Ol Yangpela i Laik Save . . .

God i Save Harim Beten Bilong Mi?

SANDRA i gat 11 krismas na em i tok, “Mi laik save, Jehova i harim beten bilong mi o nogat, long wanem, mi no ting em i mekim olsem. Mi save long planti ol narapela yangpela ol i gat wankain hevi.” Alisa i gat 15 krismas na bipo em tu i gat wankain hevi long beten. Em i tok: “Mi pilim olsem mi toktok long mi yet.”

Long 1988 ol man i skelim dispela samting na ol i tok, planti yangpela long Amerika ol i bin beten long wan wan taim tasol, na i no planti i save beten planti taim. Sampela i pilim olsem God i no harim beten bilong ol. Ating sampela taim yu pilim olsem tu, a? Tasol Baibel i tok, sapos bilip i kirapim yumi long beten, ‘Man bilong harim beten’ bai harim tru! (Song 65:2) Tasol olsem wanem yu inap save olsem em i no harim nating beten bilong yu?

Man bilong raitim Song i tok: “God, yu tasol yu save kisim bek mipela na mipela i stap gut. Yu ken harim [beten] bilong mipela.” (Song 65:5; 66:​19, 20) Olsem na bilong wanem sampela i gat tingting olsem God i no harim beten bilong ol?

Ol Samting i Save Pasim Beten

Wanpela as em olsem sampela i no pren gut wantaim God. Sampela yangpela i ting olsem God i no stap. Na sampela i bilip, tasol ol i ting God i stap longwe long ol. Wanpela yangpela Katolik i tok: ‘Mi bilip long God taim mi gat hevi tasol. Long kain taim olsem, mi save askim Em long helpim mi.’ Na narapela yangpela i tok: “Mi beten long God taim mi laikim tru wanpela samting.”

Tasol yumi save beten bilong soim olsem yumi gat bilip, na yumi daun na givim bel long em​—yumi no beten tasol long taim yumi gat hevi o bilong inapim laik bilong yumi yet. Na i no gutpela long beten sapos yu ting, ating God i stap. Baibel i tok: “Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Ol man i gat tupela tingting, God i no save harim beten bilong ol. (Jems 1:​6-8) Jehova i save harim beten bilong ol man i save laikim em. Ol i no save beten tasol long taim ol i gat hevi. Olsem 1 Tesalonaika 5:17 i tok, ol i save “beten oltaim.”

Tasol sori tumas, sampela yangpela Kristen i save long Jehova, tasol ol i no pren gut wantaim em. (Song 25:14) Ol i save beten wan wan taim tasol, olsem na God i no save harim beten bilong ol. Olsem wanem? Ating wankain samting i kamap long beten bilong yu tu? Sapos olsem, yu mas kisim sampela save moa long God na go “klostu tru long God.” (Jems 4:8) Yangpela meri Alisa, em yumi stori pinis long em, i gat tupela tingting. Em i no save Jehova i stap tru o nogat. Tasol em i stadi long Baibel na isi isi dispela save em i kisim i rausim tingting kranki bilong em. Dispela i helpim em long i go klostu moa long God.

Tingting na pasin bilong man em narapela as na God i no save harim beten bilong em. Man bilong raitim Song i tok: “Tasol sapos mi ting pasin nogut em i samting nating, orait Bikpela i no inap harim beten bilong mi.” (Song 66:18; Sindaun 15:29) Tasol yu ting God bai harim beten bilong yu sapos yu mekim ol samting i wok long bagarapim bel bilong em​—sapos yu kisim drak, o yu smok, o yu harim musik i kamapim pasin sem samting, o yu mekim pasin pamuk samting? Nogat tru, a? Olsem na Jehova i no save harim beten bilong ol man i save giaman long bihainim pasin i stret tasol ol i mekim hait ol pasin nogut, em “ol man bilong giaman.” (Song 26:4) Em i save harim beten bilong “man i bihainim laik bilong [em] long olgeta samting, na i mekim stretpela pasin oltaim, na i save tok tru oltaim.” (Song 15:​1, 2) Olsem na sapos yu pilim olsem yu toktok long yu yet taim yu beten, orait ating yu mas senisim sampela pasin bilong yu.

Mekim Nabaut Long Beten

Yu inap askim God long wanem ol samting? Jisas i tok: “Sapos yupela i askim Papa long wanpela samting long nem bilong mi, orait em bai i givim long yupela.” (Jon 16:23) Tingim dispela tok wanpela samting. Olsem wanem? Yu ting God i redi long harim olgeta samting yumi singautim em long mekim? Bai em inapim olgeta laik bilong yumi? Jisas i mekim dispela tok long Jon 16:23 na sampela aua bihain em i dai. Olsem na yumi save em i no askim nabaut long ol liklik liklik samting, a? Jems 4:3 i tok strong olsem yumi no ken mekim nabaut taim yumi beten. Em i tok: “Taim yupela i beten long kisim samting, yupela i no save kisim, long wanem, tingting bilong yupela i no stret . . . Yupela i ting long kisim ol samting bilong tromoi tasol long laik bilong bel bilong yupela.”

Planti man long nau ol i save mekim nabaut taim ol i beten. Wanpela tim bilong basketbal i save kolim wankain beten long pinis bilong olgeta pilai. Tasol yu ting God em i man bilong laikim pilai basketbal? (Lukim Galesia 5:26.) O olsem wanem long meri em i save beten askim God long ol su? Em i tok: “Sampela taim i gat wanpela o tupela su tasol i stap long ol stua em inap long lek bilong mi. Sapos mi no gat mani, bai mi beten askim God long helpim mi na taim mi kam bek ol dispela su i mas stap yet.” Tasol dispela kain pasin bilong beten i no gutpela, a? Yumi no ken ting God bai go pas long ol stua na helpim yumi long baim ol samting yumi laikim.

Na i wankain tu sapos yu mekim wanpela rong. I no stret sapos yu beten askim God long helpim yu long abrusim strafe. (Hibru 12:​7, 8, 11) Na God i no inap helpim yu sapos yu laik kisim gutpela mak long skul, tasol yu no bin stadi gut.​—Lukim Galesia 6:7.

Beten Long “Laik Bilong God Yet”

Aposel Jon i kolim wanpela bikpela samting bilong beten: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. Olsem na yumi no save pret long God. Nogat. Yumi save go klostu long em.” (1 Jon 5:14) Beten bilong Jisas i makim sampela samting yumi ken askim God long en. Em i lainim yumi long beten long (1) nem bilong God i mas i stap holi, (2) Kingdom bilong God i mas kam, (3) laik bilong God i mas kamap, (4) givim ol samting bilong skin na spirit em yumi sot long en, na (5) helpim yumi long abrusim ol traim bilong Satan.​—Matyu 6:​9-13.

Yumi ken bihainim wankain pasin taim yumi beten long ol narapela samting tu. Olsem 1 Pita 5:​7 i tok, ‘God i save wari long yumi. Olsem na olgeta hevi yumi i karim, yumi i mas putim long han bilong en.’ Dispela i makim olsem i stret yumi ken beten long kain kain samting. Olsem wanem? Yu mas tingim ol samting yu laik lain long en long skul? Sapos olsem, orait askim God long givim gutpela tingting long yu. (Jems 1:5) O ating yu bin mekim sampela pasin kranki. Orait askim God long lusim tingting long dispela pasin kranki bilong yu.​—Aisaia 55:7; 1 Jon 1:9.

Tasol yu mas mekim ol samting i stret long beten bilong yu. Yangpela man Klint i kamap wanpela painia taim em i lusim haiskul. Inap planti mun em i no painim wanpela man i laik stadi long Baibel wantaim em, olsem na em i beten long God. Em i no wet long wanpela man i kam long em long stadi long Baibel. Em i wok strong long autim tok long haus bilong ol man, na i no longtaim na em i painim sampela man em ol i laik stadi long Baibel wantaim em.

Taim God i Harim Beten

Sampela taim pasin bilong beten yet inap helpim yu. Yangpela meri Sandi em i gat hevi long pasin bilong pilai long skin. Em i tok: “Mi save beten long Jehova na askim em long helpim mi. Taim mi mekim olsem, mi save olsem bihain mi no ken pilai long skin.”

Sampela taim i olsem God i harim beten bilong yumi na em i wokim rot bilong ol samting i ken kamap. Yangpela man Ken i laik go long Haus Kingdom bilong ol Witnes Bilong Jehova long mekim wanpela tok bilong Baibel. Tasol em i no gat rot long i go. Em i beten. Sampela minit bihain susa bilong em i kam. Susa bilong em i no wanpela Witnes, tasol em i bringim Ken long ka i go lusim em. Olsem wanem? God i harim beten na i kirap helpim em? Ating. Tasol taim wanpela samting olsem i kamap na i helpim yumi, i gutpela sapos yumi tok tenkyu long God. Pol i tok: “Maski wanem samting i kamap long yupela, yupela i mas tenkyu long God.”​—1 Tesalonaika 5:18.

Taim yu beten, yu no ken ting God bai mekim ol narapela kain samting tru bilong helpim yu. Na no ken ting olsem olgeta liklik samting i kamap em wok bilong God. Jehova i save helpim yu long kain kain rot, olsem: Taim yu kaunim wanpela tok long Baibel o ol nius bilong Baibel; o papamama o wanpela pren Kristen i givim gutpela tok long yu. Sampela taim yu yet yu mas skelim, God i laik bai yu mekim wanem. Ating bihain bai dispela samting i kamap ples klia na yu ken save.

No ken ting God i mas kirap kwik long helpim yu long taim yu makim. Jeremaia i tok: “I gutpela sapos ol man i stap isi na i wetim Bikpela i kisim bek ol.” (Krai 3:26) Na yu no ken ting God bai mekim wankain samting stret olsem yu laikim. Aposel Pol i askim God 3-pela taim long rausim wanpela sik long skin bilong em, tasol God i no mekim. (2 Korin 12:​7-9) Olsem wanem? Dispela samting i mekim na Pol i lusim pasin bilong beten? Nogat tru. Em i wok yet long mekim wok bilong Jehova. Em yet i tok: “Yupela i mas holim strong pasin bilong [beten].” (Kolosi 4:2) Olsem na “yupela i mas . . . askim God . . . Yupela i mas wok long painim samting . . . Yupela i mas paitim dua.” (Matyu 7:7) Sapos yu mekim olsem, bai yu go klostu long God, na ating em bai harim ol beten bilong yu.

[Ol Piksa long pes 15]

Yumi no ken beten askim God long ol mani kago samting