Nupela Taim Bilong Amamasim Olgeta Man
ATING em i hatwok long sampela i bilip olsem nupela taim i klostu nau. Tasol em i mas kamap long taim stret God i makim bambai strong bilong graun long lukautim laip i no ken bagarap olgeta. Na dispela nupela taim bai rausim olgeta samting i laik bagarapim i stap bilong yumi man. Olsem wanem dispela nupela taim bai mekim olsem?
Wanpela saveman bilong bipo (Arnold J. Toynbee) em i tok: ‘Yumi mas mekim wanem bilong i stap laip yet?’ Em yet i bekim dispela askim olsem: ‘Long rot bilong wok politik, olgeta gavman i mas wok wantaim na stap wanbel long dispela wok.’
Tru tumas, nupela taim em rot bilong helpim ol man long stap wanbel na wok wantaim, tasol dispela i no inap kamap long rot bilong wok politik. Dispela nupela taim i no inap bihainim ol lo demokratik o ol narapela lo politik ol man i kamapim. Ol samting dispela nupela taim bai kamapim, em bai kamapim tru, long wanem, wanpela gavman tasol bai bosim graun long dispela taim. Dispela gavman bai pinisim kwik olgeta hevi yumi man i save kisim long nau. Em bai mekim olsem wanem? Em bai pinisim ol samting i save kamapim ol dispela hevi na ol samting i save pasim rot bilong ol man i laik stretim ol dispela hevi.
Tasol sapos ol sinman i insait long dispela gavman, em bipo ol i save mekim pasin giaman samting na ol i no bin stretim ol hevi, olsem wanem ol inap kamapim gutpela taim i no gat hevi moa? Orait, tingim: Sapos ol stretpela man ol i no gat sin, ol tasol i bosim dispela gavman, na ol i no tingim ol yet tasol, ol i tingim ol man ol i save bosim, orait nau i gat rot bilong pinisim ol hevi, a?
Ol Rot Bilong Stretim Ol Hevi
Taim dispela gavman i gat stretpela pasin i bosim dispela graun, olgeta gavman bilong olgeta kantri bai pinis olgeta. Ol bikpela man bilong gavman, na ol ambasedo, na ol narapela man politik bai ol i no gat wok moa long bosim olgeta lain man. Olgeta haus gavman na ofis bilong ol bai stap nating. Olsem na gavman i no ken tromoi moa mani bilong lukautim ol dispela samting, na bilong salim ol man bilong gavman i go long ol liklik na bikpela kibung samting, na bilong baim ol man i wok seketeri o kuskus samting.
Taim wanpela stretpela gavman i bosim dispela graun, pasin bilong litimapim na birua long narapela kantri bai pinis, olsem na gutaim bai kamap, long wanem, olgeta lain bai stap wanbel. Ol ami na nevi na ol bikman bilong ol, na olgeta samting bilong ol bilong pait—olgeta bai i no gat wok moa bilong lukautim kantri bilong ol. Na taim stretpela gavman bilong dispela graun i bosim ol samting, pasin bilong mekim hait ol wok nogut long salim o baim ol samting bilong pait, dispela bai pinis. Na wanpela kantri i no ken tok kros na pait wantaim narapela kantri bilong kisim wanpela hap graun. Olgeta manmeri bilong graun bai stap brata brata. Olsem na pasin bilong litimapim nem bilong kantri bai pinis olgeta.
Na tingim sampela gutpela samting moa bai kamap aninit long wanpela stretpela gavman. Olsem: Ol bikpela bisnisman, olsem ol bisnisman bilong wokim ol samting bilong pait, bai ol i no gat strong moa long grisim ol lain politik bilong larim ol i wokim yet na baim i go long ol narapela kantri ol dispela samting nogut bilong pait. Na ol dipatmen bilong gavman bai ol i no gat rot moa long tromoi nating mani bilong gavman long wokim sampela samting i save helpim wan wan man tasol. Na sampela man i laik stretim dispela hevi long bagarapim graun na win na wara, tasol sampela man i laik pasim ol long mekim olsem, long wanem, ol i tingim mani ol inap kisim long rot bilong wokim bisnis samting, maski dispela bisnis i bagarapim graun o win o wara samting.
Sampela Hevi Moa Bai Pinis
Dispela kain stretpela gavman i no inap orait long pasin nogut i kamap. Taim em i bosim olgeta samting, em bai stretim ol man i mekim pasin raskol. Olsem na olgeta man i stap aninit long dispela gavman i no ken pret moa long ol man nogut bai raun na kilim ol i dai.
Tasol olsem wanem long ol bos bilong ol raskol na ol man i save maketim ol drak nogut? Stretpela gavman bai pinisim tru dispela ol man na wok bilong ol. Na taim dispela gavman i kirap, wantu em bai pinisim sampela pasin nogut moa bilong dispela graun, olsem pilai laki, na lain raskol i pait wantaim narapela lain raskol, na ol piksa nogut bilong pasin sem, na pasin pamuk, na pasin bilong wok hait long kisim ol kago i kam insait long kantri. Taim dispela stretpela gavman i mekim olsem, dispela em gutpela rot bilong stretim hevi bilong mani samting, long wanem, nau ol gavman i tromoi bikpela hap mani long stretim ol dispela samting.
Tru tumas, maski sampela man i gat bikpela save tru, ol i no inap stretim ol dispela hevi dispela nupela taim tasol bai stretim. Na taim dispela ol hevi i pinis, ol bai pinis olgeta. Na ol man i kamap bihain, bai ol i no ken karim ol dispela kain hevi gen.
Em i No Wanpela Tingting Nating
Tasol ating yu gat askim olsem: ‘Ol man i gutpela olgeta na ol bai bosim dispela nupela taim, ol bai kam we?’ God bai makim ol! Yu ting em tok win nating? Tingim: Sapos yu gat strong long stretim olgeta hevi long dispela graun, bai yu mekim? Ating bai yu mekim, a? Olsem na yumi ken save, God bai mekim olsem tu, a?
Yumi save, God Jehova bai kamapim nupela taim, na long rot bilong wanpela stretpela gavman em bai bosim olgeta hap. Jisas Krais i bin lainim ol man long beten long dispela nupela gavman i mas kam, olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:10.
Dispela Kingdom em wanpela gavman tru, em wanpela gavman bilong bosim graun olgeta. King bilong dispela gavman, Jisas Krais, bai “bosim olgeta manmeri long hap bilong solwara i stap klostu na i go inap long solwara i stap longwe . . . na i go inap long olgeta hap bilong graun.” (Song 72:8) Na klostu nau dispela gavman bai pinisim olgeta gavman bilong dispela graun olsem Baibel i tok promis long en: “Taim ol dispela king i stap yet God bai i kirapim wanpela kingdom [em gavman King Krais Jisas bai bosim] na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:44.
God bai kamapim dispela gavman bilong bosim graun olgeta, na ol man bilong lukautim dispela gavman, ol i no man bilong dispela graun, olsem na yumi save ol inap mekim ol samting ol man bilong dispela graun i no inap mekim. Baibel i stori long gavman bilong God i olsem wanpela gavman bilong heven, na King bilong dispela gavman em Jisas Krais. Em i gat 144,000 wanwok, em ol man spirit, na ol bai wok wantaim em long dispela gavman. Yumi ken bilip long olgeta dispela wanwok bilong Krais, long wanem, taim ol i stap long graun na God i no bin kirapim ol yet long matmat bilong go long heven, ol i bin i stap gut long God. Olgeta inap helpim gut yumi, long wanem, ol yet i save long ol hevi yumi save karim na ating sampela i bin karim wankain hevi.—KTH 14:1-3.
Tingim ol hevi dispela wok king bai pinisim. Ol dispela man spirit i no inap dai o les long helpim yumi. (1 Korin 15:50, 53) Na i no gat wanpela man inap grisim ol long mekim pasin i no stret, long wanem, ol dispela man spirit i stap long heven. Tru tumas—mani, dring i gat bikpela pe, tiket bilong raun na kisim malolo, na ol narapela samting, inap grisim wanpela man bilong dispela graun, tasol em i no inap grisim wanpela man spirit. Olsem na olgeta man i stap aninit long wok king bilong dispela lain long heven ol bai stap gutpela, i no gat wanpela samting bai mekim nogut long ol olsem planti gavman i save mekim long nau.
Nupela Taim Bai Amamasim Yu
Olsem wanem? Yu wanpela lapun? Long i stap bilong yu, yu bin kisim planti save na yu bin lain long planti samting, a? Tasol ating nau yu save, maski tingting bilong yu inap wok gut, skin bilong yu i no strong moa long mekim ol samting na i no inap mekim hariap ol samting tingting bilong yu i laik bai yu mekim. Tru tumas, skin i no gat strong moa. Nau ai bilong yu i go tudak na yau bilong yu i no harim gut ol tok, na ol masol i no gat strong moa na skin bilong yu i save pen oltaim.
Tasol olsem wanem sapos skin bilong yu i yangpela gen, winim long taim yu gat 23 krismas samting? Na nau ol save yu bin kisim long i stap bilong yu i wok wantaim yangpela skin bilong yu? Olsem na maski wanem wok yu mekim, bai yu amamas long mekim, long wanem, skin bilong yu i strong. Na sapos yu wanpela yangpela, ating bai yu amamas, long wanem, bai yu stap yangpela yet na skin bilong yu bai strong yet, na yu inap lain long planti samting i go inap oltaim.
Orait, nau tingim narapela samting. Sapos ol wantok, na ol pren, na ol wanblut bilong yu olgeta i gat gutpela tingting na skin olsem yu, tingim ol samting yupela inap mekim taim yupela i wok wantaim long wokim wanpela haus o narapela samting. Ol man i gat gutpela save long wokim wanpela samting, olsem ol man bilong wokim piksa, na ol man bilong pilaim musik, na ol man i save tingim wanpela samting na bihain ol i wokim, na ol man bilong wokim gaden bilas—olaman, bai yumi kirap nogut long olgeta samting ol bai wokim, a? Ol bai malenim ol naispela piksa, na ol bai wokim ol gutpela gutpela haus, na ol bai planim ol naispela gaden bilas, na ol bai wokim ol gutpela samting bilong pilaim musik.
Wanpela wok dispela nupela gavman bai mekim, em bai helpim olgeta manmeri long kamap gutpela olgeta long tingting na skin. Ai na yau na olgeta narapela samting bilong skin bilong yu bai wok gut tru. Tasol hamas yia na skin bai stap gutpela na wok gut? Tingim: Sapos wanpela gavman long dispela graun i tok long helpim yu na skin bilong yu i ken wok gut inap wanpela yia sapos yu givim liklik mani long em, ating kwiktaim bai yu sanap long lain bilong kisim dispela samting, a? Tasol dispela nupela gavman bilong God i tok, skin bilong olgeta manmeri bai kamap gutpela olgeta, na ol bai stap olsem inap oltaim oltaim, na ol i no ken givim pe long dispela gavman.
Nogut yu ting dispela samting i no inap kamap. Ol manmeri bilong dispela graun bai kisim dispela samting. Olsem na tingim sampela blesing ol man i laikim tumas God ol bai amamas long kisim, olsem pes 7 i go inap pes 10 i stori long en.
[Blok/Ol Piksa long pes 7-10]
Ol Samting Nupela Taim Bai Kamapim
Kros Pait Bai Pinis
“God bai i rausim ol man i save mekim pasin nogut na i no save bihainim em.”—Sindaun 2:22.
Pait Bai Pinis
“Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”—Aisaia 2:4.
Olgeta Man Bai i Gat Planti Gutpela Kaikai
“Planti rais na wit samting i ken kamap long ol gaden bilong ol manmeri, inap olsem i save kamap long Lebanon.”—Song 72:16.
Olgeta Man Bai i Gat Gutpela Haus na Gutpela Wok
“Ol manmeri bilong mi bai i wokim ol haus na stap long ol. . . . Ol birua bai i no inap kam moa na rausim ol manmeri bilong mi na sindaun long ol haus bilong ol.”—Aisaia 65:21, 22.
Ol Man na Ol Animal i Stap Gut Wantaim
“Ol weldok na ol pikinini sipsip bai i stap gut wantaim, na ol lepat bai i slip wantaim ol pikinini meme. . . . Na ol liklik manki bai i was long ol.”—Aisaia 11:6.
Ol Sik na Lapun na Indai Bai Pinis
“Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”—KTH 21:4.
Ol Man i Dai Pinis Bai Kirap Bek
“Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat.”—Jon 5:28, 29.