Ol Yangpela i Laik Save . . .

Olsem Wanem Mi Ken Lusim Dring?

‘Olgeta taim long de bihain long en mi save pilim nogut tru!’—Bob i tok olsem.

‘Planti taim mi gat hevi​—wantaim papamama, ol wantok, polis, na long skul!’​—Jerome i tok olsem.

BOB na Jerome i bin kisim hevi, long wanem, tupela i bin winim skel bilong tupela long dring. Bihain dring i kalabusim tupela. Bihain Bob i mekim mekim na em i lusim dring, tasol Jerome i wok yet long winim dispela hevi.

Long olgeta hap planti yangpela i kalabus long dring. Ol man i tok, inap 5 milion yangpela long Amerika i gat bikpela hevi long dring. Sapos yu wanpela yangpela Kristen ating yu bin abrusim pasin bilong traim dring, a? Tasol ating ol samting mipela i raitim hia inap strongim bel bilong yu na bai yu no ken tru insait long pasin bilong dring. Bihain, taim krismas bilong yu inap long mak gavman i putim bilong man i ken dring, na wan wan taim yu laik dring liklik, em samting bilong yu yet. Tasol sapos dring i kalabusim yu pinis, mipela i laik bai ol dispela tok i helpim yu long winim dispela hevi. Sapos yu wok strong long winim hevi bilong dring, Jehova bai givim strong long yu na bai yu inap sakim dring.

No Ken Giaman

Namba wan bikpela samting, em yu mas save yu gat wanpela hevi. Ol man i save dring oltaim, ol i ting ol i no gat hevi. Wanpela yangpela i gat 15 krismas i tok: ‘Mi no gat hevi long dring. Long olgeta nait mi save dring 6-pela botol bia tasol.’ Dispela kain man i wankain long man Baibel i stori long em olsem: “Em i save hambak long em yet na i ting olsem, ‘Mi namba wan tru. God i no inap painimaut ol pasin nogut mi bin mekim.’ ”​—Song 36:2.

Tru tumas, sapos yu gat dispela hevi long dring, yu no ken giamanim skin bilong yu yet.a Sapos ol wantok o brata susa o papamama i tok yu save dring tumas, yu mas harim tok bilong ol. Yu no ken ting ol i birua long yu, long wanem, ol i kamapim trupela tok. (Galesia 4:16) Bipo long olgeta Sarere Sande, yangpela Bob (em pastaim yumi stori long em), em i bin dring planti. Pren bilong Bob i kamapim dispela hevi long em, tasol Bob i no harim tok, em i ting em i no gat hevi. Tasol dring i mekim wanem long sindaun bilong Bob? Em i tok: ‘Sapos mi no dring, tingting bilong mi i no stap isi liklik, na taim mi dring, mi no inap bosim skin bilong mi. Mi no pas gut wantaim famili bilong mi na mi no stap gut wantaim God.’

Narapela taim Bob i bin tokim pren bilong em, skin i save singaut long dring. Nau Bob i save, dring i kalabusim em, olsem na em inap mekim sampela samting bilong winim dispela hevi.

Wok Strong Long Lusim Dring

Saveman George Vaillant i tok: ‘Ol dokta inap helpim man long winim hevi bilong dring oltaim, tasol dispela man yet i mas mekim sampela samting bilong winim hevi.’ Olsem na long tingting na bel yu mas strong long lusim dring. Sapos yu no mekim olsem, dispela pasin inap kilim yu i dai. Wanem ol samting inap helpim yu? Sapos yu tingting long ol samting nogut pasin bilong dring inap mekim long yu, dispela bai helpim yu long no ken laikim “pasin nogut.”​—Song 97:10.

Ating i gutpela sapos yu tingting gut long ol hevi pasin bilong dring i save kamapim. Em inap bagarapim yu long skin na tingting na bel. Tru, sampela i ting olsem dring i save helpim man long daunim hevi bilong em, tasol sapos yu kisim dring olgeta taim bilong helpim yu taim hevi i painim yu, ol hevi bilong yu bai go bikpela moa​—bai yu no pas gut wantaim ol pren na famili bilong yu. Na dring i save daunim wok bilong kru na em inap “paulim tingting” bilong yu na yu inap mekim sampela pasin i no stret.​—Hosea 4:11.

Na yu mas tingim​—sapos yu dring planti, dispela inap bagarapim skin bilong yu, olsem klok, lewa, na ol narapela samting. Olsem na Baibel i tok, man i dring planti i gat bikpela hevi​—em ‘i save sori long em yet, na i save toktok planti na kirapim pait, na i save kisim birua long skin bilong em.’ (Sindaun 23:​29-30) Olsem wanem? Sapos yu dring na kisim amamas bilong liklik taim tasol, em i gutpela sapos dispela pasin i bagarapim skin bilong yu?

Tingim gut dispela samting: Yu no ken ting yu mas dring na bai yu ken i stap amamas. Dring inap giamanim yu. Sapos yu laik amamas long yu yet, na kisim strongpela skin, na pas gut wantaim ol poroman na famili bilong yu, yu mas bihainim ol lo bilong Baibel. (Song 1:​1-3) Na Baibel i stori long gutpela samting bai kamap bihain na yu inap kisim​—laip oltaim. Em laip i no gat hevi long bel na tingting na skin! (KTH 21:​3, 4) Dispela gutpela samting yu inap wetim i kamap bihain em inap helpim yu long abrusim dring.​—1 Korin 6:​9, 10.

Narapela i Mas Helpim Yu

Pasin bilong laik tru long winim dispela hevi em i no inap. I mas i gat wanpela man bilong helpim yu. King Solomon i bin tok: “Sapos tupela man i stap wantaim, em i gutpela. Sapos wanpela i pundaun, orait narapela i ken litimapim em gen.” (Saveman 4:​9, 10) Tasol ating i hatwok long bilip olsem narapela i ken helpim yu, a? Wanpela meri (Katy) i wok long winim hevi long dring oltaim em i tok: ‘Yu mas lain long bilip long narapela man, olsem famili bilong yu.’ Tru tumas, planti taim famili bilong yu inap helpim na mekim gut long yu.

Ating ol hevi long famili i mekim na yu kirap na dring, tasol sapos yu toktok wantaim papamama long as bilong hevi bilong yu, ating ol i ken stretim sampela hevi long famili, a? Olsem na ating i gutpela long tokim papamama yu gat wanpela bikpela hevi. Nogut yu putim hevi long ol na tok em asua bilong ol na yu gat dispela hevi. Na nogut yu haitim hevi bilong yu​—yu mas toktok stret wantaim ol na askim ol long helpim yu long winim hevi bilong yu. Sapos yu mekim olsem, famili bilong yu bai “pas gut.” (Efesus 4:16) Long dispela rot yupela olgeta insait long famili inap wok wantaim long winim dispela hevi.

Sapos i no gat wanpela long famili i save helpim yu, i gat ol narapela inap helpim yu.b (Sindaun 17:17) Wanpela elda Kristen i bin mekim gut long Bob. Em i bin bung wantaim Bob long olgeta wik inap sampela mun bilong helpim em long winim hevi bilong em. Bob i tok: ‘Samting dispela elda i mekim long mi, olsem em i tingim tru mi, i bin helpim mi long amamas long mi yet na helpim mi long winim hevi bilong mi.’​—Jems 5:​13, 14.

Tasol yu mas bilip strong long God Jehova bai helpim yu. No ken ting save bilong yu yet inap helpim yu. Jehova inap mekim orait ol manmeri em “hevi i bagarapim tingting bilong ol na ol i pilim nogut.”​—Song 147:3; 145:14.

Painim Ol Nupela Poroman

Wanpela lain long Nu Silan i bin skelim ol yangpela i dring planti, na ol i tok, ol poroman i gat strong long kirapim ol yangpela long dring. Olsem na sapos yu poromanim ol yangpela i save dring, yu tu bai dring. Na Baibel i tok: “Yu no ken poroman wantaim ol man i save dring planti wain.” (Sindaun 23:20) Painim sampela nupela poroman, ol i no save dring. “Sapos yumi poroman wantaim ol man nogut, bai ol i bagarapim gutpela pasin bilong yumi,” na sapos yumi poroman wantaim ol gutpela man, bai ol i helpim yumi.​—1 Korin 15:33.

Kim i save dispela tok i stret. Em i tok: ‘Em i hatwok, tasol mi save mi mas painim ol nupela poroman. Mi no laik stap klostu long ol man i dring na kisim ol drak.’ Ating i hatwok long painim sampela poroman ol i no dring, a? Tasol long lain bilong ol Witnes Bilong Jehova i gat ol gutpela yangpela, na ol i no brukim lo bilong gavman long mak gavman i putim bilong man i ken dring. Na ol i no save dring bilong painim amamas o bilong ranawe long hevi. Olsem na ol dispela kain yangpela inap helpim yu long rausim olgeta “pasin bilong olpela bel.”​—Kolosi 3:9.

Yu Inap Winim Hevi!

Bai yu hatwok long stap tambu olgeta long dring. Ana i tok: ‘Sapos narapela i skrapim bel bilong mi, o mi bel hevi, mi laik tru long dring.’ Planti taim dispela kain tingting i kamap long ol manmeri, em bipo ol i dring planti na nau ol i wok long lusim. Na sampela bilong ol i kirap na dring gen na bihain bel i kotim ol. Sapos dispela samting i kamap long yu, tingim tok bilong Jems 3:2. Em i tok: “Planti taim . . . yumi save popaia.” Na tingim Jehova, em i God bilong marimari na em i save skin bilong yumi i no strong.​—Song 103:14.

Tasol yu mas was gut na no ken mekim nabaut long gutpela pasin bilong God. Sapos yu pundaun na dring, larim dispela i strongim yu long wok strong long no ken mekim gen. Bob i bin mekim olsem. Em i bin strongim bel na nau em i stap bel isi wantaim famili bilong em na God tu. Em i stap amamas na em i mekim wok bilong God long olgeta de. Yu tu inap painim amamas na stap bel isi sapos yu winim hevi bilong dring planti.

[Ol Futnot]

[Piksa long pes 16]

Ol yangpela i save dring oltaim i ting dring i no kalabusim ol