Sampela Tok i Kam Long Olgeta Hap
Sampela Pris Pasto i Mekim Pasin Sem
Wanpela lain bilong televisen long Ostrelia (Australian National Television) i bin kamapim wanpela stori (The Ultimate Betrayal) i tokaut olsem planti pris pasto long Ostrelia ol i bin mekim pasin sem na pasin pamuk. Long dispela stori televisen i tok, long olgeta wan handet wan handet pris pasto, 15 i bin mekim pasin sem long pikinini o repim sampela meri i wanlotu bilong ol. Taim televisen i tokaut long dispela samting, planti planti manmeri i telefon na tok, bipo ol tu i bin kisim wankain hevi. Planti ol i tok ol i bin pret, olsem na ol i no tokaut long dispela hevi. Wanpela meri i tok, taim em i pikinini wanpela bikman bilong misin i bin mekim pasin sem long em planti taim na dispela i putim bikpela hevi long em. Inap 40 yia em i bin haitim dispela hevi. Na narapela meri i tok, pris i bin mekim pasin sem long em taim em i pikinini, na pris i tambuim em long tokaut long dispela samting. Pris i tok, sapos em i kamapim dispela samting long ol man, orait, em bai salim em i go long bikpaia. Sampela misin i no orait long dispela tok i bin kamap long televisen olsem planti pris pasto i mekim dispela pasin nogut, tasol ol i tok, tru i gat dispela rong i stap.
Planti Man i Baim Gan Samting
Wanpela nius (New Scientist) bilong Inglan i tok, ‘long nau long olgeta hap graun, ol man i baim planti gan moa long ol man i wok bisnis long ol samting bilong pait.’ Bilong wanem i olsem? Wanpela man i save skelim dispela samting, nem bilong em Chris Smith, em i stori long as bilong dispela samting na em i tok, taim gavman komyunis i bagarap long Rasia, na taim pait i pinis long hap bilong Galf bilong Persia, ol man i tingting long baim ol samting bilong pait. Ol man i laik kisim ol dispela samting, long wanem, em i no nupela na i no gat bikpela pe bilong en. Chris Smith na Andrew Ross bilong wanpela bikpela skul koles (U.S. Naval War College) long Amerika, ol i tok, ‘ol kantri i no gat planti wok bisnis samting, ol yet i baim ol dispela gan samting i go long ol man,’ na dispela i samting nogut.
Tok Lukaut Long Marasin Giaman
Long olgeta yia sampela kampani i save wokim ol marasin giaman na ol i save kisim planti bilion dola long en. Tasol lain Wol Helt Oganaisesen i tok, ol dispela marasin giaman i no olsem planti narapela samting giaman, ‘ol marasin giaman inap bagarapim skin bilong man o kilim em i dai.’ Planti bilong dispela marasin i no marasin tru o i gat liklik liklik hap marasin tasol long en, olsem na i no gat strong bilong helpim wanpela man i gat bikpela sik olsem sik malaria o sik daiabitis samting. Sampela bilong ol dispela marasin giaman i gat ol samting nogut insait long en olsem gip. Wol Helt Oganaisesen i tok, pasin bilong wok bisnis long ol marasin nogut i samting nogut tru taim yumi tingim samting i bin kamap long sampela pikinini Naijiria. Ol i bin dring wanpela marasin ol man i tok em i gutpela bilong helpim kus bilong ol, tasol dispela marasin i bin kilim ol i dai. Dispela em i bikpela hevi bilong ol rabisman long ol kantri i no gat planti wok bisnis long en, long wanem, ol i ting marasin i gutpela na em i gat liklik pe tasol, na kampani i bin wokim i gat nem, olsem na ol i baim. Karamap bilong marasin o toksave i stap long marasin i no makim olsem dispela marasin i gutpela na em i no marasin giaman. Yumi save ol man bilong wokim marasin giaman ol inap wokim karamap giaman tu, a?
Ol Mama i Wok Mani
Wanpela lain (National Association of Working Women) i tok, long Amerika bikpela lain meri olsem 21 milion, em ol i gat pikinini i no winim yet 18 krismas, ol i wok mani. Bipo long 1960 i gat 6 milion 600 tausen meri tasol i wok mani na ol i gat pikinini i no winim yet 18 krismas. Planti narapela mama, olsem 3 milion 100 tausen em ol i save wok mani, em ol mama i gat pikinini i no winim yet tupela krismas. Kirap long 1970 namba bilong ol i go antap olsem 129 pesen. Olsem na wanem samting bai kamap bihain? Dispela lain (National Association of Working Women) i tok, long 1995 samting long olgeta wan handet wan handet mama, 65 i gat pikinini i no go yet long skul na 77 i gat pikinini i go pinis long skul, ol bai mekim wok mani.
Naijiria i Kaunim Ol Man
Long Mas 20, 1992, olgeta bikpela nius bilong Naijiria i raitim wankain het-tok—Naijiria i gat 88,514,501 manmeri. Long Novemba 1991 gavman i bin wokim sensus bilong kaunim ol manmeri, olsem na ol i save hamas man i stap long Naijiria. Dispela sensus i kamapim tupela samting em ol man i kirap nogut long en. Wanpela em olsem: Naijiria i no olsem planti narapela kantri, long wanem, ol man i planti na ol meri nogat. Na narapela samting em olsem: Long 1963 ol man i ting bihain namba bilong ol manmeri long Naijiria bai go antap olsem 100 milion i go inap 120 milion, tasol long 1992 taim ol i wokim sensus, namba i liklik olsem 88 milion samting. Tasol maski namba bilong ol manmeri i no go antap olsem ol i bin ting em bai mekim, Naijiria i gat planti manmeri moa long en, winim ol narapela kantri long Afrika.
Guria Long Hap Bilong Rain
Long Epril 1992 bikpela guria i kamap long hap bilong Rain long Jemani. Kirap long yia 1756 i kam inap long Epril 1992 i no gat narapela guria i gat strong olsem dispela guria i bin kamap. Mak bilong strong bilong dispela guria em 5.5 i go inap long 5.8 long skel Rikta (Richter). Sampela man i bin kisim bagarap, na tu, guria i bagarapim planti samting, pe bilong en i olsem planti milion kina. Na inap liklik taim ol i mas pasim wanpela faktori i stap klostu, em i save wokim ol samting atomik. Wanpela nius (GEO) i tok, long ples bilong skelim strong bilong ol guria, ‘ol masin samting bilong skelim guria i wok kranki. Dispela masin i gat samting long en olsem pen bilong rait na i save kamapim wanpela kain rait, na taim guria i kamap, rait bilong en i go kranki olgeta na ing bilong pen i kapsait nabaut.’ Ol saintis i kirap nogut long strong bilong dispela guria, na inap long nau ol saintis i no inap tok stret bai guria i kamap o nogat.
Wit i Sot
Wanpela lain (Southern African Development Co-ordination) i tok, long dispela yia, hap saut bilong Afrika i mas baim 9 milion tan wit long ol narapela kantri. Wanpela nius bilong dispela lain i tok, ol i tingting planti olsem ol rot bilong trak na tren na sip na ol ples bilong bungim na putim i stap dispela planti tan wit, bai inap o nogat. Long 1991 dispela hap saut bilong Afrika i no kamapim planti wit na i wankain tu long 1992. Long dispela hap saut bilong Afrika, i no gat narapela taim kirap long yia 1900 i kam inap long nau i gat bikpela san na no gat ren, olsem na wit i sot.
Narapela Kain Bal Bilong Pilai Golf
Taim ol man i pilai golf ol i save pilai long wanpela hap graun, olsem na bipo dispela kain pilai i no save bagarapim sampela animal bilong solwara. Tasol inap longpela taim liklik ol turis i save pilai golf long ol sip ol i save raun long en. Wanpela nius (New Scientist) i tok, inap long 1989 ol turis i pilai golf long ol sip na ol i paitim planti bal i go pundaun long solwara. Long olgeta mun 500 tausen bal i save pundaun long solwara long dispela rot, na planti bilong ol dispela bal ol animal bilong solwara olsem trausel na weil na dolfin i daunim i go daun long bel. Olsem na wanpela lain (MARPOL) i save kamapim ol lo bilong ol samting long solwara, ol i putim tambu olsem ol man i no ken tromoi ol pipia plastik long solwara. Dispela lo long plastik i save tambuim ol bal bilong pilai golf tu. Olsem na kirap long 1989, ol man i raun long sip na pilai golf, ol i mas pasim wanpela umben bilong pasim ol bal na ol i no ken pundaun long solwara. Nau long San Diego long Kalifonia, wanpela saveman i wokim narapela kain bal bilong pilai golf. Em i olsem bal tru bilong golf, na taim man i paitim, em wankain long bal tru bilong golf. Tasol sapos dispela bal i pundaun long solwara em bai sting. Bipo ol i save wokim ol bal long gumi na ol i karamapim long skin plastik. Tasol nau ol i wokim skin bilong ol dispela bal long pepa ol i bin memeim, o gelatin (em wanpela marasin yumi inap kaikai), o long gras bilong solwara. Na namel bilong ol dispela bal ol i wokim long marasin sodium baikabonet na sodium sitret—em ol gutpela marasin i stap long Alka-Seltzer, em wanpela marasin bilong dring taim bel i gat sik.
Ol Katolik Long Frans i Gat Tupela Tingting
Long Frans long olgeta wan handet wan handet man, 84 i tok ol i bilong Misin Katolik, tasol ol man i skelim dispela samting i tok, i no gat planti i save go long lotu. Long olgeta wan handet wan handet, 12-pela tasol i save go olgeta taim long Misa, na 24 tasol i save go long Misa long ol bikpela de bilong lotu. Wanpela nius (L’Express) bilong Frans, i bin givim sampela askim long liklik lain Katolik bilong kisim tingting bilong ol long sampela bikpela bilip bilong misin. Ol i kisim save olsem: Long olgeta wan handet wan handet man, 25 i no bilip long kirap bek bilong Jisas Krais, na 30 i gat tupela tingting long ol mirakel Jisas i bin wokim, na 38 i no save bilip long God Triwan. Na tu, long ol wan handet wan handet man, 59 i no save bilip long klinpaia, na 60 i no save bilip long bikpaia, na 62 i gat tupela tingting long Satan, em i stap o nogat.