Bilong Wanem Planti Man i Laik Pilai Golf?

Wanpela man long Hawaii i raitim dispela stori bilong Kirap!

PLANTI Japan i save go long Hawaii bilong pilai golf. Long sampela nambawan klap bilong pilai golf long Japan ol memba i mas baim long K1,500,000. Na ol memba bilong sampela klap moa i mas baim long K188,500! Olsem na i no olgeta man Japan inap pilai golf long ples tru bilong pilai golf. Sampela Japan i kam long Hawaii na ol i amamas long tromoi K100 na bai ol i ken pilai golf.

Long bipo, taim namba wan man i bin kisim wanpela stik na paitim bal i go insait long wanpela liklik hul, ating em i no save bihain planti man bai laik long pilai dispela kain spot na ol bai amamas long tromoi mani bilong pilai. Long nau dispela kain spot i kamap bikpela. Long Hawaii i gat 64 banis bilong ol man i ken pilai golf long en. Long Amerika tu planti man i pilai golf. Ol i tromoi mani olsem 20 bilion kina long wanpela yia na bai ol i ken pilai golf. Olsem na dispela kain spot i kamap bikpela tru. Tasol bilong wanem planti man i gat laik long pilai golf?

Taim Golf i Bin Kirap

Yumi no save gut long pilai golf i bin kirap olsem wanem, o long wanem ples, tasol ol man i save, long bipo, olsem long 500 yia i go pinis i gat sampela kain pilai olsem golf na ol man long Yurop na Inglan i bin pilaim. Namba wan taim tru em ol i bin pilai golf olsem wanpela spot, em long yia 1457 long Skotlan. Planti man i kirap long laikim dispela pilai, olsem na King Jems Namba 2 i tambuim dispela spot na em i tok, ol lain bilong em i mas lain gut long sutim banara tasol, long wanem, dispela i ken helpim ol long sakim ol birua taim ol i kam long pait, pilai golf i no inap mekim olsem.

Long 1744, sampela man bilong Skotlan i ting i gutpela sapos ol i wokim sampela lo ol i ken bihainim taim ol i mekim dispela pilai, na ol i ting i gutpela sapos ol i kamapim wanpela klap tu. Olsem na wanpela klap (Honourable Company of Edinburgh Golfers) i kamap. Tenpela yia bihain, narapela klap (Royal and Ancient) i kamap. Planti man i ting olsem dispela klap i as bilong ol lo na ol pasin i save bosim dispela pilai.

Taim ol i kirap nupela long pilai golf, ol i pilai namel long ol liklik maunten na ol liklik maunten wesan klostu long nambis. I gat as na ol i mekim olsem. Ol sipsip na liklik animal ol i kolim rebit i save kaikai gras na gras i stap sotpela. Taim ren na win i kam ol sipsip i save go long wanpela hap bilong hait, olsem na gras long dispela hap i pinis na wesan nating i kamap. Dispela ol hap i gutpela bilong pasim bal na bal i no inap ran longwe. Ol king na kwin na maniman tasol inap raun i go long ol dispela hap bilong pilai, long wanem, ol i gat mani na ol i gat taim bilong pilai. Em i no pilai bilong ol man nating. Bal bilong pilai golf i gat bikpela pe bilong en, olsem na maniman tasol inap pilai.

Ol bal bilong golf long pastaim i bikpela pe long wokim na ol i no stap longtaim na ol i bruk, long wanem, ol i wokim long skin bilong bulmakau na ol i pulimapim gras bilong kakaruk long en na ol i samapim long han. Long Malesia long 1848, ol i painim wanpela marasin olsem gumi long skin bilong wanpela diwai (Palaquium gutta), na nau ol inap wokim nupela bal i no gat bikpela pe long en. Nau planti man inap pilai, long wanem, ol i no tromoi bikpela mani long baim bal samting.

Planti Man i Laik Pilai

Pe bilong ol bal na bilong kamap memba bilong ol klap i go daun, olsem na planti man i kirap na pilai golf. Na i no ol dispela samting tasol i kirapim ol man long pilai, nogat. Kirap long yia 1780 samting, ol wok bisnis i go bikpela, olsem na nau planti man i gat taim na mani bilong painim amamas. Ol nupela rot bilong tren i opim rot bilong ol man i ken raun i go long ol banis bilong pilai golf na ol i no tromoi bikpela mani. Taim ol i wokim masin bilong katim gras, nau ol i kirap long wokim ol banis bilong pilai long ol hap em pastaim ol i ting ol i no inap.

I gat planti as na ol man i laikim dispela spot golf. Taim ol i pilai ol i stap ausait na ol i mas wokabaut, olsem na em i gutpela eksasais. Sampela ol i mekim olsem bilong painim bel isi na long lusim tingting long bikpela wok samting ol i bin mekim long ples wok. Na sampela ol i laikim dispela pilai, long wanem, maski man i gat wanem krismas, o pasin, o save, olgeta inap bung wantaim na pilai golf. Na long dispela spot golf i no gat pasin bilong bagarapim man.

Narapela as na ol man i laikim dispela pilai em olsem: Ol man i stap pren, maski wan wan i pilai bilong win. Pasin bilong bungim ol poin long golf em i narapela kain liklik long ol narapela spot. Sapos man i gat liklik poin tru, orait em i win. I gat tupela pasin bilong bungim ol poin olsem: (1) Sapos wanpela man i no paitim bal planti taim na bal i go insait long hul, orait em i winim dispela hul. Sapos em i winim planti hul insait long hap ol i makim, orait em i win. (2) Sapos wanpela man i no paitim bal planti taim na bal i go insait long hul long hap ol i makim, na poin bilong ol narapela i winim em, orait em i win.

Planti man i kirap long pilai, olsem na ol i tingting long wokim ol pilai resis, bilong save olsem husat tru ol i save gut long pilai. Pastaim ol i givim medal long ol man i win. Bihain ol i givim sampela mani. I no longtaim bihain, na dispela spot golf i kamap olsem wok mani bilong sampela man.

Planti Man i Laik Pilai

Long 1894, ol i kamapim wanpela lain golf long Amerika (U.S. Golf Association), na planti manmeri moa yet ol i insait long dispela pilai. Taim ol man i kirap long raun i go long ol narapela hap, planti man long ol narapela hap tu i kirap long pilai golf. Taim ol i wokim ol balus, nau i no hatwok long raun i go long ol narapela hap na pilai long ol dispela hap. Na televisen tu i kamapim ol dispela pilai resis. Pasin bilong pilai golf i go bikpela tru. Na mani ol man inap winim tu i go bikpela. Namel long 1930 i go inap 1940 samting, mani ol man inap winim long wan wan pilai resis i olsem K10,000. Nau ol inap winim K1,000,000.

Ol ples bilong pilai golf i stap long ol naispela naispela hap, olsem na planti man i laik kam long ol dispela hap bilong malolo. Bilong pulim ol turis i kam, klostu olgeta nambawan hotel i gat ples bilong pilai golf. Ol man i save wokim ol haus bilong salim, ol i save ol inap kisim bikpela mani sapos ol i wokim wanpela nambawan ples bilong pilai golf long dispela hap. Wanpela nius (Business Week) i tok, long nau 70 pesen bilong ol ples bilong pilai golf ol i wokim, em ol man bilong salim ol haus i wokim.

Golf Long Hawaii

Long nau, Hawaii em i wanpela naispela ples bilong pilai golf. Ol i tingting pinis long wokim 61 nupela ples moa bilong pilai golf. Tasol ating dispela tu i no inap, long wanem, taim planti manmeri i go lapun na ol i no inap ran moa o pilai tenis samting, ol i save kirap na pilai golf.

Taim sampela bisnisman i pilai golf ol i mekim wok bisnis wantaim. Ol i mas wokabaut o draiv longwe liklik namel long ol hul, olsem na i gat bikpela hap taim bilong toktok long wok bisnis. Wanpela bisnisman i tok: “Taim mi pilai golf mi gat 5-pela aua moa na mi ken mekim wok bisnis wantaim ol narapela man em bipo mi no gat taim bilong bungim ol.” Sampela man i ting sapos yu laik bai ol lain bisnis i orait long yu na yu ken bung wantaim ol, orait yu mas pilai golf.

Planti man i ting ol maniman na ol man i gat bikpela nem, ol tasol i save pilai golf. Tasol nau ol i wokim ol hap em ol man nating tu i ken pilai long en. Olsem na maski ol man i no memba bilong wanpela klap, ol i ken amamas na pilai golf. Ol ripot i kamapim olsem planti man bilong pilai golf long Amerika, ol i wokman long ofis o long faktori samting. Ol man long Hawaii inap baim olsem 10 kina samting long pilai golf long hap olgeta man i save pilai long en.

Bilong malolo o painim amamas i gat planti narapela hap ol man inap go long en, tasol long man i gat laik long pilai golf, i no gat narapela ples olsem inap givim amamas long em. Taim em i paitim bal na bal i flai i go na pundaun klostu long hul, em i kisim bikpela amamas. Na tu, ples em i pilai golf long en, em i naispela ples tru. Na ol man em i pilai wantaim ol, ol i amamas long pilai wantaim. Olgeta dispela samting i save kamap taim man i pilai golf.

[Ol Piksa Kredit Lain long pes 23]

Photo Courtesy of Mauna Kea Beach Hotel

Photo Courtesy of Mauna Kea Beach Hotel