Alkohol Holim Stretpela Tingting Long En

TONY, yumi stori long em long namba wan stori, em inap i stap laip yet sapos em i luksave long hevi bilong em long dring. Em i bin dring planti na i luk olsem em i no kisim hevi long dispela, olsem na em i ting em i bosim gut laip bilong em. Bilong wanem tingting bilong em i no stret?

Em i dring planti alkohol, na dispela i paulim tingting bilong em. Maski Tony i save long dispela o nogat, samting i bosim skin, tingting, na laik bilong em​—em kru bilong em​—i no bin wok gut, long wanem, em i bin dring planti alkohol. Taim em i dring planti, kru bilong em i no inap skelim stret ol samting.

Namba tu as na Tony i no tingting stret, em strongpela laik bilong em long holimpas pasin bilong em long dring planti. Allen, em yumi bin stori long em long ol stori i kamap paslain long dispela, pastaim em i ting em i no gat hevi long dring planti. Em i tok: “Mi haitim pasin bilong mi long dring. Mi givim ol eskius na mi tok olsem mi no save dring planti. I gat wanpela samting tasol mi laik mekim​—mi laik sambai long pasin bilong mi long dring.” Maski ol narapela i lukim olsem pasin bilong dring i wok long bosim Tony na Allen, tupela wantaim i tokim ol yet olsem olgeta samting i orait tasol. Tupela man i mas mekim sampela samting bilong bosim pasin bilong ol long dring. Tasol ol i mas mekim wanem?

Mekim Sampela Samting!

Planti man em ol i bin lusim pasin bilong dring planti ol i bin bihainim tok bilong Jisas, olsem: “Sapos ai long han sut bilong yu i pulim yu long mekim sin, orait yu mas kamautim na tromoi. Mobeta wanpela hap bodi bilong yu i lus na yu no mekim sin, na bai ol i no tromoi bodi bilong yu olgeta i go long hel.”​—Matyu 5:29.

Tasol tok bilong Jisas i no makim olsem man i mas kamautim na tromoi han lek bilong em, nogat. Em i tok piksa bilong makim olsem yumi mas rausim olgeta samting long laip bilong yumi em inap bagarapim pasin bilong yumi long lotuim God. Tru, dispela inap givim bikpela pen long yumi. Tasol em bai banisim yumi long ol tingting kranki na ol pasin em ol inap mekim na yumi dring tumas alkohol. Olsem na sapos sampela narapela i tok ol i tingting planti long pasin bilong yu long dring planti, mekim ol samting bilong stretim dispela hevi.a Sapos em i klia tru olsem yu no inap bosim pasin bilong yu long dring planti, orait yu mas redi long lusim alkohol olgeta. Tru, dispela bai givim hatwok long yu, tasol sapos sindaun bilong yu i bagarap, dispela i bikpela hevi moa.

Maski yu no man bilong dring oltaim, olsem wanem? Yu save dring planti? Sapos olsem, wanem samting inap helpim yu long holim stretpela tingting long pasin bilong dring?

Rot Bilong Kisim Helpim

1. Beten oltaim na bilip long strong bilong beten. Baibel i givim dispela gutpela tok long ol man i laik amamasim God Jehova: “Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas.” (Filipai 4:​6, 7) Yu inap beten long wanem samting bilong kisim dispela bel isi?

Tokaut stret olsem yu gat hevi long pasin bilong dring, em wanpela hevi yu yet i gat wok long stretim. Taim yu tokim God long samting yu laik mekim bilong stretim dispela hevi, em bai blesim hatwok bilong yu na yu inap abrusim sampela bikpela hevi moa. “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.” (Sindaun 28:13) Na tu, Jisas i tok yumi inap beten olsem: “Yu no ken larim ol traim i kamap long mipela, tasol yu ken kisim bek mipela long ol samting nogut.” (Matyu 6:13) Tasol olsem wanem yu inap mekim ol samting i stret wantaim ol dispela beten? Yu inap painim we ol bekim bilong ol beten bilong yu?

2. Kisim strong long Tok Bilong God. “Tok bilong God em i gat laip, na em i wok strong i stap . . . na em i save gut tru long olgeta tingting na laik bilong bel bilong yumi.” (Hibru 4:12) Planti man em bipo ol i dring planti ol i bin kisim helpim long rot bilong ritim Baibel long olgeta de na tingim tingim long bel ol tok bilong en. Man bilong raitim song i tok: ‘Man i no save bihainim tok bilong ol man nogut, dispela man i ken amamas tru. Dispela man i save laikim tumas lo bilong God, na em i save tingting long dispela lo long san na long nait. Olgeta samting em i mekim i save kamap gutpela.’​—Song 1:​1-3.

Allen, em i bin stadi long Baibel wantaim ol Witnes Bilong Jehova na dispela i bin givim strong long em long winim dispela hevi, em i tok: “Mi save tru olsem Baibel na ol stiatok bilong Baibel i bin helpim mi long lusim pasin bilong dring planti. Sapos nogat, mi dai pinis.”

3. Kisim pasin bilong bosim gut yu yet. Baibel i tok sampela man long kongrigesen Kristen, em bipo ol i man bilong spak, ol i bin kamap klin “long strong bilong Spirit bilong God.” (1 Korin 6:​9-11) Dispela i kamap olsem wanem? Wanpela samting i bin helpim ol long lusim pasin bilong dring spak na hambak na singaut bikmaus nabaut, em ol i wok long kisim pasin bilong bosim gut laik bilong bodi bilong ol, em wanpela pasin holi spirit bilong God i helpim ol long kisim. “Yupela i no ken dring planti na spak. Nogat. Dispela kain pasin i save bagarapim yupela. Yupela i mas larim Spirit bilong God i pulap long yupela.” (Efesus 5:18; Galesia 5:​21-23) Jisas Krais i tok promis olsem “Papa bilong [yumi] i stap long heven em bai i amamas long givim Holi Spirit long ol man i askim em.” Olsem na yumi mas wok long ‘askim God long givim ol samting long yumi, na em bai i givim long yumi.’​—Luk 11:​9, 13.

Ol man i laik lotuim Jehova long pasin em i laikim, ol i mas kisim pasin bilong bosim gut laik bilong bodi bilong ol. Ol inap mekim olsem long rot bilong ritim na stadi long Baibel na beten planti taim na kamapim bel bilong ol long Jehova. Ol i no ken larim bel hevi i daunim ol, nogat, ol i mas tingim tok promis bilong Baibel: “Sapos [man] i bihainim pasin bilong Holi Spirit, orait Holi Spirit bai i kamapim laip long dispela man na em bai i stap gut oltaim oltaim. Olsem na yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”​—Galesia 6:​8, 9.

4. Makim ol gutpela poroman. “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Tokim ol pren bilong yu olsem yu no laik abrusim skel na dring planti alkohol. Tasol Baibel i givim tok lukaut olsem, taim yu lusim “pasin bilong spak nabaut, na pasin bilong mekim ol bikpela pati na kaikai planti tumas na dringim planti strongpela dring,” ol poroman bilong yu long bipo ol bai “kirap nogut long dispela, na ol i tok nogut long [yu].” (1 Pita 4:​3, 4) Yu mas redi long lusim ol poroman em ol i no strongim yu long lusim pasin bilong dring planti.

5. Putim mak i stret long skel. “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:2) Sapos yu larim ol stiatok bilong Baibel i helpim yu long makim hamas dring i stret long skel bilong yu na yu no larim ol poroman o “ol man bilong dispela graun” i mekim olsem, yu bai amamas long bihainim rot God i orait long en. Tasol olsem wanem yu inap save hamas dring i stret long skel bilong yu?

Maski yu dring liklik tasol, sapos dispela i tekewe pasin bilong yu long skelim gut ol samting na i tekewe gutpela tingting bilong yu, dispela i makim olsem yu dring planti tumas. Olsem na sapos yu laik dring, yu mas makim hamas dring stret yu inap kisim, na i no stret long yu abrusim mak na klostu yu spak. No ken giamanim yu yet na ting pasin bilong yu long dring i orait tasol. Putim mak stret long hamas dring yu ken kisim, na putim mak i no kam klostu tumas long mak bilong dring planti​—dispela bai helpim yu na yu no lusim gutpela rot na dring tumas.

6. Lain long tok nogat. “Yupela i mas tok ‘Yes’ na ‘Nogat’ tasol. Em inap.” (Matyu 5:37) Long gutpela pasin, lain long tok nogat sapos wanpela i laik subim yu long dring. “Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.”​—Kolosi 4:6.

7. Kisim helpim. Askim sampela gutpela pren em ol inap long strongim laik bilong yu long sakim pasin bilong dring planti na ol inap helpim yu long stap gut long God. “I no gutpela long man i stap wanpis. Sapos tupela man i stap wantaim, em i gutpela. Sapos tupela man i poroman long wok, orait bai wok bilong tupela i kamap gutpela moa. Sapos wanpela i pundaun, orait narapela i ken litimapim em gen.” (Saveman 4:​9, 10; Jems 5:​14, 16) Lain National Institute on Alcohol Abuse and Alcoholism long Amerika, i tok: “Ating sampela taim i hatwok long lusim pasin bilong dring planti. Askim famili na ol pren bilong yu long helpim yu long winim dispela mak.”

8. Tingting strong long bihainim pasin yu makim pinis. “Dispela tok yupela i kisim, em yupela i mas bihainim. Yupela i no ken harim nating tasol. Nogat. Sapos yupela i harim nating, orait yupela i giamanim yupela yet. Tasol dispela lo i save brukim strong bilong sin na mekim yumi i stap fri, em i stret olgeta. Na sapos wanpela man i glasim gut dispela lo na i bihainim tru tok bilong en, orait God bai i mekim olgeta wok bilong dispela man i kamap gutpela tru. Tasol em i no ken harim nating na lusim tingting hariap.”​—Jems 1:​22, 25.

Lusim Kalabus Bilong Dring Planti

I no olgeta man em ol i dring planti ol i kalabus long alkohol. Tasol sampela i kirap dring planti tru​—o ol i save dring planti taim​—na ol i kalabus long dring. Taim man i kalabus long alkohol, skin na tingting i kalabus long samting nogut. Strongpela tingting long lusim pasin bilong dring planti na helpim i kam long God, dispela tupela samting tasol i no inap. Allen i tok: “Taim mi bin wok long lusim alkohol, mi kisim bikpela pen long skin. Long dispela taim mi kisim save olsem mi mas kisim helpim long ol dokta samting, maski mi bin kisim pinis helpim i kam long God.”

Planti man bilong dring i mas kisim helpim long ol dokta samting bilong winim pait long lusim pasin bilong dring na no ken go bek gen long dring tumas.b Sampela i mas slip long haus sik bilong helpim ol long karim bikpela pen ol i kisim long pasin bilong lusim alkohol, o ol i mas kisim marasin bilong daunim strongpela laik bilong dring na bilong helpim ol long ol i no ken go bek long pasin bilong dring. Pikinini Bilong God husat i wokim planti mirakel, em i tok: “Ol man i no gat sik ol i no save go long dokta. Nogat. Ol sikman tasol i save go long dokta.”​—Mak 2:17.

Ol Gutpela Samting Em Pasin Bilong Bihainim Tok Bilong God i Kamapim

God em Man i laik yumi stap gut tru, olsem na long Baibel em i givim ol gutpela tok long yumi long pasin bilong dring alkohol​—ol dispela tok inap helpim yumi long i stap amamas long nau, na long olgeta taim bihain. Inap 24 yia bihain long Allen i lusim pasin bilong dring, em i tok: “Mi amamas tru long save olsem mi inap senisim pasin bilong mi, na long save olsem Jehova i laik helpim mi long stretim pasin bilong mi, olsem em i . . . ” Allen i malolo liklik long toktok na em i daunim aiwara bilong em taim em i tingim bek ol samting. “Hmm, . . . long save olsem Jehova i pilim tru hevi bilong mi na em i tingim mi na em i givim helpim mi mas kisim​—dispela i gutpela samting tru.”

Olsem na sapos yu gat hevi long dring tumas o yu kalabus long alkohol, no ken givap hariap o ting olsem yu no inap lusim. Allen na planti narapela man em ol i bin stap wankain olsem yu, ol i bin lusim pasin bilong dring planti o ol i lusim olgeta pasin bilong dring alkohol. Ol i amamas long ol i bin mekim olsem; na yu tu bai amamas.

Sapos yu yet i makim olsem yu bai dring liklik alkohol o nogat olgeta, bihainim tok bilong God olsem: “Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.”​—Aisaia 48:18.

[Ol Futnot]

[Blok/Piksa long pes 8]

Olsem wanem? Alkohol i Save Bosim Mi?

Yu inap askim yu yet olsem:

• Mi save dring planti alkohol, winim long bipo?

• Mi save dring planti taim moa, winim long bipo?

• Mi save kisim ol strongpela dring moa, winim long bipo?

• Mi save dring alkohol bilong karim ol hevi o lusim tingting long ol hevi?

• Wanpela pren o famili i bin tok ol i tingting planti long pasin bilong mi long dring planti?

• Pasin bilong mi long dring i kamapim sampela hevi insait long famili, wok, o taim mi raun?

• I hatwok sapos mi no dring alkohol inap wanpela wik?

• Mi save pilim nogut sapos ol narapela i no save dring alkohol?

• Mi save haitim long ol narapela hamas alkohol mi save dring?

Sapos bekim bilong yu em yes long wanpela o sampela bilong ol dispela askim, ating yu mas mekim sampela samting bilong bosim pasin bilong yu long dring.

[Blok/Piksa long pes 9]

Mekim Ol Gutpela Disisen Long Alkohol

Paslain long dring, tingim:

• I gutpela long mi dring alkohol, o nogat?

Tingim: Sapos man i no inap bosim pasin bilong dring, mobeta em i lusim dring olgeta.

• Hamas mi ken dring?

Tingim: Makim stret hamas yu ken dring paslain long alkohol i paulim tingting bilong yu.

• Wanem taim bai mi dring?

Tingim: No ken dring paslain long draivim ka o paslain long mekim wanpela wok we tingting bilong yu i mas i stap klia; no ken dring paslain long sampela wok bilong lotu; taim yu gat bel; taim yu kisim sampela kain marasin.

• Mi bai dring we?

Tingim: Taim yu stap wantaim sampela pren na kaikai samting; no ken dring long pasin hait; no ken dring long ai bilong ol man i no save laikim alkohol.

• Mi bai dring wantaim husat?

Tingim: Dring wantaim sampela gutpela pren o famili; no ken dring wantaim ol man i gat hevi long dring.

[Blok/Piksa long pes 10]

Baibel i Helpim Man i Bin Dring Spak

Supot, long Tailan, bipo em man bilong dring planti. Pastaim, em i save dring long apinun tasol. Isi isi em i kirap dring long moningtaim, na bihain tu long belo. Planti taim em i dring bilong spak. Tasol bihain em i kirap stadi long Baibel wantaim ol Witnes Bilong Jehova. Em i lain olsem God Jehova i no orait long pasin bilong dring spak, olsem na Supot i lusim pasin bilong dring. Tasol bihain em i go bek gen long pasin bilong dring spak. Famili bilong em i bel hevi tru.

Maski i olsem, Supot i laikim yet Jehova na em i gat laik yet long lotuim em. Ol pren bilong Supot i wok long helpim em na strongim famili bilong em long lusim bikpela hap taim moa wantaim em, na ol i no ken givap long em. Long dispela taim, tok bilong 1 Korin 6:10 olsem ‘ol man i save spak ol bai i no inap i go insait long kingdom bilong God,’ dispela tok i helpim em long save olsem pasin bilong em inap kamapim hevi. Em i luksave olsem em i mas wok strong tru long lusim pasin bilong dring spak.

Nau Supot i gat strongpela tingting long lusim tru pasin bilong dring alkohol. Em i kisim strong long holi spirit bilong God, pasin bilong bihainim Tok Bilong God, na helpim em i kisim long famili na kongrigesen, dispela i helpim em long sakim laik bilong dring alkohol. Famili bilong em i bin amamas tru taim em i kisim baptais bilong makim dediket bilong em long God. Long nau Supot i amamas long pas gut wantaim God, em samting em i gat strongpela laik tru long mekim, na em i yusim taim bilong em long helpim ol narapela long ol samting bilong lotu.