol. Sampela bilong ol dispela man i no man bilong lotu. Tasol ol man bilong lotu i save beten oltaim na ol i kolim kolim gen ol beten. Planti i mekim beten long rot bilong korona. Planti ol narapela i mekim wok long ol buk bilong beten. Na planti milion man long Esia i mekim wok long wanpela kain wil i gat ol beten insait long en, na ol i tantanim spit i go.

Ating sampela taim yu tingting olsem: ‘Yumi mas beten olsem wanem? Yumi mas kolim kolim gen ol beten o yumi mas kamapim bel bilong yumi taim yumi beten?

Beten i Olsem Wanem Samting

Sapos yu laikim tru papa bilong yu, tasol em i stap long narapela kantri, na em i bin tokim yu long ring long em long laik bilong yu, no gat pe. Ating yu bai ring planti taim, a? Yu laikim em tru, olsem na ating yu laik toktok wantaim em planti taim, a? Na ating sapos yu gat bel hevi samting, yu laik toktok wantaim em tu. Ating dispela pasin pren i stap namel long yu na papa i wanpela bikpela samting long yu, a?

Taim yu ring long papa ating bai yu kamapim bel bilong yu long wanpela samting na stori planti taim long en, a? Yu no save kaunim wanpela buk bilong kamapim bel bilong yu long papa, na ating yu no stori nating long em, a? Olsem na taim Kristen i beten, em tu i no ken beten nating o kaunim beten long wanpela buk samting. Na Krais Jisas i tok beten bilong yumi i no ken olsem.

Jisas i Bin Tok Wanem?

“Taim yupela i mekim [beten], maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.”a (Matyu 6:7) Long ol narapela Baibel ol i tok: ‘Long beten bilong yu, yu no ken toktok nating olsem ol haiden.’ (The New English Bible) ‘Taim yu beten no ken hipim ol toktok nating olsem ol Haiden i save mekim.’​—Revised Standard Version.

Sampela man i gat tingting kranki long beten. Ol i ting sapos ol i mekim planti tok o ol i mekim save beten, ol i man tru bilong lotu. Na sampela i ting sapos beten bilong ol i longpela tru na ol i kolim kolim beten, God bai harim. Tasol God i no tingim beten i longpela o sotpela, nogat. Em i tingim insait tru bilong beten. Jisas i no laik bai ol man i bihainim em ol i beten nating, olsem long rot bilong korona samting, o long buk bilong beten.

Jisas i bin skulim lain bilong em long wanpela beten. Planti man i save long dispela beten, em ol i kolim Beten Bilong Bikpela. (Matyu 6:​9-13) Tasol yu ting Jisas i laik bai ol i kolim kolim gen ol tok bilong dispela beten, olsem kolim nating? Nogat. Wanpela yia bihain long em i bin kamapim dispela beten long lain bilong em, Jisas i bin kolim gen dispela beten, tasol em i no kolim wankain tok. (Luk 11:​2-4) Na tu, long Baibel yumi no inap painim wanpela taim ol Kristen bilong bipo i bin kolim kolim dispela Beten Bilong Bikpela o ol narapela beten.

Tasol olsem wanem? Dispela i makim olsem yumi no ken kolim sampela tok planti taim insait long beten? Nogat, i no olsem, long wanem, Jisas i bin tok: “Yupela i mas [beten] na askim God long givim ol samting long yupela, na em bai i givim long yupela. Yupela i mas wok long painim samting na bai yupela i lukim.” (Matyu 7:7) Ating sampela taim yumi mas askim askim God long wanpela samting. Olsem na Jehova i save yumi givim bel long askim em long dispela samting yumi laikim, o em i save yumi pilim tru dispela samting yumi kamapim long em.

Olsem: Foa handet yia paslain long Krais i gat wanpela gutpela man Juda i stap wantaim ol Juda i kalabus long Babilon, nem bilong em Nehemia. Em i bin mekim wok long lukautim wain bilong king bilong Persia. Taim em i harim lain bilong em long as ples Juda i no stap gutpela tumas, em i bin beten “long san na long nait” long Bikpela i ken helpim ol. (Nehemia 1:6) God i bin harim beten bilong em, na God i kirapim king long larim Nehemia i go bek long Jerusalem bilong stretim ol samting. Nehemia i bin mekim dispela wok, olsem na dispela i bin strongim na amamasim lain bilong em.​—Nehemia 1:​3–2:8.

Kamapim Bel Taim Yu Beten

Jehova i Man bilong wokim olgeta samting, tasol em i singautim “ol pikinini” bilong em long kamapim bel bilong ol long em. Disaipel Jems i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Yumi ken mekim olsem wanem? Yumi mas beten long nem bilong Jisas. (Jon 14:​6, 14) Na Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.”​—Hibru 11:6.

Ol man i gat hevi, na ol man i bin mekim bikpela rong tu, ol inap beten long God na askim em long helpim ol o lusim tingting long rong ol i bin mekim. Jisas i kamapim dispela long wanpela tok piksa em i bin mekim long wanpela Farisi. Dispela man bilong lotu i ting em tasol i stretpela man, olsem na em i beten na tok tenkyu long God long em i no olsem ol arapela man. Tasol wanpela man bilong kisim takis (em bipo ol man i ting dispela kain man i man nogut tru), em i bin tok: “God, mi man bilong mekim sin. Yu ken marimari long mi.” Dispela liklik beten man ya i mekim, em i no kisim long wanpela buk, a? Na Jisas i kotim dispela man bilong lotu i gat tupela maus, na em i tok long man bilong kisim takis olsem: “Olgeta man i daunim ol yet, God bai i litimapim nem bilong ol.”​—Luk 18:​10-14.

Ol pasin nogut bilong dispela graun i mekim na planti man i bel hevi. Na ating sampela Kristen i bel hevi na ting ol i stap nogut long ai bilong God. Tasol sapos ol i kamapim bel bilong ol long Jehova long olgeta taim, dispela inap helpim ol. Pol i bin tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. . . . na askim em long helpim yupela. Bel isi God i save givim yumi, em i gutpela samting tru, na long dispela pasin yupela bai i pas gut wantaim Krais Jisas.”​—Filipai 4:​6, 7.

Yumi mas beten strong long God na singaut long em i mas helpim yumi, na kamapim tru bel bilong yumi long em, olsem wanpela pikinini i save mekim long gutpela papa o mama bilong em. Dispela ol beten yumi no inap painim long wanpela buk, o yumi no kolim kolim gen. Dispela ol beten i kamap long bel bilong yumi, olsem yumi bilip tru long Jehova olsem em Man i “save harim beten.”​—Song 65:2.

[Ol Futnot]

[Piksa Kredit Lain long pes 20]

Drawings of Albrecht Dürer/Dover Publications, Inc.