Bilip Bilong Wyndham i Bin Helpim Ol Narapela
NIUS Kirap! bilong Ogas 22, 1991 (tok Inglis) i bin raitim stori bilong Wyndham Cook taim em i holimpas lo bilong God long ol Kristen i mas klia long blut. (Aposel 15:20; 21:25) Insait long nek bilong Wyndham sampela rop bilong blut i bagarap liklik, na em i gat sik hemopilia tu [blut i no save drai taim sua i kamap]. Stori bilong em i bin tok, em i winim dispela hevi bilong blut i ran i go i go, tasol wanpela taim mak bilong blut i go daun aninit long 2. Sori tru, dispela liklik toksave i bin stap long pinis bilong stori bilong em: “Taim magasin [Kirap!] i redi bilong prinim, Wyndham i dai long wanem, sik bilong blut i ran i kamap gen long em.”
Dispela i Helpim Ol Narapela Yangpela
Planti yangpela long Amerika i raitim pas long Kirap! na ol i tok tenkyu na ol i tokaut long olsem wanem dispela stori i bin kirapim tingting bilong ol. Wanpela i tok: “Taim mi kaunim olsem wanem dispela manki i gat 15 krismas i toktok long ol dokta na i tokim ol bilong wanem em i no ken kisim blut, mi tingting long bilip bilong mi yet na samting bai mi mekim sapos kain hevi olsem i painim mi. Pasin bilong Wyndham long sanap strong na holimpas bilip, i kirapim mi tru, na mi laik sanap strong olsem em sapos wanpela bagarap o dai i painim mi.”
Pas bilong wanpela yangpela i gat 15 krismas i tok: “Taim mi kaunim pinis stori bilong Wyndham, na olsem wanem em i karim bikpela hevi na em i bilip long Jehova inap long em i dai, mi krai. Na mi askim skin bilong mi yet, ‘Sapos hevi olsem i painim mi, mi inap putim laip bilong mi long han bilong God na wetim em i tingim mi?’
“Mi kaunim dispela stori planti taim na mi laik kamapim gen taim mi bel hevi long ol samting nogut bilong dispela graun. Bilip bilong Wyndham i strongim mi. Mi amamas long bungim em gen long nupela graun Jehova i promis long en.”
Narapela yangpela bilong Nu Yok i raitim pas olsem: “Planti taim mi tingting, sapos samting i painim mi olsem i bin painim Wyndham Cook, bai mi tok wanem sapos dokta i tok bai mi dai sapos mi no kisim blut? Mi save kisim strong long ol man i stap gutpela piksa olsem Wyndham long taitim bun tru long mekim wok bilong Jehova.”
Wanpela yangpela bilong Wosington i tok: “Asde mi kisim dispela magasin long posofis, na mi kaunim taim mi no go bek yet long haus. Mi ringim ol pren bilong mi long kongrigesen bilong tokim ol, ol i mas kaunim dispela stori. Na long nait mipela mekim famili-stadi long dispela stori.” Na em i tok moa: “Dispela stori i kirapim mi na strongim bilip bilong mi na mi askim skin bilong mi yet, olsem wanem mi yet inap winim kain traim olsem?”
Wanpela yangpela bilong Not Bewik i raitim pas olsem: “Mi gat 15 krismas wankain olsem Wyndham, olsem na mi inap pilim hevi bilong em. Pasin bilong em long sanap strong na em i no surik liklik i kirapim mi long wok strong long mekim wok bilong Jehova. Em i amamasim Jehova, maski em i gat bikpela sik na i no gat strong, olsem na i gat wanem as na mi wok isi isi tasol?
“Taim mi kaunim pinis dispela stori aiwara i kamap long ai bilong mi. Mi pilim olsem mi bin save long Wyndham inap longtaim. Na gutpela sapos i olsem. Mi lukim piksa bilong em wantaim papamama bilong em na mi ting, bai mi amamas tru long lukim em gen long taim bilong kirap bek, taim em i no gat pen moa.”
Narapela i gat 15 krismas i raitim pas long papamama bilong Wyndham long tokim ol long tingting bilong em long dispela stori, olsem: “Pasin bilong Wyndham long sanap strong i helpim mi long save mi mas redi long kamapim bilip bilong mi. Samting olsem inap painim mi tu. Sapos dispela i kamap long mi, mi laik bai mi gat strongpela tingting na mi no pret olsem Wyndham long bihainim ol tok bilong Baibel.
“Mi no bin bungim Wyndham, tasol mi wetim tru taim bilong nupela graun bai kam, na bai mi ken bungim em. Stori bilong em i kirapim mi tru long givim bel olgeta long mekim wok bilong Jehova inap long pinis.”
Em i Strongim Bilip Bilong Olgeta
Wanpela mama bilong Niu Jesi i tok: “Mi wanpela Witnes Bilong Jehova inap 22 yia. Mi save kaunim olgeta magasin bilong yumi long olgeta taim. Tasol mi no kaunim yet wanpela stori i sutim bel bilong mi na i strongim mi olsem dispela stori bilong Wyndham Cook.
“Nau mi laik mekim yet wok God i givim long mipela ol papamama na helpim pikinini meri bilong mi i gat 10-pela krismas long sanap strong na autim bilip bilong em olsem Wyndham i bin mekim. Maski em samting bilong kisim blut o kisim drak o pasin pamuk samting o sampela narapela trik bilong Satan, yumi mas strongim bilip bilong yumi. Mipela ol bikpela manmeri i mas mekim olsem, na ol yangpela i mas mekim moa yet.”
Wanpela Witnes bilong Kentaki i raitim tok olsem: “Dispela stori i sutim tru lewa bilong mi, winim olgeta narapela samting mi bin kaunim. Wyndham em i gutpela piksa bilong olgeta yangpela i ken bihainim. Mi krai taim mi kaunim ol samting i painim dispela yangpela Witnes. Nau mi save, mipela olgeta, yangpela na lapun i mas sanap strong olsem em. Gutpela piksa bilong Wyndham i kirapim mi long skelim mi yet. Dispela i mekim na mi wok strong moa yet long givim bel olgeta long Jehova na mi traim long stap olsem gutpela piksa olsem Wyndham na litimapim nem bilong Jehova.”
Narapela Witnes bilong Pam Spring, Kalifonia i tok: “Bel bilong mi i pilim tru dispela stori. Mi gat 5-pela pikinini na mi beten, sapos kain samting olsem i painim ol, bilip bilong ol i ken strong olsem bilong Wyndham. . . . Wyndham em i gutpela piksa bilong ol yangpela bilong yumi.”
Sapos man i bilip tru, em bai wet long kisim ol samting God i promis long en, maski em i no bin lukim dispela yet o dispela i no kamap yet. (Hibru 11:6) Wyndham i bin save gut long ol promis bilong Baibel, olsem na em i bilip long nupela graun God bai kamapim na ol man i dai pinis bai ol i kirap bek. (Aposel 24:15; 2 Pita 3:13; KTH 21:3, 4) Taim man i holimpas bilip inap long em i dai, dispela inap strongim lain bilong God long olgeta hap bilong graun.—1 Pita 5:9.